رجعت بيت ناس عمتي ،لقيت امي شغالة و عمتو غادة خالفة رجولها، قلت ليها عمتو غادة اي شغل في البيت دا انا جاهزة اشتغلو بس امي ما تهبش اي حاجة في البيت دا، قالت لي امك براها قالت عايزا تشتغل، سقت امي و مشيت الحواش البهناك، قلت ليها يمة عليك الله ما تتعبي نفسك و تشتغلي ليهم انا جاهزة اعمل ليهم اي حاجة، قالت لي و انتي زاتك ما قاعدة تتعبي؟ قايلاني ح اكون مرتاحة لمن اشوفك كدا ؟قلت ليها ما تشيلي همي انا بقدر، تعالي اقعدي عايزا اتونس معاك 😀زي الساعة 10كدا تلفوني رن شفت المتصل كان حسان، كنت عايزا امد التلفون لأمي عشان ترد هي بس لقيتها نايمة، رديت عليهو قلت ليهو آلو، قال لي هيام كيفك، قلت ليهو بخير الحمدلله، انت كيف؟ قال لي انا كويس الحمدلله، قال لي غريبة المرة دي رديتي انتي، قلت ليهو لأنو امي نايمة و ما حبيت اصحيها، سكت مسافة و بعديها قال لي ليه قبيل كنت مضايقة ؟قلت ليهو مسألة شخصية، قال لي يعنى ما غرتي عشان نور كانت معاي، قلت ليهو و اغير ليه مرتك انا ولا حبيبتك ولا خطيبتك؟ قال لي ديل كلهم ختي تحتهم خط 😉سكت و ما عرفت اقول شنو جوط لي افكاري، قال لي هيام متأكدة من انك ما عندك مشاعر اتجاهي، فاجأني بسؤالو ما كنت متوقعة يسألني السؤال دي، شتت افكاري ،حسيت لساني بقى تقيل بقيت ساكته، قال لي خلاص وصلتني الإجابة، بسرعة قلت ليهو لا ما صح، قال لي شنو الما صح قلت ليهو الإجابة الوصلتك، قال و هي شنو، قلت ياخ الحاجة الفهمتها من سكوتي ما صح، قال لي و هي شنو الفهمتها 😏غياظ كيف، قلت ليهو ح اقفل عايزا انوم و قبل ما يرد قفلت، و بقيت افكر في كلامو، معقول انا حبيتو لا لا مستحيل، و بقيت اطرد الأفكار دي من راسي، رقدت و بقيت اتقلب في السرير كل مرة اغمض فيها عيوني بتذكر نور و حسان لمن قبيل كانوا مع بعض و بحس بالضيق 😤مروا اسبوعين بالحالة دي و حسان كل يوم بتصل عشان يطمن علينا و يشوفنا اذا محتاجين حاجة ،حتى اذا نحنا كنا محتاجين حاجة مستحيل نطلب منو، يعنى بقى اليوم ما بعدي من غير اتصال منو،يوم من الأيام ما اتصل، امي قالت لي اتصلي شوفيهو، قلت ليها خليهو لبكرا هسي بكون مشغول، اها جا اليوم التاني و برضو ما اتصل، قلت اتصل عليهو مرة وحده بس رد ردة ما رد خلاص بكون احسن زاتو، اتصلت عليهو المرة الأولى و اداني مشغول، قلت اكيد بتكلم مع نور تاني اتصلت و برضو مشغول زعلت شديد من الحاجة دي 😤بعد نص ساعة اتصل علي ما رديت لمن كترة الإتصالات رديت عليهو، قال لي لقيت مكالمتين منك بزهج و ضيق قلت ليهو اي و شكلي اتصلت في وقت غير مناسب و قطعت ليك ونستك ، لكن انا اتصلت حبا فيك بس عشان امي هي القالت لي اتصل عليك 😤قال لي يعنى اذا امك ما قالت ليك اتصلي ما كنتي ح تتصلي؟ قلت ليهو اي، قال لي اتعلمي انك ما تعملي حاجة مجبورة عليها، نبرت صوتو كانت متغيرة و هو بقول كدا، قلت ليهو اصلا تاني ما ح اعمل حاجة انا ما عايزاها، قال لي احسن و قفل الخط في وشي، الحركة دي حرقتني شديد حتى اكتر من عدم ردو المرة الأولى 😭قالت عليك الله انا مالي و مالو، المهم بعديها جات فترة الإمتحانات و بقيت مشغولة معاها و حسان بقى ما بتصل، بس امي بشيل تلفوني و بتتصل عليهو يعنى هو متواصل مع امي بس 💔الحمدلله انتهت الإمتحانات و ظهرت النتيجة و كنت تانية الدفعة فرحت فرح ✨بس في نفس اللحظة في زولة ما كانت فرحانة لي و كانت بتعاين لي من بعيد بكل حقد و كراهية، اي دي يقين زاتا، واحد من اولاد دفعتنا يلي هو اول الدفعة قال عازمنا كلنا في مطعم و عامل احتفال ظريف كدا و حاجز لينا. المطعم في البداية ما كنت ماشه بعاهم لكن اقنعوني عشان امشي و العزومة