الخاتونه 👸🏼
قصه فات الاوان الحلقه
الجزء الثاني الحلقة 96
لو جانت وحده عاديه يجوز أتقبل
بس هاي حبيبته الي ترك كلشي وهج على مودها
الي عانى وظل عاشكها سنين
شلون اشوفهم سويه شلون اتحمل
بعد التفكير الكتلني غفيت فزيت الصبح باوعت الجربايه على حالها
يـ؏ـنـي ما اجى هنا البارحه تلكاه راحلها
تالي اذكرت اليوم شراح يصير اليوم راح أخسره نهائيا
ظليت اكل بروحي اخذ الغرفه طول وعرض شلون يا ربي شسوي
كلت خل انزل اشوف الوضع
نزلت جوا للمطبخ لكيت الشيخه الي ما باوعت بوجهي ولا حتى ردت السلام
عذرته شسويلها شافتني الحجيه صاحتلي
ليلى: تعاي بنيتي يمي رايدتج بشغله
كمره: رحت كعدت يمها وكتلها خير حجيه
ليلى:خير بوجهج تريكي اول مره ولا تكولين ما اشتهي
كمره: اكلت شوي وكتلها خلصت كولي حجيه
ليلى: بنيتي راح انصحج لله
تركي عنج كل السوالف وديري بالج على رجلج ترى يحبج ويموت عليج
جنت شاكه بي بس من شفت ولا مره دخل على هند وامها وسأل عليهم من جابهم لسه وكل شويه يسأل عليج هديه خايبه يموت عليج وحاير شيسوي
كلشي لخاطرج ويضوج وما ياكل من شافج ما تاكلين
نصيحه مني الج لا تخسرين واحد يحبج هلكد وتضيعينه بتصرفاتج الطايشه
وانتي وراج ناس يدورن خرابكم
كمره: ما رديت عليها اصلا اكتفيت أهز براسي بس
بعد ما عندي اي حيل وخصوصا من سمعت كلام الشيخه عني امس
بس كتلها ما يحتاج توصيني
اصلا مالي كلمه هنا قبلت وإلا ما قبلت شيريد يسوي خل يسوي
ليلى:اووووف منج يمه موش بت توغفين على الكلب
يبس لساني وانه احجي وتالي هذا ردج الي
ٲℓانــتيہ بعد بكيفج انه هم راح اسحب ايدي منج
هديه: كمره اهلج اجو بره يردون يشوفوج
كمره: بس سمعت اسم اهلي طفرت بسرعه دخلت للصاله شفت امي وابوي وصلاح وعباس ركضت لأمي حضنتها بعد ما دققت منو موجود عبالي راح اخلص ظليت ابجي بحضنها مثل الطفل المضيع اهله رفعت راسي وحجت
ام صلاح: كافي بجي بعد روحي عليمن كل هذا
أجينا نشوفج تكضيها علينا بجي
كمره: شنو جايين تشوفوني يـ؏ـنـي ما جايين تاخذوني
ابو صلاح:وين ناخذج بويه هنا بيتج تردين تجينا زياره اهلا وسهلا
بس مال تجين زعلانه لا بويه
كمره:كمت وكفت على حيلي ما مصدكه درت شفت احمد كاعد ويهز برجله
يـ؏ـنـي غاسل دماغ اهلي يـ؏ـنـي يمكن حتى الحجي بعد ما يفيد جاي اتعب روحي على الخالي بلاش
مسحت دموعي درت وجهي جاي اروح وكفني صوت صلاح
صلاح: كمره شهل تصرف هذا
غمضت عيوني ما اريد ادور واشوف بعد واحد بيهم جاي اتحرك
اجى ودارني علي
صلاح: مو جاي احجي وياج ليش ما تحترمين احد
كمره: احجي اسمعك كول شتريد
صلاح:كمره ترى هواي جاي تتمادين اريد اكلج الي سواه الشيخ عين العقل
لو انه بمكانه اسوي ازيد منه احنا ما ربيناج على الحقاره
كمره:انت كلت لو انت بمكانه بس مــُ̲ـٰعَ الاسف انت مو بمكانه اذا خلصت حجي كلي حتى ارجع للسجن الي انفرض علي
ام صلاح: ولج يمه شجرالج ليش هيج متغيره هواي
صلاح: يمه لا تعبين روحج الظاهر الحجي وياها ما يفيد مو صوجها صوجنا احنا أجينا حتى نشوفها
كمره: لا تكول اجيت تشوفني
اجيت حتى تقنعني ارضى أعيش بذل هنا
ما حسيت غير على راجدي اجاني من صلاح فرني فر طفر علي عباس والشيخ
عباس : شجرالك يخوي من يمته انت تمد ايدك عليها
الشيخ:ابني اهدا مو هيج الحل شلون تضربها كدامنا
ابو صلاح:اخوها وضربها خل يأدبها شيخ
طولان لسانها ويرادله كص
صلاح: خل تولي شيخ
ٲℓانــتيہ بس كليلي عليمن شايخه تحترمين روحج وتسكتين
رجلج ما غلط ولا زنى ولا سوى شي حرام يجوز بالبدايه جنت متررد
بس هسه مقتنع كلش بعد تصرفاتج الي شفتها هسه
كمره: ما انطيت اي رد فعل جنت خاله الدوه بجيب الدشداشه حسيت الخنكه اجتلي بعدت روحي عن صلاح بسرعه طلعت الدوه بس ايدي كلها ترجف
فتحت حبايه طاحت بالكاع ما سيطرت عليها ركض علي وسام جان كاعد يمهم اجى اخذه مني فتح الي حبايه وانطاني جان اكو ماي جايبينه لأهلي اخذه وانطانياه وكلي شربي اخذته بس كوه كاضه الكلاص ايدي ترجف
عاد اجى عباس راد يكض ايدي دفعته عني شربت الدوه ومشيت ما درت على اي واحد بيهم رجعت للغرفه اناشغ وابجي انكطع اخر امل عندي
احمد قضى على كل شي بحياتي وجبرني أتقبل كلشي غصبن عني
هو جان كاعد يمهم بس ولا عبالك موجود حتى ما اتحرك ساكن
ولا كلف روحه
احمد: بقى عندي امل واحد وهو اهله رحنا انه وابوي سولفت الهم كل السالفه بالبدايه سكتوا ما انطوا اي ردة فعل بعدين ابوي حجى وياهم قنعهم
اقترحت عليهم يجون حتى بلكي الله وتقتنع بس اتفاجأت بيها شنو من عناد شايله حتى اهلها ما اكترثت الهم بس من شفت اخوها ضربها انه هنا كأنما
ضربني بكلبي ومن شفتها تخربطت درت وجهي عنها لأن دمعت عيني عليها ما ردتها تشوف دمعتي
انه الشيخ احمد وكعت دمعتي اول تالي جنت ناسي حتى شلون ابجي
احس كلبي انمرد عليها بدي اكوم احضنها وامسح خدها الضربها بي
شفتها راحت كمت وكتله
شوف صلاح ادري انت اخوها والك حق عليها بس مال تضربها وكدامي
لا هاي واكفه سويتها هسه بس ان عدتها مره ثانيه
انه جبتكم حتى تقنعوها مو تضربوها كادر انه اضربها واكسر راسه بس بعينك شفت حالتها
ابو صلاح: عمي اهدأ خليها تتعلم درس من الصار
