احيانا كثيرة نعلم اننا بصدد مواجهة امر متقبل، و اننا في نهاية المطاف و اننا سنتلاشى في آخر الطريق لذا نعمل كل ما بوسعنا لملاقاة ذلك اليوم و بالرغم من استعدادنا للمواجهة إلا اننا ننهار و ننطفىء في بداية النهاية 💔💓
✨✨✨✨✨✨✨✨✨✨
لحدي الصباح قلبي كان مقبوض اول ما صحيت مشيت طليت على ناس البيت كلهم و اتفقدهم ،بالرغم من اني شفتهم بصحة و عافية بس لسه ما مرتاحة ،قاعدين يفطروا قدامي و كلنا في صفرة وحده دي اول مرة نجتمع كلنا بدون ما يكون في زول ناقص إلا يقين الما معانا 💔امي شافتني سرحانه بعيد ،قالت لي في شنو يا بتي من قبيل سرحانه بعيد و ما دخلتي حاجة في خشمك،عمتي محاسن قالت ليها اي انا زاتي لاحظتي ليها في شنو يا هيام بتي ؟في حاجة مضايقاك ؟قلت ليهم لا ماف شي ،الساعة 1:36 ظهرا بالضبط الجرس رنة و زادت ضربات قلبي مع صوت الجرس ما عارفة ليه حسيت الزمن وقف في اللحظة دي بقيت بين اني عايزا اعرف منو الجاي و بين اني خايفة من الجاي و ما عايزاهو يجي ،الجرس دا ضرب لمسافة طويلة لحدي ما جا واحد من الخدم و فتح الباب و كانت المفاجأة كمية من الشرطة داخلينا علينا كلنا وقفنا على حيلنا مصدومين و في بالنا ألف سؤال 💔بقى في هدوء حاصل و كل واحد فينا منتظر التاني يفتح خشمو و يتكلم ،كسر الصمت دا واحد من الضباط لمن قال للشرطة الجنبو ألقى القبض عليهم كلهم اتحركوا ناحية حازم و عمي موسى ،ياداب الكلام دا دخل لينا جوا عقولنا و استوعبناهو،عمتي محاسن قالت ليهم عملوا شنو عشان تقبضوهم و بدت تبكي ،بقت هي تبكي من جهة و عمي موسى الرشيد يتشاكل مع الضابط من جهة و حازم الكان بقول ما تخليهم يقبضوني يا امي انا ما عملت حاجة ،اختلطت علي الأصوات و اتعالت كنت حاسه الدنيا دي شغالة تلف و تلف و انا واقفة ،رجلينا اتخشبت و لساني بقى ثقيل ،قبل ما استوعب الصدمة دي كويس جات عربية اسعاف و نزلوا منها مجموعة من الناس شايلين معاهم جثة عربية الإسعاف دي خلت كل ناس الأحياء الجنبنا يتجمهروا في بيتنا عشان يشوفوا الحصل شنو ،جوا داخلين و ختوا لينا الجثة في النص كلنا بقينا نرجف من الخوف ،امي اتقدمت و مشت ناحية الجثة و كشفت وشها كلنا اتخلعنا لمن شفنا يقين ميتة الأمور جاطت و اختلطت علينا دا شنو البحصل دا 💔صرخت صرخة وحده و جيت واقعة من طولي،نسوان الحي لحقونا رفعوني في اقرب كرسي و بقوا يحاولوا يصحوني،امي و عمتي محاسن اعصابهم انهارت بقن بس يستغفرن و يسبحن و يتحسبنن ،ما تمت دقايق إلا و عمي حسن و عمتي غادة جوا داخلين لمن شافوا بتهم في الحالة دي انصدموا شديد و حالتهم بقت صعبة ،عمتي غادة مسكت في بتها و بدت تصرخ و تكورك بأعلى صوت شوفت بتها كدا جننتها عديل ،عمي حسن بعد ما شد حيلوا سأل الضابط عن الحصل لبتو ،الضابط حكى لينا القصة كلها من الألف للياء ،كلنا استنكرنا الفعل الشنيع دا و عيونا بقت موجهة على حازم و عمي موسى ،معقولة في زول بعمل كدا معقولة البشرية ديل كانوا عايشين معانا و قاعدين