كواكب امي

تكملة

مساء الخير والعافية على قلوب احبتي 🖤
يابه والله صرت افشل منكم وافشل اعتذر
اليوم من الصبح مبلشه اكتب البارت حتى انزله الكم باسرع وقت
بس شائت الاقدار واجاني خطار مفاجئ وماكدرت اكتب الا كم سطر
بس تعرفون روشان تعوضكم 🙈وما تحب تخلي بالكم
ف اولاً راح انزللكم الكم سطر الي كتبتهن واعتبروهن تكملة للبارت السابق
وثانياً/وباجر يوم استراحتي راح ابذل جهودي حتى اكتبلكم وانزل بارت بأذن الله تعالى
وهسه اخليكم ويا التكملة والرد على قفلة البارت السابق 💔

#كواكب_امي
للكاتبة روشان

تكملة البارت الثامن

‏گبلك ما چنت اشتاگ
‏و لا بُعدك شتا اعله #الدم
‏و حسبالي البرد ديّان
‏و منه الناس #تتلثّم
.
.‏
ليلى :دخلت للغرفة وياريتني ما دخلت
شهكت اول ما شفت المنظر كبالي ..حسيت بخوفة مو طبيعية....
واني اشوف منظر امي وهي نايمة صفح يم السجادة
حاولت اوخر الخوفة مني جريت نفس واتمشيت ناحيتها
واني احجي ويا روحي
سودة عليه يمه طكج النعاس مو كتلج نامي الضهر،

اتجهت ناحيتها وكعدت يمها وبديت احرك بيها بهدوء ،
يمه يممه ليش نايمه هيج كعدي اتعشي ونامي ،

بقيت اكعد بيها وهي نايمه بعمق ،بدت انفاسي تثكل ودكات كلبي تتسارع كلما طال الوقت وامي على نومتها ،حسيت روحي صرت بعالم ثاني ماكو بي بس اني وامي ومقنعة روحي ان هي راح تكعد
راح تفز من نومها هسه وتكلي
ها يمه شبيج خايفه!!

اي خايفة وخايفة حيل ،والرعب والرهبة اتملكتن كل شبر بية بقيت دقايق صافنه ومركزة بملامح وجها النايم بهدوء

لحد ما صحيت على روحي من زادت صرخات الطفلة يمي بالغرفة
وخلتني اوعى واشوف الواقع
خلتني انتبه على شحوب وجه امي وامد ايدي لايدها
ولكيتها بارده مثل الثلج
هنا رجعت لوعيي بشكل اكبر
كمت اهزها بقوه حتى تكعد واصرخ بصوت عالي ماعرف ليا مدى وصل

يممممه اكعدددددي
يمه فدوه رحتلج فتحيييي ،فتحي عيوووونج
شبيج والله مابيج شييي مثل الورد صرتي ،ولج يمممه لخاطر اخواني الصغاااار مو لخاطرررررري والحسييين الشريف يطبني مرررض بس اخوانننني المن تعوفيهم

احس روحي فقدت وصراخي صار برجفه ثواني وبيت عمي كلهم فوك راسي
وعمة فرحة كعدت يمي بالكاع بسرعة تگلب بأمي بخوف لحد ما كامت تصرخ وتعيط ويا عياطي

والبنات هم اجن يمها وهي تعيط وتكول ماتتت ماتتت ام سعدددد

بهاللحظة اتمنيت ولاول مرة بحياتي الموووت
اتمنيت اني بمكان امي
نسيت حياتي نسيت رجلي وبناتي ردت افدي امي بروحي
اتمنيت لو اكدر ابدل روحي بروحها ،،

كمت ماعرف شجاي يصير يمي بس اسمع صوت عمي العالي وهو يصيح من يم الباب
لا اله الا اللله ،لا اله الا الله ...

ولكيت روحي نايمه على صدر امي مثل الجاهل وروحي مفرفحة

وللج يممممه وين عفتيناااااا ،يممه واللله بعدنا صغاااار وين عفتينا
اصرخ وكل صرخة تشك گلبي شك ،والبنات يجرن بيه ويبجن
لحد ما عاطت عمتي بوجهي وهي تبجي

فرحة: ليلى وخررري منها عاد يمه كاااافي
شيلي راسح وعايني خواتج
اذا انتي الجبيرة هذا حالج ،لعد منو يلمهن ومنو يسندهن

ليلى: رفعت راسي بثكل من حضن امي وصارت انوار كبالي يم الباب واكفه تشهك وحاضنة عذراء الصغيرة وشروق وجميله كل وحده واكفه بصفحة ودموعهن تجري

حسيت مثل الضربة القوية الصارت على راسي منظرهن ومنظر باسم ومازن الي جان كاظم شايلهم ويباوعون بأستغراب وميعرفون شجاي يصير كبالهم ،

شلووون اتحمل شلووون! كمت اصرخ بس هالمرة صياحي بداخلي واصرخ بأعماق روحي
المن عفتيهم ياااا اميييي
بعدهم صغااار وانتي بعدج بعز شبااابج ليييش هيج الدنيااا افترت عكس ويانا
لا اب ولا اممم ولا اخ بي حظ
المن بقووو الصغار الممممن..

حسيت روحي خدرت من البجي وكد ما طحنت بروحي طحن ووخروني كريمه وسعاد على جهه وعيوني من الدموع كمت ما اشوف بيها
بس غواش
بس اشوفهم شلون طلعوها من يمي وشلون زادت صرخات خواتي وشلون عمتي فرحة تلطم وتصرخ ،،

وهيج مرت علينا ايام عزاها وفراگها ،حرت بشنو افكر وعلى شنو تحترك روحي
على فراك امي الي ماكو بشر اغلى منها بكل هالدنيا لو على وضع اخواني الصغار الي يباوعون بالوجوه ويدورون وجه امي ومحنتها وضحكتها وعيونها الحلوة الچنها جنة الله بخضارها

لو امينه الي مكابلتني وتملخ بروحها فاقدة وهي بطنها شكبرها
كلنا صغار وكلنا نريد امنا نريد الخضن الجان يلمنا
نريد ذيج القوية الي لمتنا بعد موت ابويه

ما انكسرنا على ابويه ولا جنا ايتام بيوم ،،بس من راحت هي يلا عرفنا شنو معنى اليتيم

راحت وخلت على ضهري حمل جبير ،حمل اخواني من جعفر جبيرهم لحد باسم الي يمشي ويدور بالوجوه ويسأل وين يمه ...

يتبع

شنو توقعاتكم للجاي؟!