آخر كلام قالو لي انتي ما بتنفعي معاي يا هيام انتي ما الزوجة الإتمنيتها انا امي الإختارتك ما انا عشان كدا انتي طالق يا هيام ،صدى الكلمة دي اتردد كتير في سمعي ،بعد العملتو ليهو دا كلو يطلقني بالبساطة دي !و من غير اي سبب مقنع،سكت و دموعي هي الإتكلمت 😭قلت ليهو بالبساطة دي يا احمد ! انا عملت شنو عشان تجازيني كدا قصرت معاك في شنو ،وقفت معاك و مع امك في اصعب الظروف و لسه كنت مستعدة اقدم ليكم اكتر دا جزاي في الآخر ! قال لي ما عايز اكتر معاك الكلام و دا قراري و ما ح اتنازل عنو و اتحرك من جنبي على الغرفة و هو طالع كدا اتفاجأ بأمي واقفة في السلم و شكلها سمعتنا 💔قالت ليهو يخسي عليك يا احمد ما كنت قايلاك ناكر للجميل كدا ،بتي دي قصرت معاك في شنو عشان تطلقها ،استحملت تصرفاتك الطفولية دي كلها بدون كلل و ملل ما حصل شكت من تصرفاتك ديك و لولاها كنت لحدي اللحظة دي بتتصرف زي الأطفال هي التابعت معاك لحدي ما بقيت ما انت عليهو هسي و في النهاية تطلقها بكل بساطة ؟! يعنى عشان ما عندها اب و اخ يقيفوا معاها ؟! لكن امها موجودة و مستحيل اخلى بتي تتذل و تتهان و تضحى اكتر من كدا جهز القسيمة و نحنا بنجهز شنطنا و الليلة قبل بكرا نحنا طالعين من البيت دا و اوعك تاني تجي و تقول عايز ترجعها من اليوم انقطع اي رابط كان بجمعكم من اليوم لا بنعرفك لا بتعرفنا 😤بكل برود قال ليها تمام بجهز القسيمة و بديكم ليها و طلع فوق و خلانا اي وحده تعاين للتانية دي كانت اول مرة اكره فيها احمد للدرجة دي بالجد حارة انك تقدم و تضحي عشان زول و في النهاية ما يقدر العملتو ليهو دا كلو و يتناساهو ببساطة 💔امي جاتني و ما سألتني عن سبب الطلاق قالت لي سرعة امشي ستفي شنطنا و تعالي انا منتظراك هنا و ما تشيلي اي حاجة جابوها ليك هم ،قلت ليها كويس لأني خلاص استحملت بما فيه الكفاية و الفيني كملت مع اني ما عارفة ح نمشي وين ولا لمنو ،منو تاني الح يتحمل وجودنا معاهو ،فعلا بيت الأبو هو الملاذ الأول و الأخير و بدون اب أو أخ الدنيا ح تصفعك من كل الإتجاهات و لمن تنهض تاني من جدد و تقيف على حيلك بتعيد الكرة و تدفشك من جدد و لحظتها بس حيكون عندك خيارين يا اما تكون مستلقى محل ما دفشتك الحياة أو تنهض تاني و تتحمل عدة عترات و دفشات لحدي ما تصل لمبتغاك 💓دخلت الغرفة و كنت متوقعة إني ألقى احمد هناك بس ما لقيتو لميت حاجاتي و مشيت غرفت امي و لميت حاجاتها ،لمن جاي نازلة شفت غرفة عمتي محاسن بدون ما احس لقيت نفسي متجه عليها ،مشيت بستها في راسها و قلت ليها كنت متمنيه إني اكون جنبك لمن تبقى كويسه و ترجعي تقيفي من جديد بس الغدر عندو كلمة و نحنا لازم نرضى بالمكتوب ما كان ودي افارقك بالطريقة دي بس ما باليد حيلة انا ماشه يا عمتي محاسن ح نخلي ليكم البيت دا لأننا تعبنا من التضحيات و النجازفات تعبنا من الإهانات و عدم التقدير لينا و احترامنا ،سكت لمن شفت دموعها جاريه كأنها بتقول لي ما تمشي تخليني زي ما مشوا الباقين انا محتاجة ليك ،نظراتها دي خلتني ابكي معاها حضنتها و قلت ليها ما معروف تاني نتلاقى متين أو وين انتوا ح تسافروا و نحنا ما معروف نمشي وين الحاجة الوحيدة البتمناها لو كان في العمر بقيه اني اشوفك بكامل عافيتك 💓استودعتك الله يا عمتي محاسن و طلعت منها و انا دموعي دي عشرة عشرة ما قادرة اتحكم فيها ،لقيت امي واقفة لي جنب الباب طلعنا و وقفنا في الشارع ،قلت ليها ح نمشي وين يا امي و لمنو ؟