وسطنا في زول بعمل كدا في مرتو قتلها بكل دم بارد و شال اعضائها 💔عمي حسن جرا على حازم و وقع ليك فيهو ضرب ما خلى ليهو حتة سليمة و الشرطة ادخلت و بقت تحجزو منو ،قال ليهو والله العظيم ما اخليك و حق بتي ما بخليهو ما ح ارتاح إلا لمن اشوف مشنوق ما ح ارتاح إلا لمن اجي احضر جنازتك ما ح ارتاح إلا لمن اشوف مدفون قدامي و تكون تحت التراب و تاني جرا عليهو بس المرة دي الناس مسكتو و ساقوا عمي موسى و حازم ،بقينا كلنا ساكتين ، مصدومين و نحنا بنعاين لعمي موسى و حازم و ما قادرين نقول كلمة نفس النقالة الجابوا بيها جنازة يقين رفعوا بيها عمتي غادة و عمتي محاسن ،عمي حسن كان بستغفر بس و دموعو دي حلفت ما تقيف بس كانت بتصبر عشان مرتو 💔حقيقة اليوم دا كان من اسوأ الأيام المرت بي ،الناس داخلة و مارقة تعزي فينا و نحنا لسه مستنكرين الحصل دا لحدي اليوم السابع و نحنا لسه مصدومين عمتي محاسن جبناها من المستشفى بس عمتي غادة حالتها صعبة و لسه مرقدة هناك انا و امي بنمشي ليها كل يوم مرة و بنتناوب في المبيت اما عم حسن فكان دايما معاها في المستشفى قدر ما حنسناهو يرجع البيت يرتاح رفض ،اهلها كانوا بزوروها مرات مرات ، لكن ما حصل باتوا معاها بحكم إنهم ساكنين بعيد و عندهم شفع ،بس دا ما سبب يخليهم ما يبيتوا معاها في وضع زي دا مفروض اقرب الأقربين يكونوا معاك ،بس للآسف ماف زول معاها غيرنا 💔اول ما فتحت عيونها لقت عمي حسن قاعد جنبها قالت ليهو عايزا اشوف حنان و هيام عمي حسن قال ليها ارتاحي هسي بعدين بدخلهم ليك قالت ليهو لا لا عايزا اشوفهم هسي دي 😭عمي جا نادانا و قال لينا غادة قالت عايزاكم دخلنا ليها امي قالت ليها بقيتي كيف يا غادة ،ما ردت سكتت و اكتفت بالبكاء بس المرة دي بقت شديد و ما قدرت تسكت حالتها تقطع القلب ،قلت ليها كفاية يا عمتو دا قضاء و قدر عارفاها صعبة عليك بس كفاية ما تعملي في روحك كدا الله يرضى عليك ،حتى يقين لو كانت عايشه ما كان ح ترضى تشوفك كدا عشانها يا عمتو بطلي بكى 😭مسكت امي من يدها و قعدتها من جنبها قالت ليها اعفي لي و سامحيني يا حنان على كل حاجة سيئة عملتها ليكم ،امي قاطعتها و قالت ليها عافية عنك ما تشيلي هم نحنا اهل في النهاية ،بكت زيادة و قالت لأمي لو عرفتي العملتو ما ح تقولي كلامك دا ،اوعديني قبل ما اقول ليك انك ح تسامحيني امي قالت ليها والله مسامحاك يا غادة مسامحاك يا بت امي ،قالت ليها انا يا حنان انا الدمرت حياتك شوفتك انتي و عبد الرحيم مبسوطين كانت بتزعجني و بتشعل النار جواي ،غيرتي منك و حقدي و كراهيتي لعبد الرحيم خلتني اتبع الشيطان و اعمل ليكم عمل عشان ما تلدي تاني و عملت عمل يخليكم ما تتهنوا في حياتكم و عمل يخلي عبدالرحيم دايما تعبان و ما يفارق سريرو😭امي سكتت و سحبت يدها من يد غادة قالت لي و قامت على حيلها ،عمتي غادة بكت و قالت ليها اعفي لي يا حنان هسي ربنا عاقبني على العملتو ليكم حرمتك الوالدة و انا الخسرت بتي في النهاية