المساء هاشم رجع، كان باين عليهو التعب و الإكتئاب، اول مرة اشوفو في الحالة دي 💔جهزت ليهو الأكل و مشيت وديتو ليهو في المظلة، قال لي ما عايز قلت ليهو كيف يعنى ما عايز ما شايف نفسك بقيت ضعيف كيف، بنهره كدا قال لي هيام اسمعي الكلام قلت ليك ما عايز معناها ما عايز، بكيت و قلت ليهو انت سندنا بعد ابوي ما لينا زول غيرك، عليك الله ما تجافينا كدا و قعدت ابكي 😭 قال لي اها مش دا الأكل عايني لي بديت اكل خلاص وقفي بكى، انتظرتو لحدي ما كمل الصحن كلو، شلت الصينية و ماشه اوديها، اتذكرت صحبو الجا قبيل، قلت ليهو هاشم نسيت ما قلت ليك قبيل جا واحد صحبك قال اسمو حسان، بس ما لاقك قال بتصل عليك لكن ما بترد، قال ليها اي هسي اتصل علي و رديت عليهو
بعد مرور شهر:
كنت قاعده مع يقين في كافيترية الجامعة، قالت لي اها اخبارك انتي و مدثر شنو؟ قلت ليها تاني ما تجيبي لي سيرتو، طول فترة البكى دي ما حصل اتصل علي ما حصل رسل لي و سأل عني، قالت لي منو القال ليك ما قاعد يسأل عنك، كان دايما بتصل علي و يسألني عنك و ما اتصل عليك لأني فهمتو انو اخوك صعب و يمكن يعمل ليك مشاكل ،قلت ليها طيب خلينا نقفل الموضوع دا، شيماء وين؟ قالت لي ما عارفاها حاساها بقت متغيرة الفترة دي، قلت ليها لا ما متغيرة ولا حاجة بدليل طول فترة البكى دي كانت كل يوم بتجي تزورني، قالت لي خلاص ما علينا يمكن دا مجرد احساس بس، اثناء ما نحنا قاعدين كدا جا مدثر و سلم علينا و طوالي قعد معانا، يقين قالت لينا استأذن منكم عندي حاجة ضرورية، بعد ما مشت مدثر قال لي آسف على اني ما اتصلت عليك او رسلت ليك ،لأنو يقين قالت لي انو اخوك صعب و يمكن يضربك و يعمل ليك مشاكل بسببي، كنت ساكته و منزلة راسي، قال لي هيام انتي ما عايزاني اتقدم ليك ولا شنو، بسرعة قلت ليهو لا ما كدا بس، ضحك و قال لي الجمعة الجاية ان شاء الله ح اكون في بيتكم، قلت ليهو جادي انت، لكن ح تقول ل هاشم شنو، اوووعك تقول ليهو بعرفها من الجامعة 😱قال لي ما تخافي انا مجهز نفسي و الكلام العايز اقولو، بعديها اتونسنا مسافة طويلة، حتى رجعت البيت، اول ما دخلت كنت مصدعة شديد و حاسه نفسي عيانه، بالجلالة قدرت اصلي و نمت بعديها صحيت على يد مختوته في جبهتي، فتحت عيوني لقيت هاشم، قال لي انتي عيانه صح، قلت ليهو لا شوية صداع و ح يخف لمن اشرب لي شاي، سكت و طلع مني، بعد دقايق بسيطة كدا جا و جاب لي معاهو حبوب من الصيدلية قلت ليهو ما كان في داعي، مد لي الكباية و معاها الحبة و طلع استغربت من تصرفو دا اول مرة يعاملني باللطافة دي 💚في اليوم البعديهو هاشم قال لي ما تمشي الجامعة، انفعلت و قلت ليهو شنو و ليه ما امشي على كيفك انت،عايز تقعدنا هنا في البيت عشان اخدمك مش، عشان بترتاح لمن تشوفني مضايقة و زهجانة مش، لمس جبهتي و قال لي حرارتك لسه مرتفعة، سكت و ما قدرت اقول اي حاجة تصلا انا زاتي حاسه بنفسي