الخاتونه 👸🏼
قصه فات الاوان الحلقه 36
الشيخه: وغمه حتى غمى انت لا تفتح حلكك
بهل فتره ابتعدت عن النسوان ما ردت احتك بيهم صارت عندي مناعه على الرغم اكو دكتوره اسمها ساره لازكتلي لزكة جونسون بس بكل مره اصدها
طبعا محد يدري بيه متزوج
كمره: بعد الصار بيني وبين احمد دخلت بصدمه واكتأب وحاله نفسيه زفت
كمت لا اطلع ولا احجي ولا اسوي اي شي الي سألني بس أهز راسي بإي لو لا وأربعه وعشرين ساعه نايمه لو متمدده حاولت امي تطلعني من حالتي ما كدرت جم مره اجت خالتي رادت بس تقنعني اروح وياها لعيالها أغير جو بس ما قبلت رادوا اهلي يأخذوني للزياره هم نفس الشي قفلت كلما اتذكر الصار وانه السبب بدماري اكره روحي اكثر كطعت الاكل اكثر من مره وصار عندي فقر دم حاد واكثر من مره نمت مستشفى
الحب يدمر وانه اول مره احب ما مجربته ما عندي خبره وضيعته بأدي
الي مصبرني بس هو لهسه ما طلكني بس علمني درس عمري ما أنساه
وكلما تطول مدة فراكي اكثر اشتاكله اكثر اي حبيته وما عندي حتى صوره اله حتى صورته بالواتس اب هو انطاني حظر وراحت الصوره
قطع عني كل شي يخليني اوصله على الاقل بس اعتذر اهلي رادوا بأي طريقه اطلع من ضيمي واذكرت كلام خالتي راح تعضين اصابعج ندم بعدين وصدك هسه صدكت
لحد ما اجى اليوم الي اجاني بي ابوي واخواني دخلولي للغرفه واقترحوا علي
ابو صلاح : بنيتي حبيبتي انتي من تأذين روحج تأذيني انه كليلي شنو تردين وانه حاضر
صلاح: خويه مرت اشهر وانتي على هل حال بس كولي امري اي شي
انه بالخدمه
كمره:......
ام كمره: يمه ليش هيج تسوين بروحج بعدج صغيره وحلوه والف واحد يتمناج
انتي صح غلطتي سبحان الما يغلط
يمه احنا مو انبياء ولا معصومين
صلاح: خويه احنا قررنا ترجعين للدراسه تكملين جامعه
بس مو بغداد هنا بالبصره صح راح تغيرين الكليه
بس تبقين هنا كدام عيونا انه اخذج واجيبج
كمره: فتحت عيوني متفاجأة هذا الموضوع جان منتهي
ابو صلاح: هسه شكلتي وترحين ويه اخوج تسجلين بالكليه وتاخذج امج وخالتج للسوك شتردين اشتري كل الي بنفسج
كمره: هااااا
حسن: وجعاااا
واخيرا نطقتي انه كلت هسه تفكها
اعرف نقطة ضعفج
كمره:هههههه
الولد: واخيرا طلع هلال العيد
ابو صلاح: هسه شنهي نتوكل بالله
كمره: ليش مو بغداد
صلاح: لا خويه هنا أأمن
بغداد هل ايام خطره
كمره: ماشي موافقه بس عندي شرط
الأهل : امري
كمره: خلوني على راحتي وخصوصا بلبسي
والعبايه ما البسها
ابو صلاح: براحتج بس كون لبسج مستور
كمره: صح فرحت من رجعت للدراسه
جنت أتمنى ادرس بغداد بس بعد ما مقسوملي رضيت بالأمر الواقع على الاقل اخذ الشهاده الاحلم بيها بس لازم أغير الكليه هاي قوانين الجامعه وفعلا غيرت الكليه نقبلت تربيه بصره وأخذني صلاح سجلت وهم لازم اتاني انقبل بأي قسم جنت أتمنى يطلعلي رياضيات جان عشقي هل الماده ولأن قسمي جان علمي جنت متأمله اكثر
طلعت ويه امي وخالتي للسوك اشتريت كلشي احتاجه بس ما ثقلت على اهلي ادري هما بعازة الفلس
بدى دوام الجامعه وداومت اول يوم طلعت قبول الأقسام رحت حتى اشوف يا قسم طلعلي بس انصدمت شفت لغه انكليزيه
انه وين والإنكليزي وين
ما فرحت اصلا بدوامي كله ردت بس اطلع روحي من الدوامه العايشه بيها
ضجت
وهاي كلها جان صلاح خطيه يفتر وياي كلش تعبته وصلني لقسمي وكال
صلاح: لهنا بعد كافي هذا حدي وياج ادخلي لقسمج ومن تخلصين دوام خابريني قبل ساعه تعرفين الطريق طويل
كمره: صار خويه
• ﺂنٰ شۨـِﺂءۙ ﺂللـِه۫ہ ٰ أخدمك بيوم عرسك
صلاح: هي بس خل تصير وانه اخدمج
كمره: • ﺂنٰ شۨـِﺂءۙ ﺂللـِه۫ہ ٰ ليش مأيس منها هو ابوها يلكى احسن منك
صلاح: اندعيلي كمره يله انه رايح
كمره: مودع بالله
دخلت للقسم احس روحي • غٰـريّبـٰٓهہ ما اعرف شي جان كاتبين اعلان طلاب المرحله الاولى يجتمعون بقاعه واحد لأن جبيره حتى يقسمونه شعب
امشي واسأل لحد ما وصلت لكيت الطلاب داخلين بس مو كلهم دخلت امشي. على كيف خايفه بس خوفي طبيعي انه تقريبا جنت اكبر منهم لأن فاتتني سنتين بس ما مبين علي لأن انه ناعمه جنت لابسه فستان اسود مخصر بي حزام لونه جوزي وشال جوزي وحذاء هم جوزي انه احب اتأنق
بلبسي
لكيت ستيج فارغ بي بس بنيه مبينه فقيره من شكلها كعدت يمها
مرحبا
هبه: مرحبا
كمره: ما يمج احد مو
هبه: لا حبيبتي اخذي راحتج
شنو اسمج
كمره: كتلها كمره بس بعدين اتذكرت اسمي زينب لازم أتعود علي هنا
كتلها هااا لا انه غلطت اسمي زينب
هبه: هههه شلون اكو وحده تغلط بأسمها
كمره: اي هاي انه لأن عندي اسمين
هبه: بس تدرين اسم كمره حلووو
كمره: هو اسمي متعوده علي بس شسوي هنا
انتي شسمج
هبه: انه هبه
بس تدرين ما شاء الله عليج تخبلين
كمره:من ذوقج تسلمين وعاشت الأسامي
هبه: مشكوره انتي منين
الخاتونه 👸🏼
