الخاتونه 👸🏼
قصه فات الاوان الحلقه 13
ام كمره: هسه راح اصدكج واسكت وان سمعت غير سالفه والله حسابج يصير غير شكل
بيت الشيخ
شداد: جنت كاعد بالمضيف بيت الشيخ بس احمد ماكو ولا الشيخ بس كلبي لاجمني ما اعرف شنو سالفته مقبوض احس شي راح يصير جانو كاعدين بس عادل وسام ولد الشيخ طبعا عمار ابن الشيخ الثالث يدرس بغداد اترخصت منهم وطلعت كلت خل اروح لهديه اسألها على كمرتي دخلت لبيت الشيخ للمطبخ واشوف هديه بس من شافتني ظل وجها ينطي الوان طبعا هديه تعرف انه احب كمره وكم مره دزيتها تحاجيه بس هي شكول كلبها حجر الله يهديها بس علي
هديه: ها يخوي كول شنو رايد وانه احضره الك
شداد: هديه تعرفين شريد كلبي خلصان ساعديني وقنعيه من اروحلج فدوه
هديه: خويه سد هاي السالفه ولا تفتحه بعد
شداد: ليش خويه لهل درجه كارهتني
هديه: خويه ما اكدر احجي هنا البيت كله خدم ونسوان طابه طالعه روح يم الاسطبل وانه جايه وراك
شداد: صاير شي جايد مو
هديه: اي خويه روح وانه جايه بس اطلع منا وسد السالفه لحد يسمعك
شداد: رحت يم الاسطبل واجتني هديه وهي خايفه
هديه: خويه كمره انساها وشيلها من بالك نهائيا
شداد: شلون انساها وشلون اكدر وليش فهميني
هديه: راح اكلك بس والي يسلمك لا تعصب ولا تسوي شي تندم علي
شداد: كولي وفضيني مو كلبي ظل يوجعني
هديه: اليوم بيت الشيخ راحو يخطبون كمره للشيخ احمد
شداد: شلون شكلتي مستحيل احمد ما صارله كم يوم من اجى شلون وشصار حجيت بصياح
هديه: اششششش يخوي نصي حسك لحد يسمعك وتصير فضيحه
شداد : شنصي ولج النار شعلت بكلبي شلون اطفيا كليلي شلون وليش ما عندي علم ليش ما كلتي
هديه: شكول ياخوي انت تحبها صدك بس هي لا وجم مره حجيت وياها وهي ترفضك حبك من طرف واحد حاول تنسى وتسد السالفه وانت تعرف الشيخ احمد هو صاحبك واخوك وعضيدك وهي راح تصير من نصيبه ومن يسمعك الشيخ تحجي بيها ويعرف انت تحبها تكبر السالفه وتصير موش زينه
شداد : ما تحملت الي اسمعه كعدت بالكاع على ركبي وابجي بحركه اي ابجي وانه رجال ابجي من كل ✬ڪـلبي احبها يا ناس احبها ومنو اخذها منو اخوي وعضيدي لا يا ربي شهل عقاب هذا
احمد: رجعت من بيت كمره طبعا الشيخ والشيخه كلش فرحانين وانه عادي عندي ما فرحان مو من كلبي بس شسوي تورطت تذكرت العنود بس هي الي احجيلها همومي وصلنا للبيت كبل رحت للأسطبل متلهف على شوفتها
واشوف شداد راكع على ركبه ويبجي بحركه واكفه يمه هديه وصحت علي
شداد شبيك يا خوي صاير شي
شداد: سمعت صوت احمد ما ردت ادور واشوفه بس هو اكيد سمع شهكاتي النار بكلبي تلسع منا رفيجي ومنا حبي ما اعرف شسوي ما رديت عليه
احمد: جاوبني بيك شي احجي لا تورم كلبي
شداد:شحجي يا خوي ما كو شي
احمد: شهل الحجي انه طفل كدامك كول ماكو مشكله ما الها حل
شداد: الا مشكلتي يا شيخ ًحتٍٍٍى انت الشيخ ما تكدر تحلها
احمد: افاااا عليك انت بس كلي شنو هي والباقي علي
