قلت ليها اذا ما عرفت اجوبة للأسئلة الفي راسي دي ما ح اتحرك شبر من هنا 😤عاينت لراجلها و قالت لي بسم الله يا هيام اجوبة شنو كمان ،قلت ليها مع احترامي ليك بس انتي ليه عاملة نفسك ما فاهمة قصدي ،دي شنو التصرفات البتصرفها ولدك دي ،يعنى هو ما طبيعي عندو مشكلة ولا حاجة ،يعنى كذبتوا علي و غدرتوني و...قبل ما اتم كلامي قالت لي هيام انا ما فاهمة انتي بتتكلمي عن شنو ،و العملو احمد امبارح يمكن من باب الهظار بس ،قبل ما اقول ليها كلمة احمد جا نازل و كان بنطط كمان ،قال ليها ماما الشاي جاهز انا عايز حليب ،لأني بحبو شديد ،عاينت لي لقتني بعاين ليها عرفت قصدي ،قالت لأحمد مالك يا ولدي ليه بتتصرف كدا ،بطل هظار خلاص ما شايف مرتك دي زعلت كيف 😂كان واضح عليها التوتر و واضح انها بتكذب ،قلت ليها عمتو محاسن ليه عملتي فيني كدا انا ذنبي شنو او ناقصني شنو عشان تعرسيني لولدك دا ،للدرجة دي شايفاني رخيصة ؟نزلوا حازم و يقين قالوا لينا اها ما جاهزين للسفر ماف زول رد عليهم ،عمي موسى الرشيد كان ساكت و ما قال ولا كلمة ولا حاول يكذبني و يبرر لي سكوتو دا اثبتي لي انو شكي صاح ،عرفت لحظتها ليه عمتي غادة وافقت على العرس دا و اهتمت بكل الترتيبات ،ضربت عصفورين بحجر واحد ،اتخلصت مني و دمرت لي حياتي برميها لي في الجحيم ،و الوجعني اكتر انو اعمامي ليه ما اعترضوا ،ليه ماف زول حكى لينا الحاصل معقولة تهون عليهم بت اخوهم للدرجة دي ؟طيب عم حسن الكان بعتبرني زي بتو معقولة يكون وقف مع مرتو ضدي ؟قلت ليهم ما ح اقعد دقيقة واحدة في البيت دا ،طلعت بس بالتوب اللابساهو حاولوا يمنعوني بس ما وقفت ليهم ،اول ركشة جات ركبتها و على طول مشيت بيت عمتي غادة ،نزلت من الركشة و انا ببكي لقيت عم حسن جنب الباب 😭استغرب لمن شافني ،يعنى امبارح كان عرسي الجابني شنو ،جا علي ،حاسب بتاع الركشة و ساقني جوا ،اول ما عمتو غادة شافتني قالت لي الجابك شنو ،امي سمعت الصوت جاتني اول شي حضنتني و قعدوني ،امي قالت لي مالك يا هيام الحصل شنو ،في مشكلة في بيت نسابتك ولا في شنو يا بتي اتكلمي ،انا ما قادرة اتكلم من شدة البكي مرة اعاين لعمتي غادة و مرة اعاين لعم حسن ،قال لي اتكلمي يا بتي في شنو ،احكي لينا عشان نقدر نتصرف ،قلت ليهو بأمانة نحنا كنا مضايقنك ؟كنت حاسسنا عبأ تقيل عليك ؟كنا مشيلنك همنا ؟قال لي دا كلام شنو يا بتي ،والله العظيم ما حصل كنتوا هم و غم بالنسبة لي و مستحيل تكونوا كدا انتي و امك على عيني وراسي و بيتي دا زي بيتكم ،من وين جبتي الكلام دا ؟قلت ليهو..قاطعتني عمتي غادة و قالت ليهو خليها ترتاح هسي ،بنتكلم بعدين في الموضوع دا ،حسيتها عايزا تسكتني بأي طريقة،و كان باين عليها كأنها بتفكر ليها في حاجة ،شاكة بأنها بتفكر في خطة تقدر تسكتني بيها ،عم حسن قال لي طيب يا بتي ارتاحي هسي و ح نتناقش بعدين ،قلت ليهو لا هسي خلينا نتناقش لأنو الحصل ما بنسكت عليهو ،قال لي الحصل شنو ؟قلت ليهو انت بتعرف شنو عن احمد ؟قال لي انسان واعي و متعلم و شغال مهندس و ولد موسى الرشيد ،قلت ليهو حصل لاقيتو قبل كدا ،قال لي اي قبل 5سنوات كنت شريكهم في الشركة و بعدين بعتا ليهم حصتي و مشيت طورت شغلي برا البلد ،بس ليه السؤال دا ،قلت ليهو ولدهم ما طبيعي يا عمي بتصرف تصرفات اطفال شكلو عندو مشكلة أو خلل في المخ و مع ذلك زوجتوني ليهو معقولة انا رخيصة للدرجة دي عندك 😭امي قال لي شنو ،كيف يعنى ما طبيعي ؟