رجعت البيت و اول م دخلت لقيت هاشم جنب الباب، صريت ليهو وشي و قلت ليهو خير، قال لي مش قلت ليك ما تباري يقين دي؟ قلت ليهو ما على كيفك و انا ما لعبة في يدك تحركها على كيف كيفك، و يقين القلت لي ما اباريها دي قبل م تكون صحبتي هي بت عمتي م تنسى، قال لي بكل عصبية و زهج كلامي واضح ي هيام و ما بعيدو مرتين يقين دي ما تباريها ويلا خشي جوا سرعة، ضربت الباب بزهج و دخلت جوا بكيت سمح و بعديها اتوضيت و صليت، مشيت سلمت على امي و ابوي، قعدت معاهم شويه و رجعت قعدت تحت شجرة النيم، قلت خليني افتح الفيس اشوف فيهو شنو اول ما دخلت لقيت رسالة من مدثر، كاتب لي فيها هيام كيفك، ما رديت عليهو وهو كان متصل تاني رسل لي قال لي انتي ليه ما بتطيقيني هل انا غلطة معاك في حاجة؟ رديت ليهو ب لا، قال لي طيب المشكلة شنو، قلت ليهو ما عارفة بس ما كنت برتاح ليك، رسل لي الإيموجي دا 😂قال لي لا يا شيخة ما بترتاحي لي عديل كدا قلت ليهو اي عديل كدا، بعديها توالت الرسايل اخر رسالة كتب لي فيها اها و هسي لقيتيني كيف، ما تقولي لي برضو ما ارتحت ليك، قلت ليهو ماشي حالك، بعد ما اتكلمت مع مدثر نظرتي ليهو اتغيرت 180درجة حسيت براحة ما طبيعية، نسيت زهجي و تعامل هاشم الزفت معاي ،
زي المسا كدا كنت بتناقش مع امي في حتة انها عايزا تمشي تشتغل، منعتها و قلت ليها انتي عارفة انو هاشم م ح يوافق و حذرك اكتر من مرة، قالت لي يعنى اعمل شنو انا م شايفة حالنا بقى كيف و ابوك عيان محتاج ادويه و محتاجين مصروف يومي لينا و لجامعتك، قلت ليها يمة م تشيلي هم بحلها ألف حلال و م تنسى انو هاشم مشى يفتش ليهو شغل انتي بس ادعي ليهو،
قعدت تحت الشجرة و بديت افكر ح نعمل شنو من وين ح نجيب قروش لعلاج ابوي من وين ح نجيب قروش مصروفنا اليومي، اثناء م انا بفكر كدا جا هاشم داخل و كان باين عليهو مضايق شديد، مشيت عليهو و قلت ليهو خير ي هاشم ان شاء الله لقيت شغل، عاين لي و م رد و اتحرك من قدامي، عرفت لحظتها انو م اتوفق
بعد شويه كدا سمعنا امي بتصرخ و بتنادي علينا سررررعة جرينا ليها لقينا ابوي تعبان شديد و م قادر يتحرك او يتكلم، جريت عليهو و قلت ليهو الحصل ليك شنو ي ابوي رد علي 😭هاشم قال لينا لازم نوديهو المستشفى سرعة، طلع جاب ليهو هايس و رجع و دينا ابوي المستشفى، الدكتور قال لينا لازمو عملية بأقصى سرعة، قلت لي هاشم ح نجيب القروش من وين 😭لأول مرة في حياتي اشوف هاشم عاجز و منكسر حتى م قادر يرفع راسو و يعاين لي ،امي دي كانت بتبكي بس و مرات بتستغفر في النهاية قالت لينا انا عندي دهب في البيت خاتم و غبيشتين عارفاهم م ح يسوا حاجة لكن بيعهم ي هاشم، قال ليها ماف داعي ي حاجة ح اشوف طريقة اقدر اجيب بيها قروش، امي ح تجيبهم من وين م سامع الدكتور قال شنو، م عندنا زمن ي هاشم، هاشم م رد عليها