قلت ليهو كيف يعنى ؟طيب زعلان من منو ؟قال لي زعلان من نفسي ،قلت ليهو و ليه تزعل منها انت ما عملت حاجة ،قال لي و دي المشكلة انا ما عملت الحاجة الكان مفروض اعملها و طلع زهجان من الغرفة بدون ما افهم منو شي ،رجعت المطبخ و لقيت امي هناك بتعمل في الأكل قلت ليها ارتاح انا بكمل الباقي ،قعدت و بقت تعاين لي ساي قالت لي هيام و سكتت مسافة إلتفت عليها و قلت ليهو ايوا يا امي ،قالت لي انتوا و احمد في بيناتكم مشاكل ؟قلت ليها بتوتر لا ماف كلام زي دا ،قالت لي طيب ما عايزين تجيبوا ليكم وليدات بعد دا ؟حسيت كأنو في زول ضربني كف موضوع زي دا كان رايح من بالي خالص عمري ما فكرت في حاجة زي دي ،قالت لي في شنو يا هيام ؟قلت ليها ماف حاجة بس حالا ما بنفكر في الموضوع دا ،قلت لي غيتو جيل الزمن دا ما بحب المسؤولية دي خالص ،كدي اديني العصير داك اوديهو لمحاسن قلت ليها ارتاح يا امي انا بوديهو ليها ،قالت لي جيبيهو ساي ماشه اونسها حبه عشان ما تحس نفسها وحيدة ،اديتها العصير و مشت و بديت افكر في الكلام القالتو لي ،ما قادرة اتقبل الفكرة دي عارفة سببي ما ح يكون مقنع لأمي بس بالنسبة لي مقنع شديد ،يعنى احمد دا انا كنت بعاملو زي ولدي كان زي الشافع و انا ليهو زي الأم كيف هسي...لا لا ما قادرة حتى افكر في الحاجة دي مستعدة اخدمو هو و امو العمر كلو بس الموضوع دا يكون بعيد عننا ،طيب بعدين ح اقول لأحمد شنو لأنو دا حق من حقوق هل سببي ممكن يكون مقنع بالنسبة ليهو ؟هل ممكن يتقبل فهمي من غير ما يفهمني غلط ؟راسي كان ح يطق من التفكير الكتير 😭المسا احمد رجع شلت كباية مويه و مشيت اوديها ليهو مديت ليهو الكباية ،عايز يمكسها مني كدا بالغلط ختى يدو في يدي ،في كسر من الثانية خطر في بالي كلام امي القبيل اتلبشت و بلا وعي وقعت الكباية و انكسرت،احمد استغرب من تصرفي ،قلت ليهو و انا بتمتم آسفة آسفة نضفت القزاز و جبت ليهو كباية تانية ختيتها في الطربيزة و رجعت المطبخ ،قلت دا شنو العملتو دا ؟و ليه اتلبشت كدا مع إنو كان الحاجة دي عادية و اي زول لمن يمد لزول حاجة يمكن اصابعهم تتلاقى ،قعدت في المطبخ فترة طويلة عشان احمد ينوم و اجي خاشه الغرفة جات الساعة 12قلت بكون نام لأنو جا متأخر مشيت على الغرفة قبل ما ادخل سمعتو بتكلم مع وحده و قال ليها انا زاتي مشتاق ليك والله ،قال ليها ما تخافي قريبا ح نكون سوا ،اظنها قالت ليهو و ح تعمل شنو لمرتك ؟قال ليها مرة شنو عليك الله انا اصلا ما بحبها و عارفة الوضع العرستها فيهو 💔وقفت دقيقتين عشان استوعب السمعتو ،هل فعلا دا احمد البقول كدا ،احمد الزول الفاهم و الواعي بقول كدا ،معقولة عشان زعلان مني يمشي يعمل كدا ،رجعت لورا و عملت حركة علشان يعرف إني جايه ،بسرعة قفل التلفون و عمل نفسو مشغول بالابتوب ،رقدت في السرير بدون ما اتكلم معاهو بحرف ،في اليوم التالي امي قالت لي الأدوية بتاعت محاسن دي خلصت و امبارح نسيت اكلم احمد امشي سرعة جيبيهم ليها من الصيدلية قلت ليها حاضر ،مشيت الصيدلية و غشيت السوبر ماركت اشتريت كم حاجة كدا من المأكولات اول ما طلعت من السوبر ماركت اصطدمت بزول ،قلت آسف..