كانت بكرا الساعة 8 المساء، من جيت داخلة البيت عمتو غادة بتعاين لي من فوق لتحت و كانت زعلانة شديد عرفت المزعلها شنو، اشتغلت الشغل العلي نضفت و رتبت البيت، صليت الضهر و بعديها تاني اشتغلت بالله السرير دا ما شفتو إلا الساعة 10 مساء، في اليوم البعديهو كان فاضل للإحتفال ساعتين بس، ما عرفت ألبس شنو، طلعت واحد من الفستانين الكان جابهم لي هاشم، طوالي دموعي جرت 😭انا بهنا ببكي و غادة قالت لبتها ما ح اخليها تمشي الحفلة دي لو كسرت رقبتها، يقين قالت ليها لا خليها تمشي و ابتسمت ابتسامة خفيفة كدا 😈جهزت نفسي و لبست لي فستان بالكبدي و فيهو ورود في شكل حزام في النص باللون البيجي و طرحة بيجية و عملت ميكب خفيف، و مشيت لشيماء و من هناك مشينا المطعم يقين جات بعدين طوالي، ما شاء الله كل ناس الدفعة جات، عملوا حفلة سمحة خلاص و معاها ألعاب و ضحك و ونسة و مشروبات و اكل اشكال و ألوان، بعد شوية شغلوا مسيقى و بدوا يرقصوا انا كنت بعاين ليهم بس و بضحك شيماء قالت لي ارح نرقص قلت ليها لا ما ماشه، بقيت واقفة براي جاني واحد من اولاد الدفعة و جاب لي معاهو عصير مداهو لي و قال لي مالك واقفة براك هنا شكلك ما بتحبي الرقيص قلت ليهو اي والله، بقى يتونس معاي و انا بجاوبو على قدر السؤال و زاتي ما طايقة وقفتو معاي عايزاهو متين يمشي من جنبي، بقيت كل ما اضايق منو بشرب جقمة من العصير لحدي ما كملتو كلو، بعد دقيقتين حسيت راسي لافي و بقيت بضحك ساي زي الما نصيحة قلت للولد المعاي خلينا نمشي نرقص، بقيت برقص مع اي زول قدامي و انا ما واعية للشي البعملو دا، بقيت اقابض مع الأولاد اضحك و اتونس مع اي زول و كمان بصوت عالي شيماء جرتني و قالت لي هيام دا شنو البتعملي فيهو دا قبل ما ارد ليها تلفونها ضرب مشت مني بعيد و بقيت واقفة براي لحدي ما جانا واحد و بقى يتكلم معاي و يتغزل فيني و انا بضحك اصلا ما فاهمة الكلام البقولو لي اللهم بس بضحك و ما قادرة اقيف عديل كنت متحركة كدا قربت اقع قمت مسكت فيهو، بس في اللحظة دي ما حسيت ليك إلا بيد ماسكان و سحاباني لبرا و طبعا دا كان حسان 😤بالقوة فكيت نفسي منو و قلت ليهو بصوت عالي اياك تمسكني المسكة دي تاني لحدي ما كل الناس إلتفتت لينا و عم الصمت المكان، حسان بكل غضب قال بمسكها ح تعملي شنو يعنى و القبل شويه الكان ماسكك دا ليه ما اتكلمت معاهو ولا المسكة كانت عاجباك ،كلامو زعلني شديد و انا زاتي ما قادرة اجمع كويس، قلت ليهو اي عاجباني و شديد كمان، انت مالك و الدخلك فيني شنو، و خليهو يمسكني و اي زول عايز يمسكني مسموح ليهو بكدا إلا انت بدون اي تردد ضربني كف قدامهم كلهم، قلت ليهو انت منو عشان تضربني كف 😭من السمح ليك ترفع يدك و تضربني يعنى انت ما عندك شغلة او عملة غيري، ليه بتحب تحشر نفسك في حياة ناس ما عايزنك ياخ خلي عندك كرامة شويه و ارحم نفسك دي و بطل حشرية خلي بالك من اخواتك و بس و انا ما عندك بي شغلة، بقى بس ساكت و ما قادر يفتح خشمو، الغضب و الزعل كان واضح في وشو ،بسرعة شيماء ادخلت و ساقتني عشان ما تحصل حاجة تانية، طول الطريق و انا بقول كلام خارم بارم، شيماء شكت في اني شاربة حاجة عشان كدا ساقتني بيتم اول حاجة، دخلتني الحمام و غسلت لي وشي، كنت مصدقة شديد نمت زي ساعة كدا لمن صحيت، صحيت بصداع شديد و الساعة كانت 10مساء،شيماء جابت لي حبوب للصداع و عملت لي شاي، قلت ليها الحصل شنو و انا ليه هنا، قالت لي قولي الما حصل شنو، حسي انتي ما كويسة ارح اقدمك بيتكم و بكرا براك ح تتذكري مشت معاي هي و اختها لحدي ما وصلوني البيت، صليت العشا و نمت طوالي 😴😴
يتبع..........
