مرت الأيام و السمستر التاني بدا و الإمتحانات على الأبواب في الفترة دي قلنا بقينا مضغوطين شديد، حتى اني بقيت ما بشوف شيماء كتير او الأصح هي الما عايزا تشوفني، قلت ما مشكلة بكرا ح ترجع تتكلم معاي، مرا الإمتحان الأول و التاني لحدي ما انتهينا و مدثر من يوم الحادث تاني ما شفتو،شكلو مشى جامعة تانية، في اخر يوم من الإمتحانات قررت اني اواجهة، شيماء و اشوف مشكلتها شنو، يعنى بالجد هي ممكن تكون زعلانة مني عشان مدثر؟!لمحتها من بعيد طالعة لحقتها جنب البوابة و قلت ليها ممكن اتكلم معاك، قالت لي مستعجلة و ما عندي زمن و طوالي طلعت و خلتني مذهولة من تصرفها دا، برضو ما خليتها لحقتها في الشارع و قلت ليها لو عندك ذرة معزة لي و لصداقتنا اقيفي و اتكلمي معاي، وقفت و قالت لي عايزا شنو، قلت ليها ما ينفع نتكلم و نحنا واقفين في نص الشارع تعالي للمطعم داك، مشينا و قعدنا ،قالت لي سرعة قولي العايزاهو، قلت ليها خلينا نطلب حاجة بالأول، قالت لي ح تتكلمي و لا اتوكل و امشي، قلت ليها طيب طيب، ممكن اعرف يا شيماء انتي مشكلتك شنو ؟ليه فجأة كدا معاملتك اتغيرت معاي؟ هل انا غلطة في حقك؟ قالت لي انا متغيرة معاك من متين؟قلت ليها ليك شهر تقريبا، قالت لي ايوا لي شهر، ليه ما حاولتي تسأليني او تستفسري عن سبب زعلي منك ولا علشان كنتي لاقية مدثر و يقين؟ قلت ليها لأني شبه كنت عارفة سبب زعلك ،لو انك جيتي و قلت لي انا بحب مدثر والله كنت ح اخليهو عشانك و بالرغم من انو كلامي عنو ح يزعلك بس هو انسان حقير و حيوان و ما نافع، قالت لي شنو انا احب مدثر دا اخر ما توصلتي ليهو يا هيام 😱و قامت على حيلها و كانت ماشة بس انا مسكتها و قلت ليها الموضوع دا لازم يتحلى اليوم قبل بكرا، قالت لي تحلي شنو و تخلي شنو يا هيام، معقولة تشكي فيني؟ معقولة ما عندك ذرة ثقة فيني؟ معقولة انا اخونك يا هيام ؟قلت ليها بس تصرفاتك و ردات افعالك كلها بتدلل على كلامي دا، قالت لي تصرفات شنو؟ و انتي متين شفتيني مع مدثر؟ حصل مرة انا اتكلمت معاهو او لمحتيني واقفة معاهو؟ قلت ليها بس يقين قالت انها شافتك كذا مرة مع مدثر، بدهشة كدا قالت لي يقين 😱سكتت و كان باين عليها كأنها مصدومة، قلت ليها سكوتك دا بيعنى انو الكلام صحيح؟ قالت لي يقين كذبت عليك و علي كانت دايما بتجيب لي كلام و بتقول انتي القلت ليها توصلو لي،متذكرة لمن مدثر قال ح يجيك يوم الجمعة و انتي ما كلمتيني؟ قلت ليها اي متذكرة، قالت لي يقين جاتني و قالت لي بالنص ما تزعلي بس هيام خايفة انك تخربي ليها سعادتها و خايفة انك تحسديها على مدثر، و الخلاني اصدق كلامها انو كلامك معاي قل و وقتك كلو مع يقين، سكت و انا مصدومة من الكلام السمعتو دي شنو الجوطة دي و يقين ليه تعمل كدا، ح تستفيد شنو من الحركة دي ،قلت ليها والله انا ما قلت ليها كدا، معناها هي العملت الفتن دي كلها بينا،بس هدفها شنو؟قالت لي انسى و خلينا نبدا صفحة جديدة 😃قلت ليها و احسن نبداها بالأكل يلا اطلبي لينا حاجة على ذوقك و ادفعي انتي، قالت لي نعم نعم، مش هسي انتي العزمتيني، قلت ليها اي بس انتي رفضتي و جا دورك تعزميني، قالت امري لله و طلبنا و قعدنا ناكل و نتونس و انا حاسه بإنو في زول مراقبني ما من هسي من قبيل بس ما حاولت ألفت اشوفو لأني كنت بتناقش مع شيماء، ألتفت يميني لقيت حسان قاعد بعيد مننا ،لمن عاينت ليهو طوالي صرف نظرو و عمل نفسو ما شايفني، شيماء قالت لي مالك بتعاين للولد دا كدا، بتعرفيهو؟ قلت ليها اي، قالت لي ااااشي عليه من متين بقيتي تعرفي ناس مزز و نضاف زي دا 😍قلت ليها دا صاحب هاشم بس ما بضيقو، سواط و بتاع قوالات، هو القال لهاشم اني كنت في شقة مشبوها، قال لي شنو؟ شقة شنو؟ و متين و وين ليه ما كلمتيني قبل كدا، و هاشم عمل ليك شنو و انتي الوداك شنو؟قلت ليها اهدي اهدي ح احكي ليك و حكيت ليها القصة كلها من الألف للياء، سكتنا مسافة و تاني عاينا لبعض شيماء قالت لي جاك نفس سؤال صاح قلت ليها اي ليه الحاجة دي راحة من بالي 😳ايوا يقين هي العملت الحاجات دي كلها و لو كان ركزت في القصة دي شويه كان كشفتها من البداية، لأنها في اليوم داك رسلتي لي العنوان و مكتوب فيهو اسم مرام حسن و هي قالت بس شافتهم داخلين الشقة طيب عرفت الإسم دا من وين و هي ما دخلت الشقة جوا؟ معناها اصلا كانت متفقة مع مدثر، قالت لي ايوا واضح انها متفقة معاهو، بس الما فهمتو انتي عملتي ليها شنو عشان تكرهك، قلت ليها ما عارفة والله، قالت لي يمكن عشان امها بتكرهكم، قلت ليها بس امها من زمان بتكرهنا و هي مع ذلك كانت مصاحباني شديد،والله ما مصدقة انها عملت فيني كدا قبل كل شي انا بت عمها معقولة ما يهمها شرفي و عرض ابوي و اخوي و بديت ابكي 😭😭شيماء بدت تهدي فيني و تحنس فيني عشان اسكت و انا لسه مستمرة، بس فجأة اسمع ليك صوت بقول لي في شنو يا هيام، رفعت راسي لقيتو حسان، ما رديت عليهو و المرة دي ما لأني ما عايزا ارد، لأني بالجد ما قادرة ارد 💔قال لينا اطلعوا خلوني اوصلكم، شيماء قومتني و ساقتني و ركبنا معاهو طول الطريق كنت ببكي و هو بس اكتفى بإنو يعاني لي في المراية ما قادر يسألني عن سبب بكاي، اول وصل شيماء ودعتني و دخلت بيتم، حسان وقف العربية و مد لي منديل، قال لي ما عارف سبب بكاك شنو و بغض النظر عن السبب البكي ما بفيد بشي، مسحت دموعي و قلت ليهو ما بفيد بشي بس بريح القلب 💔عاين لي مسافة كأنو عايز يقول لي قصدك شنو بس ما قالها، دور العربية و قال لي انزلي حتى بدون ما يعاين لي، قلت هسي دا مالو كمان قبل شويه كان طبيعي الإتغير شنو، دخلت البيت لقيت هاشم طالع قلت الليلة لو شاف حسان ح يقول شنو 😱وقفت سلمت عليهو و قلت احسن اتجرجر معاهو الكلام لحدي ما حسان يمشي بس اتفاجأ ليك بصوت حسان بقول السلام عليكم، هاشم رد عليهو السلام و مشى سلم عليهو سلام الرجال البتعرفو داك 👊😂قال ليهو اتفضل يا زول خش جوا، قال ليهو مستعجل والله، قلت هسي انا الموقفني شنو هنا، اتحركت خطوتين بس سمعت حسان قال لهاشم وصلت هيام 😱الليلة ووووبعلي، هاشم ح يقتلني امشي وين انا، الليلة إلا اشوف لي حفرة ادفن فيها نفسي جريت بدون ما اسمع باقي كلامو، دخلة الغرفة و بقيت افتش في مكان ادس فيهو لكن وين، ما لقيت اي مكان اندفن فيهو اقصد ادسي فيهو بس في النهاية لقيت مكان مناسب، يا حزركم وين 😁اي في الدولاب طلعت الخشب الجواهو كلو و دخلتو تحت السرير، دخلت جواهو و جريت الباب علي من جوا،تقريبا مرت زي نص ساعة و انا جوا الدولاب خلاص زهجت و قربت اطلع، بس الساعة الأسمع ليك فيها صوت هاشم و هو بنادي علي من بعيد، هيام هياااام انا خلاص قلبي طار و نطقت بالشهادتين لكن قلت اصلو ما بمشي للموت لرجليني خليهو يجيني في محلي، صوت هاشم بقى قريب و في كل مرة بزداد حبة حبة و انا نفس ما قادرة اتنفس من الخوف الصوت بقى قريب شديد و فجأة الصوت اختفى 😱😱😱
يتبع..........