قالت لي اصبري دقيقة بس ،فعلا وقفنا و بعد شويه جاتنا عربية سوداء و وقفت لينا ما كنت منتبه معاهم امي مشت ليهو و دخلت الحاجات و نادتني لمن قربت و دققت في الزول السايق العربية لقيتو دا حسان انخلعت طبعا و رفضت اركب سقت امي على بالجنبة كدا و قلت ليها حسان !تاني حسان يا امي ما كفاية العملوا لينا زمان عايزانا نقيف ليهو في حلقو تاني و نحملو مسؤوليتنا و اصلا الجابو شنو ؟قالت لي انا الإتصلت بيهو عشان يجينا ،قلت ليها ليه بس كدا يا امي متين ح نوقف اعتماد على الناس ،لمتين الناس دي ح تتحملنا ؟لمتين حنكون عبء و مسؤولية على اكتاف الناس ؟جاني صوت حسان و هو بقول لي ما حصل مرة فكرت فيكم بالطريقة دي ما حصل مرة اعتبرتكم عبء في اكتافي ،صدقوني انا بعتبركم اسرتي التانيه و مستحيل استغنى عنكم في ظروف زي دي ،عاينت ليو بإستنكار كأنو ما عارف نفسو انو قبل كدا اتخلى عني و استغنى ،امي قالت ليهو عارفاك يا حسان ما بتفكر دا و دا الخلاني اتصل عليك نحنا زاتنا ما عندنا زول غيرك بعد عبد الرحيم و هاشم انت بقيت اسرة لينا ،حاولت بشتى الطرق اني امنع امي من الركوب معاهو بس هي كانت مصرة شديد و ساقتني غصب معاها ،ركبت ورا و امي و حسان ركبوا قدام ،طول الطريق امي كانت بتحكي ليهو عن العملو احمد زعلت منها شديد يعنى كان ضروري تحكي ليهو اي حاجة ،حسيت نفسي ضعيفة شديد و مذلولة طلعت من بيت واحد ما احترمني و نكر جمايلي كلها و اتخلى عني بكل بساطة عشان ألقى نفسي مع واحد اتخلى عني و كسرني و عشمني كأني كورة و اي زول بشوتها براهو 💔امي بتحكي لحسان و هو بعاين لي بالمرآية قلت اصلي ما ح ابكي و اظهر ليهو ضعفي ،كنت في صراع مع دموعي ،بمسحها سرعة اول ما تظهر و بحاول اتماسك نفسي عشان ما انهار من البكي 💔وصلنا شقة كدا و نزلنا فيها قال لينا ح تسكنوا هنا ،دخلنا جوا و لقيناها مفروشة و جاهزة ختينا حاجاتنا و قعدنا نفكر بكل الحاجات المرينا بيها في حياتنا ،حسان قال لينا ماشي اجيب ليكم حاجة تاكلوها و جاي ،بعد ما طلع امي قالت لي ما تفكري كتير اصلا احمد ما بستاهلك و بركة الإنحليتي منو ،سكتت مسافة و تاني قالت لي عايزا اسألك سؤال و ما تخجلي مني ،احمد دخل بيك ؟انخلعت من سؤالها و هزيت ليها راسي بمعنى لا قالت لي معناها ما عليك عدة و بركة الما حيكون في شي رابطك بيهو ،من ناحية تاني حسان اتصل على احمد و اتشاكل معاهو و قال ليهو عملت ليك شنو عشان تطلقها ،احمد قال ليها انت ما عندك شغلة بي انا ما مرتاح معاها ما عايزها في حياتي ،يعنى اتحملها غصبا عني انا خلاص صفحتها دي طويتها و بكرا ح تصلها ورقتها و في نفس اليوم ح اسافر مع امي و تاني ما تتصلوا علي و خلوني في حالي و قفل التلفون ،حسان زعل شديد من تصرف احمد 😤بعد اسبوعين كدا قلت لأمي انا عايزا اشتغل لمتين حنخلي حسان يصرف علينا من بكرا ح افتش لي شغل و لو شهادتي ما نفعت ح اشتغل خدامة أو اي شغل غيرها بس المهم حسان ما يصرف علينا ،إلتفت وراي لقيت حسان واقف و عروقو كانت بارزة من الغضب ،امي حبت تلطف الجو و قالت ليهو الليلة عملت ليك ملاح الروب البتحبو ،قال ليها مستعجل والله خت الأكياس سرعة و طلع ،امي قالت لي شفتك لسانك الطويل دا هسي الولد زعل بسببك،في اليوم التالي ،شلت شهادتي و مشيت فتشت شغل لقيت شركة و قالوا لي ح نديك خبر بعد اسبوع قلت احسن اشوف لي شغل في الأسبوع دا ،لقيت مرة كبيرة كدا و ست شاي ،قعدت معاها و قلت ليها ممكن تشغليني معاك و حكيت ليها بظروفي قالت لي طيب تعالي من بكرا قلت ليها ممكن ابدا من الليلة ؟