الخاتونه 👸🏼
قصه فات الاوان الحلقه
الجزء الثاني الحلقة 131
دزيت رساله لوسام وتالي غلقت التلفون وكلت بالرساله
وسام انه قررت اترك الدوام لا تجي علي بعد
وسام: هاي شبيها
هسه بالله شكل لأحمد
يووو انه شعلي اكله وهو يتصرف
اخذت التلفون دكيت علي ما شاله يجوز مشغول
احسن شي احول الرساله مالتها اله وهو يتصرف
حولت الرساله اله
وجربت ادك عليها اسألها ليش هيج سوت
دكيت جهازها مغلق
الظاهر اليوم احمد مثكل عليها هواي
بس احسن انه اليوم من شفتها احس الدم وصل لراسي
بس ما الي سلطه عليها
بس حرامات السنه تقريبا خلصت راح تضيعها على الخالي بلاش
احمد: جنت بالمستشفى اضبط الوضع ويه الدكتور المختص بحالة هند
وأسجل دخولها وانشغلت كلش والتلفون مسوي صامت
رجعت للفندق هلكان من التعب والفره
دخلت اسبحت حتى شوي اريح جسمي وتالي طلعت مريت على هند
وامها وسألت عليهم وبلغتها باجر ندخل للمستشفى حتى تبدي فترة العلاج
ورجعت امدد روحي اجت أبالي البلوه مالتي اشتاقيت اشوف صورتها اليوم شطالعه بت الكلب اذا ما اندمج على هذا لبسج بس اصبريلي
والله لو تسمع من اكول بت الكلب لو يمها طابوكه تشمرها علي
فتحت صورتها وظليت اكبرها واباوع لوجها ولحسنها
اوففف عطبت كلبي هل كمره
وانوب العيون وخطت الكحله تجفل اكبر واحد
الله اليعلم اليوم شكم واحد صفن بهل العيون
اذا ما كسرت شكو قلم كحل عندج ما اطلع انه احمد
دخلت على الرسائل شفت رساله من وسام
قريتها وانه وكفت على حيلي
فركت وجهي بعصبيه وكلت
تالي وياج ليش هذا العناد كله بس اريد افتهم
اخذت نفس وفكرت زين ما لازم أتسرع
لازم احسبها صح واسبقها بخطوه
العنود جانت اكثر عناد منها وروضتها
ٲℓانــتيہ هم لا تخافين وين ترحين مني اروضج اروضج
والا اكسر عنادج واخليج تفكرين الف مره قبل ما تخطين اي خطوه
دكيت على وسام استفسر منه
وسام: الوووو هلا بالشيخ شلونك
شفت الهجوم المباغت الك
احمد: الحمدلله
هههههه
لا تخاف عندي هواي دفاعات
ما عرفت ليش هيج قررت
وسام: شمدريني ادك عليها جهازها مغلق
بس يجوز انت ثخنتها اليوم وياها
احمد: تستاهل واكثر بعد اسوي
شتريدني تسوي عرض واظل واكف متفرج
بيها بخت مو يمها
فلتت هل مره بس خل تصبرلي
وسام: ههههه
لا شيخ بداعة عزيز كلبك عوفها هل فتره خليها على راحتها
ترى فراكك مو هين عليها
ومن ضيمها تسوي هيج
هسه تحس بروحها غلطانه ومنها ومن كيفها ترجع تداوم
احمد:لا ما تعرفها انت من تعاند
لو مطي ينطح مطي هم ما تكسر عنادها
بس انه اعرف شلون اخليها ترجع بس ما اجبرها
وهسه اخاف ترجع تخابر عليك
ما اوصيك بعد هل مره افتح عيونك عدل
وسام: صار شيخ تدلل انت ومرتك
احمد: رجعت دكيت على اخوها صلاح هو الوحيد الي يكدر يقنعها
اعرفها تاخذ حجايته
صلاح: الووو
هلا شيخ احمد حمدلله على سلامتك
احمد: الله يسلمك صلاح
ردت اسأل على كمره وجهازها مغلق
صلاح: ما ادري شيخ هي من اجت من الكليه لهسه نايمه حتى غدا ما تغدت
ورجعت من وكت ما نعرف شبيها وما ردنا نضغط عليها بعد اخر شي الصارلها تركناها على راحتها
راح انطيها خبر حتى تحجي وياها
احمد: لا ما اريد احجي وياها بس ردت اعرف اخبارها منك وردت اكلك
اليوم دزت خبر لوسام تريد تترك الدوام
اريدك تعرفلي ليش هيج سوت وبنفس الوقت تقنعها ما تترك لأن هذا مستقبلها حرام تضيعه بتصرفاتها الطايشه
انه ادري بيها تريد تعاقبني بهاي الطريقه وتريد تستفزني
بس بالعكس انه افرح من تظل بالبيت حتى ما تطلع ويظل بالي يمها
بس السنه ما ظللها شي وتخلص وتروح عليها
اريدك تقنعها بدون ضغط وجبر
وانه اعرف معزتك عدها وما تكدر ترد كلامك
صلاح: الصراحه فاجأتني اول مره اسمع تريد تترك الدوام لحد الان ما حجت شي
لا يظل بالك هسه ادخل واعرف كلشي منها
احمد:اعتمد ﻋﻠﻴﻚ
بس لا توصللها خبر انه كتلك تقنعها
حاول تفهمها انو انه ما همني اذا داومت او تركت بالعكس احسه حمل وانزاح عني
ماشي
بس بهل طريقه ياله تقتنع
صلاح: صار شيخ راح احجي وياها ومن ترجع بقرارها انطيك خبر
احمد: ماشي انتظر منك خبر
كمره:ظليت كاعده بالغرفه ما طلعت ابد خايفه من قراري يمكن تسرعت
بس بعد ما اكدر ارجع اكيد هسه الخبر وصله
هما اخوانه ما يضمون علي شي
بس حتى لو عرف شراح يسوي يـ؏ـنـي
سمعت دكت باب نفضت راسي من التفكير كلت تفضل
دخل صلاح شافني وابتسم وكال
صلاح: اليوم شبيه الكمر خانس وحابس ورحه
صاير شي واحنا ما ندري
كمره: لا ماكو شي
صلاح: متأكده
وجهج دائما يفضحج تعرفين روحج من تضمين شي بسرعه يحتقن
كمره:انت بس التعرفني هيج
اما الباقين بسرعه تعبر عليهم
شتريد تعرف
صلاح: اسأل عليج ما يصير
ودواج شربتي لو هم ركنتي
كمره: ماكو احد يغثني بعد ليش اشربه
اصلا هو للضروره ينشرب
صلاح: وانتي ما ينعرف شوكت تهجم عليج الحاله
شربي للأحتياط
كمره: صار من عيوني هسه اشربه
أوامر ثانيه
صلاح: باجر انه اوديج للدوام ليش تعبين حماج
كمره: هاااا
بس انه باجر ما اروح
