#كواكب_امي
للكاتبة روشان
مادريّنا إنبعنَا يمتى؟
ومادريّنا إنبعنَا بيّش
كُبرت الفشلة بسوَاد عيُوننا
ونَده الجبيّن ..
صاحَت عليّنا الشوارِع لا تجُون
وصاحَت الوادِم أبد مايستحُون
مسُودنين ..
تعرُف الوادِم حجيّنا
بَس تسِد إسماعها
وإحنا محَد يشترينَا
لاحجيّنا بألف شفَه
ولا لبَسنا هدُوم ترفَه
ولاكَدرنا نعيّش يُوم ملونِين
وباعنَا الما يشتريّنا
- محمد الغريب .
مشهد ...١
الصدمة خلت كل اطارفنا ترجف
وحدة تباوع عالثانية بخوف
هذا الصراخ والصوت مو جديد
بس هالمرة غير ..هالمرة النهاية
ركضنا اني وامي عالصوت وقطع طريقنا
وهو جارها من شعرها ويسحل بيها
تبجي وتصرخ بيده وهو يرجع يضربها على حلكها بقوة ويصيح بعلو صوته وصرخاته مثل الشرار الي يتطافر لاذنا
لحد ما شمرها بالمطبخ وهي لمت روحها بسرعة بدون اي كلمة وهو يضرب بيها راجديات بكل قوته وهي ساكته وبس شهكاتها تبين وكأنما معترفة بغلطها
واني وامي نحاول نجرها ونخلصها من ايده وامي تتوسل بي
-فدوه عوفهاااا راح تموتهاااا ولك كااااافييييي كاافي الله ما يموتني ويخلصني مننننكم
-كللله مننننج انتي الصوج انتيييي
مو ردت اكتلها واخلص من شرهااااا وصخام وجهااا ووجهناااا و محد وكفني غيرررج
هاج شوفي وين راح توصلنا بعععد لخااااطر الله صرنا كواويد تالي عمرناااا ؟!!
يحجي ويدفر بيها واني وامي راحت روحنا واحنا نجره منها
وامي كلساع تريد تتخربط بالكوه واكفه من الرجفة
لحد ما دفعنا وجرها من شعرها وكفها وسحلها ماعرف وين يريد ياخذها لحد ما وصل يم باب المطبخ
ومد ايده لكيبل الكهرباء الرئيس الي جان مشلوع من الصبح
وقربه منها يريد يموتها بي ....
مشهد...٢
دخلت للصاله بيدي صينيه الجاي خليتها عالطبلة وكعدت
مد ايده اخذ كلاص الجاي
صفنت عليه حسيت اكو شي
مو من عوايده هيج ساكت
متعلمه عليه يسولف ويتشاقه
واني اباوعله بأستغراب رفع راسه وشافني
-شكو شبييج ؟!
-اني لو انت ؟! شبيك اليوم شو سنطه
-والله انتي لوتيه
-احترمني لا اصيح عمك ،حجيتها بخباثة
-لا يابه؟!! ،،ترى ميخوف چلبي
-هسه يجي وكدامه كول هالحجي ،
هسه المهم كول شكو على لسانك ،
-من اكول لوتيه متقبلين
والله صدك اكو سالفه ارد احاجيج بيها
-يحجي وايده على جبينه يفرك بي بتوتر
واني احوص اريد افتهم شكو ،لحد ما نطق
-شوفي يا عيني
من الاخير اني رايد اختج بالحلاااال وبشرع الله وفايت من الباب ...
مشهد...٣
جنت لابسه فستان اسود مستور بس مخصر على جسمي وكلت من يجي العريس البس عبايتي فوكاه ...صافنه والابتسامة تارسة ملامح وجهي واني اباوع لجمال وجها وهي بالبدلة ،،
صار صوت الاغاني ناصي وكمنا وزعنا العشى اني وخواتي والمعازيم كرابتنا هواي وحتى من الجوارين وبيت عمام اهل العريس ..
واني جاي اقدم اللفات ،واتعديت النسوان
سمعتهن يتبسبسن بيناتهن عرفت عليه بس ما فهمت بشنو ..
فززتني من صفنتي وذاكرتي ورجعتني للواقع
حجاية ماما
-ها يمه شكلتي ،،شنردلهم خبر للجماعة
-حجتها بابتسامة امل واني صافنه بوجها
ورجعت كملت حجي
-ماما ترى بعدج صغيرة والعمر ما يوكف على احد الراح راح
وانتي كدامج عمر طويل يحتاجلج بي رجال وسند وابوج عمره طويل بس ما دايملج ماما وخواتج بالاخير كل وحده تروح لبيت رجلها وتلتهي بحياتها
المن تبقين انتي وحيده ...
مشهد..٤
مثل النار وتسعر بينهم
انقلب بيتنا جحيم احاول اتذكر الهدوء الجنا عايشين بي وهسه صار مثل الحلم ما جاي نحصله
افكار تاخذني وتجيبني وكلام المرة مطبوع ببالي ،وهي تردد وتكول
مدفون بالحديقة
ومرشوش بالبيت ....گلب حياتكم جحيم ،
طلعت اتمشى بنص الليل والكل نايمين
الساعة يمكن ٢ ،طلعت للحديقة
صح خايفة
بس القوه الي بداخلي اقوى من الخوف
صح صغيرة
بس الشفته بحياتي خلاني اكبر هواي
اقتربت من المكان الوصفته الي المرة
بزاويه الحديقه
مكان ما بي زرع وكأنما الحياة معدومة بي
وصلت يمه وكعدت على ركبتي واني اباوع لايدي الخاويه نسيت اصلا اجيب شي احفر بي
بس اكو شي بداخلي منعني حتى من التفكير
حسيت ايدي بدون وعي
بدت تحفر بكل سرعتها وبدون توقف
ما مر الا دقيقتين من الحفر وطخت ايدي بشي ...
.
.
.
اللتقي وياكم بالجزء الثاني من رواية كواكب امي
مع احداث جديدة واوجاع اخرى افراح واحزان نعيشها معى كواكبنا الجميلات ...
اما موعد النشر فأعتذر عن الاعلان عنه
لعده اساب
الاول ان موعد زواجي ما محدد
اذا صار بعد العيد فأني قبل رمضان ابلش وياكم الرواية
اما اذا صار قبل رمضان فأكيد راح انشغل بتجهيزات زواجي ويبقى النشر بعد ذلك بفترة
وان شاء الله الفال للعزابية🖤
والسبب الثاني هو قلة التفاعل بكروبي
وان شاء الله بمرور الايام جاي ترجع الحياة بالكروب بوجودكم ودعمكم حتى من تنزل الروايه يكون الها طعم ومعنى اكبر من خلال تفاعلكم الجميل ،،
احبكم
#روشان
أنت تقرأ
كواكب امي
Ficción Generalامٌ حنون لاخوانها ،وقلبٌ فاح منه الحب والعطاء لذاك الذي فتحت رمق عينيها عليهِ، وسماءٌ دافية احاطت ببناتها السبعة..... من سيأخذ بيدها ،ومن سيعبر من فوقها ... تابعو معي..
