نكتب خواطرنا كي لا نختنق بالصمت لكن أحيانا نكثر من الكتابة و نختنق من الكلمات 💔ف برغم من كل شيء نقوله و نكتبه و نقرأه يبقى في القلب شيء أكثر مما يقال 💚ففي كل منا غرفة مغلقة نخاف طرق بابها حتى لا نبكي 🌸فليس كل هاديء خال البال و ليس كل صامت لا يبالي ففي الصمت و الهدوء ألف كلمة و حكاية لنا حياة داخلنا تختلف تماما عن الحياة التي يرانا فيها الآخرون 💔🌸
هاشم: هيااااام ياهيام يا زفت تعالي هنا
هيام: مالك في شنو دايما معذبني و مطلع عيني عايزا مني شنو كمان
هاشم :م ناديتك حبا فيك شيلي ملابسي دي و غسليها لي سرعة طالع بيها بعدين
هيام: و انت مالك مكسر ولا مشلول، ياخ م معقولة معاك والله دايما بتخليني اغسل ليك و اكوي ليك انا اختك ولا خدامتك، خايفة بعدين لمن تعرس تخليني اغسل ليك انت و مرتك 😭
هاشم: يعنى ح يغسل لي منو؟ امي مثلا ولا ابوي، دا حظك كدا جيتي بت وحده لو كان عندك اخت تانيه كانت ح تخفف عنك، كنت ح اخلي وحده تغسل لي و التانية تكوي لي 😌
هيام: ي سلام يعنى نحنا خلقونا عشان نخدم حضراتكم ؟طيب ليه م يحصل العكس انت تغسل و تكوي لي ملابسي؟
هاشم: عايني عليك الله انجزي شيلي الهدوم دي و غسليها نضيف
هيام اتأففت و اتزاهجت و عصبت لكن في النهاية غسلتهم و كوتهم
في العصرية كدا كنست الحوش و رشتو و فاحت منو ريحت الطين و الدعاش، طلعت سرير ابوها برا و ختتو ليهو تحت ضل الشجرة النيم و جابت سرير تاني و طلعت ابوها العيان برا و قعدتو تحت شجرة النيمة و قعدت تتونس معاهو، لحدي م جات امهم شايلة ليها صينية كبابي شاي و انضمت ليهم، ابوها حاج عبد الرحيم كان بحكي ليها عن حياتهم زمان في القرية و كيف زمنهم كان جميل و الحياة فيها سخيه و رخية ، و قعد يحكي ليهم مواقف مضحكة حصلت معاهو و هيام كانت بتضحك بأعلى صوتها 😂اثناء ماهي بتضحك كدا حست ليك بزول ضربها في راسها، إلتفتت عشان تشوف دا منو دا، لقتو دا هاشم وقفت على حيلها و صرخت فيهو قالت ليهو مالك ياخ هسي انا سألتك 😤 يا ابوي اتكلم مع ولدك دا ياخ، قال ليها صوتك واصل اخر الشارع، قالت ليهو م يصل كن وصل يعنى م اضحك يعنى، مش صوتي و انا حرة فيهو ان شاء الله اوصلو الفضاء الخارجي ،حاج عبد الرحيم قال لولدو مالك معاها ي هاشم دي اختك ارحمها شوية، قال ليهو لكن ي ابوي...سكت و إلتفت على هيام قال ليها غسلتي لي ملابسي؟ سكتت و م ردت عليهو، قال ليها هيام انا بتكلم معاك، شويه كدا دموعها جرت و بدت تبكي ،جرت دخلت جوا عشان تكمل بكاها هناك ،قالت لييه هاشم دا بعاملني كدا مرات بشك و بحس اني م اختو دايما مقيد حريتي و متحكم فيني م تطلعي الحته الفلانيه م تلبسي كدا م تصاحبي البت دي م تضحكي م تبكي م فضل ليهو إلا يقول لي م تتنفسي 😭انا عملت شنو عشان جزاي يكون اخ زي دا ؟