تعبانة، فعلا قعدت و ما مشيت الجامعة، امي جهزت الفطور و نادتنا تحت شجرة النيم 😍قعدنا نفطر و امي تحكي لينا نفس حكاوي ابوي مرات كنا بنبكي و مرات نضحك، وصلت الخرطوش و رشيت المكان القاعدين فيهو و رشيت الشجرة، بالغلط رشيت هاشم، قلت الليلة ح يقوم الدنيا و ما ح يقعدها 😱قام على حيلو و مسك مني الخرطوش و ملاني ليك مويه شغالة اصرخ و اقول لي امي اتكلمي مع ولدك دا ياخ و امي تضحك ساي، تلقائيا كدا بديت اضحك معاهم جريت المطبخ و جبت جرديل كبير مليتو مويه و كبيتو في هاشم، بقى ساكيني بالخرطوش و انا جاريه، جاريه و جاريه لحدي ما وصلت جنب الباب و الباب كان مفتوح فجأة كدا دخل حسان ما عرفت اجري وين ملابسي كلها كابه مويه، جريت جريه واحده ما وقفت إلا جوا الغرفة، من جهة تاني هاشم رحب بحسان و سلم عليهو و قعدوهو معاهم تحت الشجرة، حسان قال ليهو شكلك اشتقت لطفولتك يا هاشم 😂قال لي لا ما كدا بس البت دي مجنون بتخليك تطلع عن طورك و تعمل العجب 😅جاتني امي و قالت لي اعملي لينا شاي،و جيبيهو قلت ليها اسي دا الجابو شنو ياخ، قالت لي بلا قلة ادب معاك اعمليهو سرعة و جيبيهو، قلت اتأففت و اتزاهجت اثناء ما بعمل الشاي اتذكرت لمن قرب يضربني بعربيتو و لمن جا و كورك فيني في الشارع و لمن وصفني بالحوامة، اتمليت من الغضب كبيت تلاته كبابي و بالصدفة عيني وقعت على شطه حمرة، الأفكار الجهنمية بدأت بتطاقش في راسي، اها شلت شطه حمرة مسحونة ناعمة و كبيتها في الكباية و لخبطها كويس 😈و وديتها ليهم هاشم قال لحسان، شفت هيام دي الشاي بتاعها حلو شديد محظوظ لأنك ح تشرب شاي من تحت يديها،حسان قال ليهو نشوف 😏 عاينت لهاشم مسافة و ارتسمت بسمة على شفاهي يا ربي هاشم دا مالو تعامل معاي بقى كدا للحظة حسيت بالذنب لأني ح احرجو قدام صحبو لكن قلت ما مشكلة اصلا هو يستاهل 😈ختيت الشاي و قلت لأمي دا حقك سكرو خفيف و مديت لهاشم كباية و آخر كباية اصلا كانت جنب حسان، اها بدوا يتونسو و خلو الشاي و انا قربت اقطع اصابعي من الإمتظار، قلت لهاشم اشربوا الشاي لأنو ح يبرد قال لي كويس قال لحسان اشرب يا زول، حسان شال الكباية و اخد ليهو شفطة ما قدر بعديها يقول سين ولا جيم طوالي عاين لي و انا ماسكة الضحكة بالجلالة، هاشم قال ليهو مالك يا زول الشاي دا ما عجبك ولا شنو، قال ليهو لا لا عجبني و الله. 😅بقى يشيل ليهو جقمة و يحمر لي كنت متوقعاهو في اي لحظة يخت الكباية و ما يقدر يكملها، لكن فاجئني لمن خلص الكباية كلها 😱بعديها قال لينا بستأذن بعد دا امي قالت ليهو بدري يا ولدي، قال ليها بدري من عمرك يا امي بس مستعجل، قالت ليهو سمح بس ما تنقطع مننا و كررها تاني، قال ليها حاضر، كان بطلع الكلام من خشمو بالجلالة و هو من جوا النار مولعة فيهو، الشطة كانت حارة شديد و انا شكلي كترتها 😂لمن جا ماشي حمر لي سمح و طلع مع هاشم، المسكين لمن عيونو بقن حمر 💃
يتبع.......
