فجأة الصوت اختفى و عم الهدوء المكان بقيت ما سامعة شي غير صوت ضربات قلبي حسيت نفسي كأني في فلم رعب، قلت كدي اطلع اشوفو لو مشى ولا لا بس فتحت باب الدولاب كدا كان اشوف ليك هاشم في وشي صرخت صرخة واحدة لحدي ما امي جاتنا بسرعة و قالت لي في شنو، قمت جاريه هاشم مسكني، قال لي بسم الله في شنو يا بت الناس، قلت ليهو بتردد و خوف يعنى ما عارف، قال لي اعرف شنو و مالك بترجفي كدا خايفة مني يعنى، هزيت ليهو براسي بمعنى اي، قال لي انتي عملت شنو و خلاك تخافي مني للدرجة دي، قلت ليهو حسان قال ليك شنو، قال لي: قال انو وصلك معاهو، قلت ليهو يعنى ما ح تشاكلني عشان ركبت معاهو ضحك مسافة و قال لي لا، عارفة ليه؟ لأني بثق في حسان دا ثقة عمياء و هو عشان عارف الحاجة دي جا و قال لي وصلت هيام عشان ماف اي زول يجي يقول لي كلام عنكم، امي قالت ليهو راجل بالجد، عاد حسان هدي و رضي اريت كل الرجال زيو ❤️اخيرا اخدت لي نفس كنت خايفة خوف من هاشم، عاين لي و قال لي اقنعيني انك كنت مدسية في الدولاب خوفا مني، معقولة انا بخوف للدرجة دي؟ قلت ليهو بعد مرات بس 😅قال لي انا الزرعت جواك الخوف دا و انا الح انزعو منك ،عارف نفسي كنت قاسي معاك،ما عارف كنت بفكر كيف لمن كنت بصرخ و بكورك فيك، بس دا ما ح يتكرر بعد اليوم، نطيت فيهو و مسكت في رقبتو و قلت ليهو انت احسن اخ في الدنيا كلها، قال لي فكيني يا مجنونة ح تقتليني، ياخ امي قعدت تضحك، و قالت لينا الله يديمكم لبعض و ان شاء الله دايما سعيدين و متفاهمين، فكيت هاشم و مشيت حضنتها هي، و قلت ليها بحبك يا نبع الحنان و بقيت ابوس فيها، قالت لي اها بدينا العباطة كلنا ضحكنا شديد و كنا مبسوطين حد الإنبساط 😍❤️❤️❤️😍زي الساعة 12:30كدا كان ما جاييني نوم بقيت اتقلب يمين و شمال، طبعا نايمين برا و انا ملصقة سريري مع امي و هاشم بعيد مننا شويه، لما شافني بتقلب كدا قال لي مالك يا هيام تتقلبي كدا زي السمكة المطلعنها من الموية 😂قلت ليهو ظريف شديد، قال لي بالجد مالك، قلت ليهو ما جايني نوم ما عارفة بس ما حاسه بالأمان، حاسه بخوف شديد و عدم راحة، قال لي امشي صلي ليك ركعتين و تعالي، طبعا انا بخاف بليل ،انتظرني لحدي ما صليت و جيت رقدت قال لي لسه ما مرتاحة، قلت ليهو نص نص، دخل المظلة و جا راجع و معاهو مصحف ،امي صحت و قالت لينا مالكم، قلت ليها حاسه نفسي ما مرتاحة و ما جاييني نوم،قالت لي صليتي العشا؟ قلت ليها اي صليتو و هسي صليت ركعتين، و هاشم عايز يقرا لي قرآن، قالت ليهو سمح يا ولدي، هاشم بدا يقرا في القرآن و صوتو ما شاء الله تبارك الرحمن جميل جدا و هادي و بشرح الصدر بخليك تلقائيا تحس بالراحة كأنو جبل من الهموم كان في قلبي و بدا ينهد حبه حبه و هو بقرا كدا انا خلاص حسيت بالنعاس، قلت احسن ارقد و اسمع، بس ختيت راسي في المخده و بعديها لا شفت لا سمعت شي نومة وحده ما صحيت إلا الصباح لقيت هاشم نايم و خاتي المصحف في صدرو،اتساوكت سرعة و صليت، مشيت المطبخ لقيت امي بتعمل لينا في الشاي صبحت عليها و قلت ليها ليه ما صحيتينا بدري نصلي الصبح غير اني كدا ح اتأخر على الجامعة، ضحكت و قالت لي جامعة شنو، نسيتي انك مؤجزة، قلت ليها، اااااي نسيت والله، قالت لي امشي صحي اخوك ،و تعالوا اشربوا الشاي، شلت لي مويه في الجك و براحة مشيت ليهو 😁نقطة ليهو نقطة في عينو بس عمل نفسو نايم و ما حاسي، تاني كررت نفس الحركة، بس برضو مستمر في حركاتو سحبت منو المصحف و كبيت فيهو جك المويه و بسرعة قمت جاريه عشان ما يمسكني 