كواكب امي

البارت الثامن عشر(هدية)

مساء الحب 🖤
وهذا البارت الهدية مكدرت انزله الصبح
وتتدللون حبايبي

#كواكب_امي
للكاتبة روشان

البارت الثامن عشر (هدية)
اللينُ باللين، والبادئُ #باللُطف تهـواه الروح.🖤
.
.
.
شمس : بقيت هالكم يوم بصراع ويا نفسي
مرة اصدك ومرة اكول
لا خاف تطلعلي شغلة وتنغص عليه هالفرحة وتطلعها من خشمي

ابويه جان كايللهم اسأل عمامها واردلكم خبر ،
مرت كم يوم وجنت اشوف ابويه وامي دايما يتناقشون

بس جنت استحي اسال واصلا
من اشوفهم يسولفون
اني اعوف المكان واكوم

لحد ما اجتني امي وكالت خابرت خالة نجية
وكلت الها موافقين
وهي كيفت وكالت يومين والزلم يمكم ،

هزيت راسي لامي بالقبول وهنا احس
الله ذب عليه كل الثكل ،
ماعرف يمكن لان حسيت الشغلة
صارت صدك !!
يعني راح اتزوج واعوف اهلي !
امي وحنيتها ! خواتي وسوالفنا وكفاشنا سوى !
ابوية وعصبيته!!

بيت جديد وناس جدد،حياة جديدة
شخص راح يكون اقرب الي من نفسي
شخص تنتهتك وتزول وياه كل معالم الخجل

صحيت على روحي وصحى بيه الخوف
وين جان عقلي ؟! من فرحانه بي ؟!
شمدريني شنو هو من جوه ؟!

شنو طبعه وشنو طينته ،زين او شين ؟!
نسيت ان الشكل مو كلشي

عيونه من هذيج اللحظة اسرتني
وخلتني بداخل قيود من السحر مُحكمة
بس هسه يلا انفكت قيودي من انعلنت لحظة الحقيقة
من صار كلشي صدك وكلشي قريب ،

صار السكوت ملازم كل اوقاتي
خواتي يحجن ويصنفن ويضحكن
واني بعالم ثاني

مخليه كل املي ورجائي برب العالمين
وماريد انخذل

يمكن لو الكل فكرو مثلي جان هسه ولا
وحده اتزوجت
بس اني اعرف نفسي من الداخل
انسانة ضعيفة وهشه مثل الزجاج
ما اتحمل اي خدش
خاصة لو خليت املي وتعلقي بشخص
وبالتالي انصدم بي !!

واني تعلقي السريع برائد من اول نظرة من عينه
هو الي خلاني اخاف انصدم بي ،

صارت المشية وعقدنا سيد
وبيومها لا شفته ولا شافني حتى لو صار حلالي
هم ابويه ما يرضى

واستمرت خطوبتنا شهر واحد وخلال هالشهر
بس امه تجينا ومرات اخته الصغيرة وفاء
وبوقتها طلعنا طلعه وحده للسوك
اخذنه الذهب والملابس

هم خالال هالشهر هم جهزو الغرفة ،
جنت اسمع من وفاء شلون هو مكيف
وشلون جاي يجهز بغرفتنا بيده

حتى من اشترينا الغراض ما خلوني اخذ
هواي مكياجات وعطور وهالسوالف
وكالن هو ترسلج الميز تواليت والكنتور من كلشي
لان هو جان يشتغل بمحل مال هيج شغلات والي
هسه يسمونه (كوزماتك )