العملتو كلو رجع فيني يا حنان الله بعاقبني على عمايلي العملتها ،استغفري لي يا حنان و ادعوا لبتي بالرحمة و المغفرة مع إني عارفاها صعبة عليك ،لكن متأكدة انو قلبك ابيض و كبير ادعوا لبتي يا حنان و هيام انا ما قادرة ادعي ليها لأني خجلانة من عمايلي حاسه ما عندي الحق ارفع يدي و اطلب من الله يرحم بتي حاسه نفسي نجثة و مغضوبي علي 😭امي طلعت و انا طلعت وراها ،عمي حسن كان قاعد معانا في الغرفة بعد ما سمع كلام مرتو قعد و مسك راسو قال ليها ليه عملتي كدا يا غادة حسبي الله و نعم الوكيل فيك ،حسبي الله و نعم الوكيل فيك ،رجعنا البيت لقيت احمد قاعد مع امو و بحاول يأكلها و هي رافضة إنها تاكل ،شلت منو الصحن و قعدت جنبها قلت ليها عشاني يا عمتي محاسن اكلي ما تعملي كدا في نفسك طيب اذا ما عشان ،فعشان احمد ولدك ،قالت ما عندي نفس يا هيام كيف اقدر آكل و اشرب و حازم و ابوهو في السجن و بكرا عندهم جلسة محاكمة و احتمال يتم اعدامهم ،انا عملت شنو في الدنيا دي عشان اتعاقب كدا يوم واحد خسرني راجلي و ولدي ،بس هم مظلومين يا هيام انا متأكدة لا موسى لا حازم بعملوا كدا أكيد في زول خطط يوقعهم الوقعة دي 😭عمتي محاسن كانت ما راضية تصدق الحاجة دي رغم الأدلة الشفناها و العرضوها في الجلسات الفاتت،بعد شويه بقتت تتكلم بسرعة و بترجف و بتقول حازم و موسى بريئين والله بريئين يا هيام انقذي ولدي و راجلي ،قبل ما يقتلوهم و اغمى عليها طوالي ،فجأة كدا الدنيا ضاقت بينا و البيت الكان وسيع و هواهو عليل بقى ضيق و جو معكر 💔جا يوم الجلسة الآخيرة لحازم لأنو اي واحد فيهم ح يتم محاكمتو براهو ،قلت لعمتي محاسن ما تمشي لكن هي اصرت إنها تمشي ،وصلنا المحكمة و اي زول قعد في مكانو ،بعد شويه جابوا حازم ،عمتي محاسن أول ما شافتو قعدت تبكي و ما قدرت إلا طلعناها برا و تاني جبناها كانت كل مرة بتقطع كلام المحاميين و بتقول ليهم ولدي ما كتل زول ،لحدي ما القاضي زهج منها و قال لينا طلعوها برا ،بدت المحاكمة ،قام محامى الدفاع و قدم العندو و بعديهو طوالي المحامي بتاع ناس عمي حسن ،دي كانت اطول جلسة ،شعوري الحاسة بيهو شعور ما بتوصف ما عارفة ادعي على حازم و لا ادعي ليهو ،ادعي ليهو لأنو اخوي راجلي و ولد عمتي محاسن البشوفها كل يوم بتموت قدامي ولا أدعي عليهو لأنو قتل ليهو زول و ما اي زول كتل بتي عمتي يا جماعة 😭كتل بت عم حسن الراجل الطيبان الحنين الوقف معانا لمن اعمامي اتخلوا عننا ،اعمل شنو انا يا جماعة اقول شنو ،اتمنيت في اللحظة دي اغمض عيوني و لمن افتحها ألقى نفسي في حته تانيه في مكان اكون ناسيه فيهو الحصل دا كلو ما عايزا اتذكر اي حاجة غير اسمي ،حتى اسمي ما عايزا اتذكرو المهم انا ما اكون خالية الذهن من المريت بيهو دا كلو 😭😭😭💔
كنت سرحانة بعيد و ما جايبه خبر للمحاكمة ما إنتبهت إلا لمن القاضي ضرب الطربيزة و كسر القلم ياداب رجعتي لعالمي البائس طيب الحصل شنو ،حكمو عليهو بشنو ؟
يتبع...........
