كواكب امي

البارت السادس والعشرون

#كواكب_امي
للكاتبة روشان
الجزءالثاني_البارت السادس والعشرون

سديم: خبر رجوع المرض لامي من جديد واحنا نسمعة جان مثل حدة السيف وسرعته من يكطع الروس ،بس الفرق احنا انكطعت انفاسنا ،انكطع حيلنا وانكطع واهسنا بالحياة كلها ،كلشي صار اظلم
ايامنا وكل حياتنا رجعت اسودت بيوم وليلة ،

بقينا ناخذ امي لدكتورها وكل جم يوم يجددلها فحوصاتها حتى يتأكد اكثر وبعد التأكد كال لازم ترجع تاخذ جرع الكيمياوي من جديد ،واني اسمعه اجت كبالي صورة امي من يفوت الكيمياوي لجسمها مو جنه دوة چن سم وتيزاب وينكط بعروگها ،وبداخلي مشاعر تثور وتنتفض بداخلي صوت يصيح ويكول لااا ما اكدر اشوف امي هيج تصرخ وتتعذب من جديد ،روحي تلوب ودموعي محبوسة بالكوة ،رجعناها للبيت وهي غير هالابتسامة ماكو على وجها
قوية حتى بمرضها قويه حتى بسقوطها وتلاشيها ،صارت ايامنه مرة ،وجمعاتنا يمها بشكل دائم جانت جمعات الم واهات ،كل وحده بينا تخلي عينها بعين امي وتطلع من الغرفة تروح تدورلها على ركن تفرغ دموعها بي

جنا ببداية 2018 اني مكملة امتحانات نص السنة مال سادس ،وبدينا ننطي لامي الجرعات
جانت بيها حيل وتمشي على رجلها رغم منخليها تتعب بس روحها الي تحب الحركة والي كضت عمرها كله متعرف شنو كعده وشنو راحة جانت تمنعها من بقائها بفراشها

جرعاتها جانت كل شهر مثل السابق وهي تاخذلها فترة كم يوم ورى الجرعة بالفراش وبعدها تحاول بكل طاقتها توكف على حيلها ،يمكن حتى تشوفنا وتحسسنا ان هي بخير وتحاول تطمنا شكد متكدر وحتى وهي بهيج حالة جانت تضحي وتفكر بينا وتخاف على حزن گلوبنا اكثر متخاف على نفسها ،
بعدها اخذت الجرعة الثانية والي تعبتها كلش ،والدكتور بأخر زيارة الها يمه كال لازم اسويلها عمليه حتى نرجع نسيطر عالمرض ونشيل من اجزاء بطنها الي متضررة منة
ووافقنا واحنا كلنا امل هالمرة وكل ضنا خير برب العالمين واكيد مراح يخيب ضنا

اجه يوم عمليتها ورحنا وياها تقريباً كلنا لان الوضع الي هي بي ميسمح لوحده بينا تبقى بالبيت وراسها وكلبها مرتاح ،دخلوها واحنا ننتظر مابين الغرفة وصالة العمليات واحنا نستعد حتى ننتظرها ذيج الساعات الطويلة مثل مصار العملية السابقة ،

بس ماكو اقل الساعة بعد دخولها العمليات وطلع الدكتور علينا وملامح وجهه الكئيبة خلت گلوبنا تسوف مثل ما تسوف عظامنا الي بالكوة عانتنا وخلتنا نوصل يمه واحنا نسمعه يكول لابويه وامير

الدكتور:ماكدرنا نسوي شي للاسف المرض منتشر عدها بكل بطنها اذا مو بكل جسمها وماكدرت اشيل منه شي لان العملية حتكون الها بهالحالة مجرد عذاب مو راحة

ابراهيم: يعني شنو دكتووور ؟! ميفيدها علاج عملية ؟ زين اسفرها برة انت بس كلي بيا دولة يعالجوها واني اخذها
الدكتور : لا هنا ولا برة مالها علاج خلو عينكم بعين الله هو الوحيد اليكدر يشافيها بمعجزة
للامانة اني رجعت خيطت بطنها مثل ما فتحتها وما كدرت اخطي اي خطوة ولا استأصل اي شي واني ادري مراح يفيدها
على شنو نضل نشيل ونكص بلا فايدة ولا تخلون احد يلعب بعقلكم وين ما جان هنا لو بالخارج ويكللكم فلان عملية تفيدها ترى بس اذية الها وناس متخاف الله تريد تستفاد شلون مجان