في صباح اليوم التاني هيام مشت الجامعة و هناك لاقت صحباتها شيماء و يقين، شيماء قالت ليها مالك ي بت وشك دا وارم كدا؟ كنتي بتبكي ولا شنو، يقين قالت ليها اكيد دا اخوك هاشم صح؟ هيام سكتت و م ردت، شيماء قالت ليها والله انتي ي هيام مكبرة الموضوع ساي اصلا دا حال الأخوان و انتي م البت الوحيده الأخوها بتعامل معاها كدا، مفروض تفرحي انو عندك زول بخاف عليك و بتهمو مصلحتك، يقين قالت ليها لكن م للدرجة دي دا خانقها عديل و اصلا انتي م ح تقدري تحسي بالحاجة دي لأنو م عندك اخو،شيماء عيونها اتملت دموع و بصوت موجوع و مكسور قالت ليها كان عندي اخو بسندني و بخاف علي و بحبني مع انو م كان بظهر لي او بقول لي الحاجة دي بس انا متأكدة منها، انتي عارفة في اغلب الأوقات اخوي كان بعاملني زي معاملة اخوك ي هيام كنت بضايق و بزهج كتير من الحاجة دي بحسو خانقني عديل وصلت لدرجة خلتني اقول ي ريت لو كان م عندي اخو،....و للآسف دا الحصل بعد وفاتو انا فقدت السند فقدت شغفي في الحياة دي، من بعدو حياتنا اتغيرت 180درجة ،زي كأنو كان سور منيع حامينا و هسي انهد و شالنا السيل ضعنا شديد في الدنيا دي، انتي م عارفة اهمية الأخ حافظي عليهو عشان م يجي يوم تفقديهو و تعيشي بتأنيب الضمير العايشاهو انا، متمنية لو يرجع بي الزمن لورا و يخليني اشوفو تاني و اسمع صوتو اشتقت لعصبيتو علي لمن اتأخر او لمن اطلع اجيب رصيد بعد المغرب، اشتقت ليهو لمن كان بقول لي متين تعرسي و تريحيني منك ياخ حتى الزول لمن يتألم بقول اخ... سكتت مسافة و م قدرت تكمل، هيام قالت ليها كفاية ي شيماء م تبكي و انا آسفة لأني ذكرتك بوجعك و جات عليها و حضنتها و قعدت تبكي معاها 💔😭،بعديها مسحوا دموعم و مشوا دخلوا المحاضرة، في نهاية اليوم و اثناء م هيام طالعة شافت يقين واقفة ليها مع ولد، اتونست معاهو مسافة و بعدين ودعها و اتحرك طوالي هيام مشت ليها و قالت ليها مدثر دا كان عايز شنو، طبعا هيام م كانت بتطيق مدثر دا نهاااائي، يقين قالت ليها والله ي هيام الولد دا بحبك بس انتي م مدياهو فرصة اتخيلي واقف معاي ساعة عشان يسألني منك و يعرف اخبارك،هيام قالت ليها شنوووو شنوو هاشم اذا عرف ح يقطعني حته حته 😭يقين قالت ليها ح يعرف من وين و بعدين اخوك الغبي دا عليك الله م تشتغلي بيهو كتير و عيشي حياتك، شوفي ي هيام فكري كويس، و صدقيني م ح تلقي زول يحبك زي مدثر ،دا بسف التراب البدوسيهو سف، بس انتي اديهو فرصة و م تبقى قاسية، هيام سكتت و م ردت عليها بس الموضوع بدا يتخلل ليها في مخها و يتشربك ليها مع افكارها، قطع تفكيرها صوت شيماء و هي بتقول ليهم خلونا نمشي بعد دا، فعلا اتحركوا و اي وحده مشت على بيتم
✨💚💚✨💚💚💚💚💚✨
يلااااا نتلاقى في البارت الجاي عشان نشوف الح يحصل شنو ،اعملوا لي متابعة عشان يظهر ليكم الجزء التاني
يتبع..........