قالت لي البريحك ،هي بتعمل الشاي و انا بوديهو للناس كان في شلة بتاعت أولاد قالت لي ودي ليهم الشاي مشيت ختيتوا ليهم و قعدوا يعاينوا لي و يغمزوا لبعض ،لمن زحيت يدي من الصينية في واحد مسكها لي قال لي ادفع ليك كم عشان تجي معاي ؟حاولت افك يدي منو بس قبضتو كانت قوية المشكلة إنو ماف واحد من الموجودين حاول يدخل او يتكلم معاهم 💔كأنو ست الشاي دي ما بشر ما عندها كرامة و مشاعر و احاسيس ،كأنو شغلها دا عيب او حاجة حرام ،اثناء ما انا بحاول اتفك منو جا حسان و معاهو اصحابو و وقع ليك فيهم ضرب خلى اصحاب يتموا الباقي و جراني غصب من يدي ،دخلني العربية و أمنها ،ضرب الدركسون و قال لي بغضب انتي مشكلتك شنو بالضبط ،يعنى عاجباك المعاكسات و المشاغلات البتحصل ليك ؟قلت ليهو انت ما عندك شغلة بي و ما مسؤول مني و نحنا ما عايزين منك اي حاجة 😤 قال لي بالله اطلعي من دور البت المظلومة و البريئة عاملة نفسك ما عايزا حاجة من زول و ما محتاجة قروش زول و انتي نفسك الكسرتيني و غدرتيني عشان القروش،كلامو زعلني شديد و زاد النار الجواي ،قلت ليهو انت اهبل ولا بتتهابل محسسني كأنك فاقد الذاكرة ،انت الإتخليت عني و مشيت خليتني في عز حوجتي ليك اتصلت عليك كتير بس ما كنت بترد و برضو كان عندي امل فيك لحدي يوم عقدي رسلت ليك رسالة و حكيت ليك الحاصل و انو اعمامي جبروني على العرس دا كنت متأملة فيك و مفتكرة انك ح تعمل حاجة بس للآسف خذلتني شديد قريت الرسالة و ما كلفت نفسك ترد عليها 💔قال لي بخلعة رسالة شنو يا هيام انا ما شفت اي رسالة في تلفوني و انا اصلا كنت في غيبوبة ،بقينا الإتنين ساكتين و متحيرين ،وصلني البيت و قال لي ما اشوفك طلعتي تاني للشغل دا ،حسان كان بفكر في الحصل و طوالي اتصل على امو بعد ما سلم عليها قال لي لمن كنت في غيبوبة تلفوني كان مع منو ؟قالت ليهو معاي لكن ليه السؤال دا ؟قال ليها جات فيهو رسالة ؟قالت ليهو اي رسايل كتيرة من اصحابك و معارفنا ،قال ليها قريتيهم كلهم و رديتي عليهم ؟قالت ليهو بتوتر رديت على جزو منهم قال ليها انتي عارفني بقصد الرسالة الما وريتيني بيها ،ليه عملتي كدا يا امي و دمرتي حياتي ،ليه ما كلفتي نفسك ترجعي و تستفسري عن الحاصل و انتي عارفة اني قبل كدا كلمتك اني عايزا اعرسك هيام معقولة ما شكيتي إنو الرسالة دي تكون منها و حذفتيها كمان ،قالت ليهو عرفت إنو دي هي زاتا بعد ما رسلت لي الرسالة رجعت اتصلت عليها عشان اكلمها بحالتك بس تلفونها كان مغلق بقيت كل يوم بتصل عليها على امل إنها ترد بس تلفونها كان دايما مغلق ،في اليوم الفتحت فيهو و بقيت كويس انا حذفت الرسايل و سجل المكالمات ،قلت بتكون عرست زمان و نستك و خلاص ،عشان كدا ما كلمتك بالموضوع دا 💔قال ليها كانت كاتبة شنو في الرسالة ؟ورتو كل الكتبتو ليهو هيام ،حسان كان عايز يطير من الفرح اخيرا حرف إنو هيام بتحبو 😍قال ليها انا عايز اعرسها قالت ليهو كيف لكن مش هي عرست ؟