شداد: مشكلتي كلبي يا شيخ خليه والي يسلمك جاي ينزف
احمد: شهل الحجي كلي السالفه شنهي انت تحب ومنو هي وشصار
شداد: اووووف يا شيخ عوفني لخاطر محمد عوفني بهمي خل اداوي جروحي بروحي اذا تعتبرني اخوك عوفني ولا تسأل من تسأل تزيد النار ما تنكص
احمد: هذا هو ما راح اسأل بس كوم غسل وجهك وروح ارتاح والصباح رباح ويصير خير بس اتأكد راح اعرف سالفتك
هديه : من شفت الشيخ احمد اجى على اسطبل انهزمت بس هو شافني من يسألني شكول يا ربي ساعدني شويه وما اسمع الا صوته يرعد بسمي ظليت ارجف شسوي
احمد: راح شداد بس كسر كلبي لازم اساعده بش شلون خل اول مره اعرف سالفته ⊱# ݥُـٰـُﺂكو غير هديه اكيد تعرف سالفته لجن ليش واكفه وياه نص الليل وبمكان محد يشوفهم
دخلت للبيت ادور عليها كلولي بالمطبخ صحت عليها ودخلت للمطبخ وبصوت واحد كلت كل الخدم يطلع تبقى بس هديه
هديه: هااا شيخ رايد شي بس بخوف
احمد: تحجيلي كل شي وبدون لف ودوران
هديه: شيخ والله ما اعرف شي
احمد: هديييييييه بصوت عالي رج المطبخ رج
هديه: شيخ والله حالي حالك طلعت ادور على ابوي ما لكيته بالباب كلت خل اشوفه بالاسطبل ورحت وشفت شداد حالته تكسر الخاطر وسألته بس هو ما جاوبني
احمد: هديه شهل فلم هذا ترديني اصدكج احجي الصار كلله ولا تخليني اقسي وياج كولي وفضيها
هديه: شيخ صدكني هذا الصار واذا ما مصدك روح واسأله
احمد: راح اقنع روحي واصدكج بس قسما بالله ان طلع جذب وطلعت السالفه جايده ما تلومين الا نفسج فاهمه
هديه: اي شيخ فاهمه
احمد: صعدت فوك وانه الوب محترك حرك شداد مو بس ابن خالي ورفيج عمري واعز من اخوي لازم اعرف سالفته هو ما ضم علي شي لحد اليوم ليش هل السالفه غامضه الله اعلم بس يجي وكتها انسطرت من التفكير منا شداد ومنا سالفة زواجي بكمره احس عقلي وكف من التفكير خل انام احسن الي رحت سبحت ونمت
كمره: كعدت ثاني يوم على صياح امي هاي صارت عادتها يوميه طبعا من سالفه الشيخ المغرور انه نومي قل اظل كاعده لوجه الصبح حسبه تاخذني وحسبه تجيبني واكول شراح يسوي بيه هل الشيخ يا ربي ما تصير معجزه واخلص منه
هااا يمه شصاير على وجه الصبح
ام كمره: يا صبح دكولي ظهر الساعه راح تصير العشره كومي تريكي وسبحي راح تجي الشيخه حتى نروح للسوك
كمره: شسوي جايه ويانا
ام كمره: جا غير ام العريس ولازم تجهزج
كمره: كايمه يمه
واجت الشيخه ورحنا للسوك وما خلت شي ما اشترته بس انه ولا الي نفس لأي شي يراووني الي اشتروه وانه بس اهز براسي وبعدين رحنا على البدلات الصراحه هي ذوقها كلش حلو اختارتلي فستان لون ماروني حوريه مفتوحه من فوك قليل وطويل بس يفصل الجسم وبعدين رحنا للصالون وهم اتفقت وياهم على يوم الخميس ورجعنا للذهب اشترت كل شي وما ننسى الحلقات
ومرت الايام عادي بين تجهيز وتحضير الا ان اجى يوم الخميس الي هو يوم اعدامي مو زواجي
الخاتونه 👸🏼