و اتحرك من قدامنا ،مشى عشان يشوف طريقة يقدر يجيب بيها قروش،قال ي ربي اجيب قروش من وين 😥لازم اوفر القروش دي و إلا ابوي ح يضيق من بين ايدينا، هاشم بهناك بفتش في طريقة و نحنا هنا ماسكين قلوبنا في يدينا و خايفين نفقد ابوي، بعد شويه طلع الدكتور و قال لينا الحاج طالب يشوفكم مع انو وضعو حرج و م مفروض اسمح ليكم بالدخول بس هو اصر علي و قال لازم يشوفكم، دخلنا ليهو انا و امي و دموعنا دي منهمرة سيل لمن شفناهو بالحالة دي زدنا في البكى، عاين لأمي و قال ليها ي شادية بتبكي على حالتي ولا خايفة تبقي ارملة 😂امي م ردت و فضلت تبكي، قلت ليهو ي ابوي حتى و انت في الحالة دي قادر تهظر ي ابوي، قال لي هسي انا مالي م هدا قدامك مية مية، سكت و قعدت ابكي، سألني عن هاشم، حكيت ليهو القصة قال لي نادي لي الدكتور، قلت ليهو بخوف و لهفة في شنو ي ابوي مالك، قال لي اسمعي الكلام و نادي الدكتور، بسرعة ناديتو و جيت، ابوي قال للدكتور قلت ليهم و ضعي حرج و محتاج عملية؟ الدكتور قال ليهو ايوا ي حاج، قال ليهو و اذا م عملت العملية هل ح اموت؟ الدكتور سكت و رد بعد مسافة احتمال كبير، ابوي قال ليهو اسمعني هنا ي دكتور ماف زول بموت قبل يومو، و انا كن مت معناها يومي تم، هسي اعمل لي اجراءت الخروج، قلت ليو شنو، خروج انت ي ابوي م سامع الدكتور بقول ليك في شنو 😤اذا م عشانك عشانا نحنا ي ابوي ،قاطعني و قال لي كلمة واحده و اذا عارضتيني م عافي ليك ليوم الدين، امي قالت ليهو جنيت انت ي عبد الرحيم ولا شنو انت مش عارف وضعك دا خطير قدر شنو 😭😤قال لينا اسمعني هنا انا كلمتي واحده و م ح اكررها طلعوني من المستشفى دي و قام على حيلو و كان طالع مسكناهو انا و امي و معانا الدكتور، قال لينا اذا م طلعتوني من المستشفى دي م عافي ليكم ليوم القيامة و تاني لا بعرفكم لا بتعرفوني، م عرفنا نعمل شنو و ابوي كان مصر شديد، قلت ليهو طيب انت اقعد هنا و انا ح اشوف ليك اجراءات الخروج، طلعت برا مع الدكتور و قلت ليهو ح يحصل لأبوي حاجه اذا طلع من المستشفى؟ قال لي شوفي م اكذب عليك ابوك حالتو خطرة و قدامو 15يوم عشان يعمل العملية دي حاولوا تقنعوهو بالعملية دي قبل م حالتو تسوء، 😭😭💔
عملنا الإجراءات و رجعنا البيت ،من الصباح بحاول اتصل ب هاشم بس تلفونو مغلق
=مها انتي عارفة قدر شنو المهمة دي صعبة و مدى خطورة الناس ديل
مها: عارفة لكن لازم نفكر في خطة نوقعهم بيها، لازم نجمع اكبر معلومات عنهم
=بس ي مها... كم مرة عملنا خطط و فشلت ماف فايدة الناس دي اذا كشفت هويتنا م ح تريحنا والله
مها: يعنى شنو اذا خططتنا فشلت مالو تاني نحاول و نحاول لحدي م ننجح، ،ما بس ولا حاجة نحنا قدر المهمة دي و ان شاء الله خطتنا الجاية ح تنجح
✨✨✨✨✨✨✨✨✨✨
ديل منو و بتكلموا عن شنو ح نعرفهم في الحلقات الجاية
يتبع .......