قال ليها بعدين بشرح ليك الموضوع كلمي ابوي و تعالوا السودان ،قفل منها و كان مبسوط شديد ،مشى لناس هيام و قعد يتونس مع حنان أم هيام حنان قالت لي هيام اعملي لينا شاي ،مشت تعمل ليهم الشاي و كانت متحيرة لمن شافت حسان مبسوط شديد حتى عيونو لمعت من شدة الفرح حتى أمها لاحظت الحاجة دي قالت ليهو شايفاك مبسوط اليوم عساك دايما كدا فرحنا معاك ،قال ليها خلي هيام تجي عشان كلنا نتشارك الفرحة و اخيرا جات هيام و معاها الشاي قعدت و قالت ليهو اها جيت !قال ليهم والله انا بعد دا عايز اكمل نص ديني و قررت إني اعرس ،فجأة كدا الكباية وقعت من يد هيام و فجأة كدا الدنيا بقت ليها سوداء و حست إنها خسرت حسان تاني 💔قالت ليهو بحس مبحوح و هي بتحاول تخفى دموعها ألف مبروك و ان شاء الله بيت مال و عيال و قامت على حيلها و كانت ماشه بس هو وقفها و قال ليها ما عايزا تعرفي العروس منو ،قالت ليهو اكيد ما ح اعرفها ما مهم هي منو المهم إنك عاوزها 💔قال ليها بالعكس بتعرفيها حق المعرفة ،طوالي خطر في بالها صحبها شيماء ،طردت الفكرة دي و قالت لا شيماء ما بتعمل كدا بس دي منو دي ،ما مهم هي منو المهم إني خسرت للمرة الألف كل مرة بتقرب فيها السعادة مني بترجع خطوة و بتتلاشى دا كلو كان بينها و بين نفسها قطع تفكيرها صوت حسان و هو بقول ليها ما تفكري كتير لأنك انتي العروس 😂قالت ليهو شنو كيف يعنى و منو القال ليك إني موافقة ،قال ليها امك موافقة و انا حكيت ليها الحصل كلو و انتي زاتك اقعدي عشان افهمك الحصل ✨💛✨💛
بعد شهر
كن على يقين بأن الله لن ينساك و عندما يجور عليك البشر ابتعد عنهم ولا تجادلهم فقط انظر لما سيفعله الله بهم ✨
بعد كل المعاناة العانتها هيام ،دقت السعادة بابها من جديد و هي اليوم في الكوفير عشان تستعد لأمي يوم في حياتها ✨و اخيرا اتحقق الحلم الطال انتظار و اخيرا رجعت للقلب دقاتو و رجع ينبض من جديد ،كانت هيام فرحانة شديد و هي ماسكة التلفون و بتتكلم مع حسان بعد ما خلصت وصلتها رسالة من رقم غريب كان محتواها :
سعادتك دي انا حاسي بيها اضعاف مضاعفة و اخيرا هيام الصبرت و ثابرت و ضحت و قدمت ح تنال جائزة صبرها و تحملها ح تنال السند الح يعوضها عن الفات ،عن تنال الأمنية الطال انتظارها صدقيني انا فرحان ليك شديد يا هيام ،عارفك انك زعلانة مني و يمكن تكرهيني بس انا عملت كدا عشان انتي تشوفي اليوم دا و مع الإنسان البتستاهليهو رغم حبك لحسان ما حصل مرة اتجاوزتي حدودك او فضلتيهو علي حتى بعد ما لاقيتيهو ما حاولتي تتقربي منو أو تحاولي ترجعي ليهو ما عشان هو جرحك و خذلك لا عشان انتي محترمة الرابط البينا كنت مستعدة تضحي بسعادتك عشان و عشان امي و زي ما انتي بتقدري تقدمي سعادة الغير على سعادتك انا كمان بقدر اعمل كدا ،العملتيهو لي ما هين يا هيام و اعتبري دي مكافئة أو رد جميل لوقفتك معاي ✨💛
ما عايز اطيل عليك بتمنى ليك حياة زوجية سعيدة و ان شاء الله ما تشوفي شر ،ما تخافي امي كويسه و ما تتصلي بي عارفك حنينة و بتريدي امي 😂خلي بالك كلو مع اليوم دا ،دا يومك فأفرح و انا و امي ح ندسك في دعواتنا 💛✨من المخلص دوما "احمد"
هيام قرت الرسالة دي و عيونها بتدمع ،مشاعرها كانت مبعثرة بين فرح و امتنان و شوق ✨💛
و بكدا انطوت صفحة من صفحات حياة هيام عشان تفتح صفحة جديدة في مكان جديد و ناس جديدة ✨💛
النهاية
عايزاكم كلكم تدعوا لي اجيب نسبة كبيرة في امتحان الشهادة 😭يمكن تستجاب دعوات وحده منكم 😭🤲
