إستمتعوا..♡
-
توجه كل واحد لغرفته لما تطمن الجميع ان مافيه اي شيء ناقص بالمعمل استعدوا للنوم للمره الثانيه ماعدا دجى اللي طلع لبلكونته
طالع ببلكونة ساري لفترة وعض شفايفه بحيرة وتردد
رمى على بلكونته حصى من النبته اللي كانت جنبه اكثر من مرة ومالقى جواب
تأفف واستند على السور وهو يتأمل الخشبه اللي بينهم
اعتدل بنية انه يرجع لغرفته لكن صوت شباك ساري اللي انفتح خلاه يتراجع عن الفكرة
طلع ساري وقرب من السور وهو يناظر بدجى.: ليش مانمت
رفع اكتافه وسكت
سأل باهتمام.: خايف للحين؟
هز رأسه بالإيجاب
استند وانظاره مانزلت عن دجى.: وش اللي مخوفك؟
زفر دجى وحط يده وراء رقبته .: الامان اللي احسه معاك صار يخوفني ، توني احس ان كل مانقرب لبعض اكثر بيكون اخطر واخطر
مد ايدينه لدجى اللي مسكهم بعد تردد كبير
شد عليهم بقوه وسحب دجى من ايدينه لين ارتطم جسمه بالسور.: لا عاد توريني هالحيرة بعيونك! ولا حتى الرهبة، انا مستعد لاسوأ التوقعات بعد اليوم
شتت دجى عيونه عن ساري اللي نبرته مستقره دائمًا وحازمه.: وش اسوأ توقعاتك
رفع عيونه للسماء بعد ما اسودّت ترسل اشاراتها انها بتمطر.: اتبلل قبل ما انام
ضحك وناظر السماء لوهله ورجع نظره لساري اللي مازال معلّق عيونه بالغيوم المتزاحمة ، بلع ريقه وهو مركز على تفاصيله المثاليه حدّة فكه ولمعة عيونه وغزاره رموشه وحواجبه طريقة شعره المبعثرة اللي مايشوفها الا قبل النوم، قال بعد فترة من التأمل والصمت.: ساري خلنا نبعد
مانزل ساري نظره من السماء وشد على ايدين دجى وهو ساكت
تعالت دقات قلبه وبدأت عينه تدمع وهو ينتظر ساري يمسك زمام امورهم وينهي علاقتهم قبل لاتبدأ لانه بنظره هو الطرف الامهر بهالامور وبينهي كل شيء بسهوله عكسه تمامًا .: خلنا نبعد
انعقد حاجبه لما لاحظ تغير نبرة دجى ونزل عيونه له .: ليش تبينا نبعد؟
شتت دجى نظره عن ساري قبل لا تخونه دموعه.: ما ابي اتعلق بشيء زواله اضمن من دوامه ساري، مستحيل راح تفهم الضغط اللي حسيته اليوم صدق انهبلت وانا احس اني ممكن اكون سبب في انتشار شيء سيء عنك او حتى
قاطعه ساري بمجرد مافلت ايدينه ونط لبلكونته بسرعة.: ليش تصيح الحين ممكن افهم
شهق دجى وبدون ادراك منه تخبى باحضان ساري هروبًا من ساري نفسه، كل المشاعر السعيدة اللي حسها بهالليله خالجتها مشاعر نقيضة تمامًا لها بعد ما ادرك خطورة الاستمرار
تنهد واحتضنه قبل لايسند دقنه على راسه ويمسح على ظهره بهدوء عكس الزوبعه اللي بدأت تسيطر عليه وتلعب بأفكاره.: لاتتحمل امور ماعمرها كانت من مسؤولياتك ، ترا زوالي صعب حتى لو كان مضمون
