كواكب امي

البارت الرابع

مساء الورد 🖤

#كواكب_امي
للكاتبة روشان

البارت الرابع

وشنهو ظني ؟ الچنت أتانيهن جزنّي ! لا لگيت شويه منهن ولا لگيت شوية مني ضايع وكل الوجوه استغربتني.
.
.
.
ليلى:حسيت الصبح لا ما حسيت فزيت واخترعت على صوت امي الجاي من جوة

اني وامينه مثل المخابيل وحده تباوع للخ وكمنا من فراشنا نركض
ونزلنا لكينا الكل فوك راس ابويه بالغرفة وامي تكطع بروحها وتصيح
راااح ازلمتيييييي...

امي تصرخ وعمي وابراهيم يم راس ابويه الي يهزه والي يحاول ينعشه وهو خشبه صاير جثة ومن صدك جثة،
نام وبعد ما كعد
عمي وكع بالكاع بصفه وكام يصيح ويضرب على وجهه
سعود: ميت ميييت ،راح اخوووي يا ناس راح ضهري راح ابوي راحت الدنيا ولكككككم ...

دخل سعد الجاي يركض من فوك وجعفر النومه ثكيل هم كعد على صوت الصياح والتمو كلهم يم ابويه النايم جسد بلا روح

بقيت وكافه بزاويه الغرفة اباوع عليهم شلون امي تصرخ وتملخ بوجها وامينه بصفي واكفه ايدها على وجها وتشهك
عمي بالكاع كاعد ينوح مثل المرة وابراهيم يجر بأخواني الوكعو فوك ابويه يبجون ،،
دموعي تجري واني صافنه عليهم ومن بين الكل ما حركتني روحي بس من اشوف حال امي
يمكن هو ابونا بس شكد منحبه منوصل نقطة من بحر حبها اله
جانلها ام واب وسند تتفاخر بي كدام الكل ،ومن هي صغيرة اخذها وفتحت عينها عالدنيا وياه ،حتى من اتغير عليها وكام يأذيها هم بقت تحبه ومتعلقة بي ومن وكع واتمرض ليل ونهار مكابلته وتبجي ..شحال هسه عافها وراح لدار حقه.

صارت الفاتحة بس بحياتي ما شفت هيج فاتحة ،بس النسوان ترسن بيتنا طول وعرض اهل الريف يمنا كلهم ومن كل بيت نفرين او ٣ اجوي

من عدى فاتحة الزلم والجادر الما فرغ ابد ،لان معارف ابويه الله يرحمه هواي ومن كل جهه اجوي ،

امي حالتها بالضيم ومحاوطاتها عماتي الثنين وخالاتي ودك لطم ملخن روحهن وبالكوة نجرها من يمهن لان انتهت من البجي وماعرف شلون خلصلت عليها ايام الفاتحة

وبقت عماتي وخالاتي وبيت عمي سعود يمنا لحد ما طلع اليوم السابع وكلمن راح لبيته ،بس وحده من خالاتي بقت علمود امي ووضعها ومنا لزمت عدة ..

اني طول ايام الفاتحة المسؤولية كلها واكعه عليه ،الي يشوف المسؤولية الي اتخلت عليه ميكول هاي عمرها ١٦ سنة لا عبالهم بال٣٠ عمري ،،
منا الحزن على ابويه ومنا كلشي صار براسي من طبخ الفاتحة والخطاطير والكل تصيح هاي بنته الجبيرة ..وجيبي وحطي وفرشي وسوي اكل ومنا وضع امي وحايره بيها واتوسل بيها عاللكمة.

انهد حيلي كله وحتى وكت للدموع ما جان عندي من الركض الركضته .مرات انتضر الليل يجي والكل ينامون واني اطلع دموعي وابجي ،،