الخاتونه 👸🏼
قصه فات الاوان الحلقه 65
صح المكان مهجور وما بي لا كاميرات مراقبه ولا ناس تشهد بس لازم يغلطون
فاتت يومين بديت اتحسن والناس خفت حتى الاقارب كلمن رجع لأهله
جنت كاعد يم الاهل بالأستقبال اجتلي رساله من شداد كالي • تـٰ؏ـﺂل للمكان (البحيره) رحت اله بلا ما يحس علي احد اتفقت ويه بيبي كتلها اذا سأل علي واحد لفي من يمج السالفه انه ساعة زمن واجي
ليلى: شوف ولك حميد ساعه بس اذا عبرت الساعه وما لفيت اكومن بنص البيت وافتح زيكي واصيح ها يا الأولاد هاا اخوكم راح يروح من ايديكم اتلاحكوله
احمد: بيبي على بختج كتلج طمطميلي مو تشهريني
ليلى: هذا الموجود يله توكل
احمد: رحت للبحيره وصلت لكيت شداد واكف ولاف ايدي ورى ظهرى وجها بي حيره
شداد: هاا شيخ اجيت
احمد: شبيك وجهك ما يتفسر عرفت شي
شداد: لا تستعجل على رزقك
احمد: كول شداد شعرفت
شداد: تعرف المزرعة الرحنالها المن طلعت
احمد: المن
شداد: لحجي سلمان
احمد: حجي سلمان منو
شداد: شيخ اعرفنك ذكي وتلكفها وهي طايره
احمد : شداد والي يسلمك انطق تراك ذبحتني
شداد: حجي سلمان ابو هند الله يرحمها
احمد: شنووووووو
شداد: اي شيخ الزلم الكلفناهم يراقبون المزرعة ما لكو شي بس شافو من بعيد ناس جايه يمكن فلح لو ناس صياده وسألوهم عليها وهما كلولهم ما كتلك بساعتها ردت اتأكد عدل وبنفسي تأكدت وهسه اجيت كتلك
احمد: انت شتحجي هما مو باعوا كلشي وتركو البصره من عشر سنين
شداد: لحد هسه ما الهم اي ضجر بس انه اكول هما الهم ايد بالسالفه
احمد: لا ما معقوله انت اكيد متوهم
شداد: والله شكلك تعال احسبها الرساله منين اجت مو من المزرعه
والجيلات منين لفتنا مو منها والمزرعة المن طلعت الهم تراها مو صدفه
احمد: عقلي كام يفتر زين ليش هسه شنو غايتهم بعد ما دمروا هند ودمروني وأخذوا كلشي وراحوا حتى كبرها خفوه عني
شداد: السالفه بيها انه وتبين شيخ لا تخاف ما دام لزمنا راس الخيط
الايام الجايه تنحل السالفه بس هسه انت لا تحجي شي
احمد: شحجي والمن غير يتخبلون
شداد: خلص شيخ هسه نرجع لا يظل بالهم ﻋﻠﻴﻚ
احمد: رجعت وانه براسي صارت الف حيره وفكره سالفه لا تخطر على البال ولا على الخاطر شلون اذا طلع الهم ايد بالسالفه وترجع تنفتح جروحي من جديد وانه ما عولت أطيبها اخ يادنيا شوكت راح ترحميني دخلت للصاله شفت بيبي واكفه ومتخصره وتنحش بالرايح والجاي تسئل علي
ليلى: ولك متت الف موته من وراك
احمد: بيبي لا تخافين علي شو تعاي كعدي خل انام بحضنج
كعدتها على القنفه ونمت بحضنها وهي تمسح بشعري
ليلى: شبيك جده متكدر
احمد: تعبان بيبي ومحد يحس بيه
ليلى: يااا شجاك طلعت شحلاتك ورجعت مهموم
احمد: اي والله بيبي حيل مهموم
ليلى: احجيلي بلجن اساعدك أخفف همومك
احمد: ما اكدر بيبي خل كلشي بمكانه بس احركه ارجع انزف وهل مره اذا نزفت محد يكدر يطيبني
ليلى: شذكرك بيبي بيها هل السنين ما كدرت تنسيك
احمد:كلما اكول نسيت وراح أعيش مثل البشر يصير شي ويخليني ارجع لي ورى
ليلى: بيبي تعوذ من الشيطان هذا الشايله بكلبك مو عشك هذا مرض
انت مجلب بي العنده مثل مريتك ينسى ابو العشك وضيم السنين والقهر العشته بيبي بهاي سوالفك راح تخسر جمارتك اكعد بينك وبين نفسك وتخيل مريتك مو الك شوف نفسك تكدر تعيش بلياها وهي بت حلال وشاريتك
احمد: بيبي لا تزيدن علي همومي رحمه لهلج
ليلى: كوم روح لمريتك شوفها خطي من الصبح تطلع لهل المضيف وما ترجعلها الا تالي الليل ليش هي شذنبها وليدي ارحمها
احمد: ما اريد اصعد هسه بس اصعد ااذيها وينمرد كلبي عليها
خليني هنا
ليلى: براحتك بيبي لا تضغط على روحك
كمره: جنت واكفه بالمطبخ اساعد البنات شفت احمد دخل للصاله فرحت وطرت ردت بس اوصل للصاله حتى اشوفه فاتت هل يومين ما شفته عدل لو بالمضيف لو يصعد متأخر يلكاني نايمه ومن اكعد الصبح الكاه نازل بس من وصلت للباب انصدمت صدمت عمري سمعت حجيه كله هو والحجيه حسيت كلبي انتفض وانقبض وصدري قبط الهوا انكطع عني خفت لا ترجعلي حالة النزيف صعدت اركض للغرفه وانه اشهك وابجي دخلت للحمام ابجي حتى محد يسمع صوتي
جنت متأمله يحبني بس انه انانيه حسيت بنفسي فرضت روحي علي بس مو بيدي حبيته وكلبي جاي يتكطع على موده ليش مايحبني مثل ما يحبها انه شنو ناقصني هو مو يحبها يعشكها حتى وهي ميته الله وأكبر شلون راح اتحمل إنسان ما يحبني شلون راح اتعامل وياه شلون راح اكمل حياتي وياه واشوف بعيونه عشك غيري يا ربي ساعدني ظليت ساعه ابجي سمعت دكت الباب غسلت وجهي وطلعت فتحته طلعت هديه
هديه: وين رحتي كمره الشيخه تسأل عليج هي والحجيه تكول نزلي
تعشي
كمره: ما اشتهي تعبانه وراح انام
هديه: شبيهن عيونج مورمات باجيه
كمره: لا تسأليني هديه فدوه
هديه: براحتج
كمره: طلعت هديه ورجعت للبجي دموعي وحدهن ينزلن
الخاتونه 👸🏼