حكيت ليهم الحصل شنو ليلة الجرتق و الحصل اليوم الصباح ،عم حسن ختا يدينو في راسو و قال لا حول ولا قوة إلا بالله ،طبعا عمتو غادة كانت ساكتة و ما اتكلمت و كلامي دا ما فاجأها طول،معناها هي مسبقا كانت عارفة بالحاجة دي ،عمي حسن شال تلفونو عشان يتصل بموسى الرشيد ،فجأة كدا الجرس ضرب ،و كانوا ديل عمتي محاسن و عمي موسى الرشيد ،سلموا علينا و قعدوا ،عمي حسن قال ليهو عندي معاك كلام كتير ،موسى الرشيد قال ليهو عارفك ح تتكلم عن شنو و انا آسف يا هيام على الحصل دا ،قلت ليهو آسف !؟كأنك ما كنت عارف قبل كدا ،عمتي محاسن قالت لي فعلا ما كان عارف و كلنا ما كنا عارفين يا بتي ،عمي حسن قال ليها ،كيف يعنى ما عارفين معقولة يخفى عليكم حالة ولدكم المعاكم في البيت ،قالت ليهو خليني احكي ليك الحصل ،ولدها احمد دا ما كان فيهو اي شي ،بعد ما عقد على هيام قال لينا مسافر عشان عندو شغل و دا لمن اجلنا حفلة العرس عشان تخريج يقين و هيام و عشان شغل حازم و احمد ،قلت ليهو ما تمشي يا ولدي اول حاجة تم عرسك و سوق مرتك و سافر قال لي الشغل ضروري ولازم اسافر بكرا ،حازم قال ليهو انا زاتي عندي كم شغلة في الإمارات و مدام الباقي مراسم العرس ح تتأجل خليني انا زاتي اسافر معاك اقضي شغلي و اجي راجع و فعلا سافروا الإتنين ،كانوا كل يوم بتصلوا علينا و بطمنونا عليهم بس في يوم ما اتصلوا قلنا بكونوا مشغولين ،بعد تلاتة يوم اتصل علي حازم سألتو عن احمد قال لي مشغول ،و دي بقت الحجة بتاعتو البقولها لي في كل مرة بتصل عليهو ،بعد اسبوعين قلت ليهو اذا ما قلت لي احمد وين و الحاصل معاكم شنو اصلي ما عافية ليك ،بعد كلامي دا معاهو حتن قال لي احمد عمل حادث و الضربة كانت في الراس و هسي بقى احسن شويه و اداني اتكلم معاهو و كان طبيعي جدا و ما فيهو شي لحدي ما جا راجع كان كويس ،بس ما كان بتكلم معانا كتير فما ختيت في بالي انو ورا سكتو دا في شي و امبارح لمن اتصرف تصرف طفولي انا زاتي اتحيرت ،للحظة قلت معقولة يكون بسبب الضربة القبل شهر ؟تاني طردت الفكرة دي و قلت احتمال بهاظر ساي لأنو دايما كان بحب الهظار ،و اليوم الصباح لمن جيتي حكيتي لي ،بصراحة انا زاتي افكاري كان جايطة و ما قادرة اجزم هل دا بسبب الحادث ؟بس هو كان كويس ،و لمن احمد جا نازل عرفت انو ما طبيعي بعد ما انتي طلعتي قعدنا معاهو انا و ابوهو و اتأكدت لحظتها انو بالجد ما كويس و دا بسبب الحادث 😭ولدي ما بستاهل الحصل ليهو دا والله كان نفسي اشوفو عريس و بي أولادو ،حححي انا يا ولدي الح يخسر شبابو الح يقضى باقي عمرو بدون زوجة أو ولد يحمل اسمو 😭حصلت لحظة من الصمت و اي زول بفكر براهو ،قطع الصمت دا عمي حسن لما قال لموسى الرشيد ما عايز منكم حاجة غير ورقة بتي عايزها بكرة دي ،رفعت راسي لقيت امي بتبكي و بتعاين لي كأنها بتعتذر لي عن الحصل ما قدرت تنطق بحرف لأنها حاسة انها ظلمتني ،اكتفت بالبكى و بس،بكت على بتها الح تتطلق في اليوم التاني لزواجها ،عمتي محاسن عاينت لعمتو غادة طوالي قالت لينا يا جماعة فكروا في سمعة هيام الناس ح تقول عنها شنو ؟امي قالت ليها ببساطة ح نحكي ليهم الحصل و قلبوها جوطة و انا ساكته و بفكر ،قلبت القصة دي يمين و شمال في النهاية قلت ليهم انا....
يتبع........