😁وقفت و عاينت وراي لقيتو ما حرك ساكن هنا خلاص عقلي بقى يودي و يجيب كيف يعنى اكب فيهو جك مويه كامل و ما يصحا 😭جريت عليهو و قلت ليهو هاشم قوم يا هاشم خلي العباطة البتعمل فيها دي قوم ياخ، و ناديت امي، قالت لي في شنو قلت ليها اتكلمي مع ولدك العوير دا ابى يقوم و كنت برجف امي جات ليهو و قالت ليهو هاشم قوم يا ولدي ما تخوفنا عليك و ما كان في اي ردة فعل امي ختت يدها في صدرو، و ما بس ما حست بضربات قلبو انا بديت اصرخ و اقول ليهو قوم يا هاشم ببكي و بجرو من قميصو، امي الوقوف غلبها قعدت جنبي في طرف السرير و بدت تسبح و تستغفر و انا لسه ما مصدقة لمن شافتني بجرجر فيهو و بصرخ قالت لي هيام كفاية هاشم دا اتوفى يا بتي و دموعها بدت تصب، قلت ليها ما مات و انا متأكدة شلت تلفونو ما عارفة ليه اتصلت على حسان، اول ما قال الو هاشم، قلت ليهو تعال لينا سرعة، قال لي هيام في شنو مالو صوتك متغير كدا، قفلت الخط لأني اصلا ما فيني حيل عشان اقعد اشرح ليهو و احكي، ما تمينا ربع ساعة إلا و لقينا حسان داخل علينا، جريت ليهو و قلت ليهو حسان تعال اتكلم مع صحبك دا خليهو يقوم من قبيل بصحى فيهو بس هو مستهبل و ما عايز يقوم 😭حسان لمن شاف منظر امي و طريقة قعدتها عرف الحاصل، قرب من هاشم و مسك ليهو يدو مسافة و بعدين فكاها عيونو اتملت بالدموع و ما نطق بأي كلمة، صرخت فيهو و قلت ليهو انا اتصلت ليك عشانتجي تصحيهو ولا عشان تجي تقيف لينا كدا، إلتفت علي و قال لي هيام لا إله إلا الله، عارفها صعبة عليك لكن هاشم دا خلاص اتوفى، صرختي المرة دي لمت كل ناس الحي ثواني بس و الناس دي كلها اتجمهرت في بيتنا بين مصدق و مكذب، قلت ليهو حتى انت، اخوي ما مات يا ناس افهمو، بكون عيان ولا حاجة خلينا نوديهو الدكتور 😭حسان كان مقتنع من حتت انو هاشم اتوفى و اني ما ح اقتنع و اصدق بالساهل كدا، قال لي طيب ارح المستشفى، لبست اقرب عباية و مشينا المستشفى، دخلوهو غرفة و حسان جاب الدكتور عشان يكشف على هاشم، الدكتور ما طول كتير جوا الغرفة و جانا طالع، عاين لحسان و قال ليهو زولكم دا اصلا جبتوهو ميت و ليهو فترة طويلة يمكن اكتر من 4ساعات، ما عرفت وقتها امشي وين ولا اقبل وين ما عايزا اصدق الكلام دا، رافضة فكرة انو هاشم خلاص فارقنا و مشى،يعنى بين ليلة وضحاها يتغير حالنا كدا، هاشم امبارح القريبة دي كان بتكلم معاي و بقرا لي قرآن لو كنت عارفة انو ح يموت ما كان نمت من الأساس، كنت ح اقعد اتكلم معاهو طول الليل و في كل مرة يحاول ينوم و يغمض عيونو كنت ح اصحيهو، عارفة انو الموت لو جا ماف حاجة بتمنعو، بس ما مصدقة يا ناس والله ما مصدقة انو هاشم خلاص راحة، فجأة حسيت الدنيا دي شالتني و ضربت بي الأرض، حسيت راسي لافي و بعيد شايفة حسان و الدكتور بعيدين شديد ،شويه شويه الرؤية بقت ضعيفة لحدي ما اختفو من نظري و بقيت شايفة سواد 💔💔😭
اصعب حاجة هي انك تحاول تصدق موت زول قريب منك شديد، يعنى بالجد الحاجة دي مؤلمة و مميتة شديد، الموت كلمة واحدة لكن ليها اكتر من معنى و كل واحد من معاني الموت ليهو طعم خاص من الوجع فالموت بيعنى الفراق، الإشتياق، الحزن، الفراغ، ذكريات، جروح من غير نزيف....الخ ، اي فاجعة او مصيبة في الدنيا دي ممكن نتجاوزها بغض النظر عن فترتها الزمنية ما عدا الموت، ما عندو فترة زمنية معينة و يمكن يلازمك طول الحياة ،اصعب حاجة فيهو الذكريات، هي البتجرف معاها كل معاني الموت، ديل كلهم اصعبهم و احرهم الذكريات لأنها المسبب الرئيسي ليهم 💔💔😭
يتبع..........