😳و طلعت دي شيماء الإتنين صرخنا في وقت واحد و اي وحده نادت التانية بإسمها حضنا بعض شديد تلاتة دقايق و نحنا لسه حاضنين بعض لمن بكينا من شدة الشوق قلت ليها طلعتي كعبة و ما بتسألي عن زول ،قالت لي ما كدا والله بس كنت مسافرة برا البلد امي كانت عيانة و كلنا سافرنا معاها للعلاج و انقطعت اخبارك ،عزمتها في مطعم قعدنا سوا و اي وحده بدت تحكي للتانية عن المرت بيهو ،شيماء بكت شديد لمن عرفت بوفاة يقين قالت لي مع إنها كانت كعبة شديد بس ما عجبتني موتتها دي ربنا يرحمها و يغفر ليها 😭قلت ليها خلينا نقفل السيرة دي و قول لي اها لسه ما خطبوك ولا نضموا فيك ،قالت لي عشان عرستي عايزا تتنمري فيني ،ما تخافي ح ينضموا فيني قريبا ،قلت ليها منو تعيس الحظ دا ،قالت لي لسه ماف حاجة واضحة لمن ينضموا فيني ح اعرفك عليهو 😂قالت لي ما قلت ليك امبارح لقيت حسان في بيت البكى ،قلت ليها عارفة و شفتو هناك ،قالت لي ليه بتتكلمي ببرود كدا كأنو حسان ما بيعنى ليك شي ،قلت ليها فعلا ما بيعنى لي شي ،اولا انا مرة متزوجة و ثاني هو اتخلى عني في اللحظات المصيرية و حصل الحصل و تاني ما ح يتغير شي ،قصتنا انتهت قبل ما تبدا انتهت في اليوم الرسلت ليهو الرسالة و ما عمل حاجة أو رد ،وصلنا لطرقين مختلفين و اي واحد لازم يسلك طريقوا و يشوف مصيروا ،قالت لي فعلا كلامك صاح حسان غدرك و خذلك و كسرك 💔بعد ما خلصنا قلت ليها ارح اوصلك معاي قالت لي عربيتي معاي ،قلت ليها اششي و اطورنا ،قالت لي أكيد 😎ودعنا بعض شلنا ارقام بعض ،ركبت العربية و قلت للسواق يتحرك اثناء ما نحنا ماشين كدا شفت احمد واقف ليهو مع بت و كان مادي ليها ورود حمر ،كل يوم انا بتفاجأ بأحمد دا ما لاقيه اي مبرر لتصرفاتو دي الحاجات دي ما بتشبهو والله يعنى هو ليه بعمل كدا انا ما فاهمة ،رجعت البيت و انا سرحانة ساي ،مشيت الغرفة و قعدت في السرير فكرت لمن مليت فتحت الشاشة و قلبت بين القنوات ما لقيت حاجة ممكن احضرها جبت قناة و خليتها فاتحة كنت ماشه كدا سمعت المذيعة قالت موضوع حلقتنا اليوم الغيرة الزوجية ،ما عارفة ليه بس وقفت عشان اسمع كلامها،كانت معاها مستشارة في العلاقات الزوجية و اخصائية علم نفس و قعدوا يتناقشوا في الموضوع دا و قالوا الغيرة دليل على الحب و احيانا دليل على حب التملك ،يعنى الوحدة بتكون هاملة زوجها و ما شغالة بيهو و لمن تشوفو مع غيرها بتنزعج ،اتذكرت قبيل لمن شفت احمد و البت مع بعض بس الغريبة اني ما انزعجت خالص كل تفكيري كان ليه احمد اتغير كدا و بس ،معناها ما عندي حب تملك ،طيب الحاجة التانية "الغيرة دليل على الحب ؟"طيب انا ليه ما حسيت بغيرة لمن سمعتو بتكلم مع غيري و لمن شفتو واقف مع غيري ؟زي ما اتوقعت انا ما بحب احمد كونو زوج بحبو زي صديق او اخ أو طفل او اي شي تاني بس متأكدة إني ما بحبو زي حب الأزواج لبعضهم 💔بس كدا انا ح اظلمو كتير هو ذنبو شنو اذا انا ما قادرة اتقبل الفكرة دي ذنبو شنو في الأفكار و الهواجس البتنخلق كل يوم في راسي 💔مروا يومين و احمد تصرفاتو بقت لا تطاق حتى إنو بقى يتكلم مع البنات قدامي و يتغزل فيهم قلت لازم اخد حد للبحصل دا كلو لأنو ما صاح يعمل كدا و هو متزوج زي ما انا رميت كل شي وراي و احترمت رابطة الزواج دي هو لازم يعمل كدا بالإضافة لإنو اصلا التصرفات و السلوكيات ما حلوة في حقو كل يوم قدروا بينزل من عيني ،لقيتو طالع قلت ليهو عايزا اتكلم معاك ضروري قال لي ما عندي زمن قلت ليهو ما ح آخد كتير من زمنك ،قال لي سرعة قولي العندك ،قلت ليهو مشكلتك شنو ،ليه بتتصرف كدا ،دي شنو تصرفات المراهقين دي انت راجل متزوج بتتكلم مع بنات ليه و كمان بتتغزل فيهم قدام مرتك بدون ما تخت لي اي اعتبار تصرفاتك دي كلها انا لحدي الآن ما قادرة ألقى ليها سبب مقنع ،هاج و كورك فيني قال انا حر انتي ما عندك شغلة بي و بدا يكورك و يداخل المواضيع في بعضها حسيت كان عايز ليهو فرصة عشان يخلق ليهو مشكلة و لقاها اول مرة يهيج بالطريقة كدا و اعذارو اقبح من ذنبو آخر كلام قالوا لي ....
يتبع........
