الخاتونه 👸🏼
قصه فات الاوان الحلقه 15
ضربني راجدي بعدها كام بسرعه وكل لأمه سوي طريق خل اطلع بس حسيته ينافخ شلون الماي البارد وطاح على كلبي
حجيت بكلبي حل بيك وبعد وبعد اذا ما خبلتك ما اتسمى كمره وبعد ما
طلعت العالم حسيت بتعب ردت بس انام وصاحت علي خالتي كلتلي انتي اليوم تعبتي روحي نامي وانه اليوم ظاله ابات يمكم وما صدكت خالتي كالت هيج بسرعه ركضت سبحت وبدلت ونمت نومة اهل الكهف
شداد:من يوم الي عرفت كمره خطبها رفيج عمري واخوي وانه فاصل عن الدنيا الحب يوجع وخصوصا من طرف واحد ادري بيها ما تحبني جنت متمني نظره وحده بس من عدها وجنت الحكها وين ما تروح وادري بيها تطلع يوميه تروح لبوها واخوتها بالزرع او تسرح بالحلال مراقب كل خطواتها ما يوم غابت عن نظري واكثر من مره صارحتها ودزيت هديه حتى تقنعها وهي ولا كأنها وفاتحت ابوها اكثر من مره بس هو يسد السالفه بحجة انو هي ترفض وهو ما يكدر يجبرها جان املي الوحيد كلت من يجي احمد افاتحه بالموضوع هو وعمي الشيخ يرحون يخطبوها الي عسى ولعل تقبل بس جان احمد اسرع مني ما توقعت تروح مني بهل السرعه صح هسه انه موجوع ومتمني الموت بس بنفس الوقت شلون راح احط عيوني بعيون احمد شكله وانه متأكد هسه يسألني اتمنى اشلع كلبي واشمره واحط بمكانه حجاره ونعله على الحب والي يحب بعد تعمدت ما اروح بيوم الخطبه ما اكدر اواجها حتى لو ادوس على كلبي هم ابقى مكشوف وكدام منو كدام احمد واروح لخطبة منو خطبة كمرتي سنين وانه اتانيها وتروح بلمح البصر اخ يادنيا انتي ابد مو عادله
احمد: الكل جان فرحان الا انه صح ما بينت بس بداخلي ما عندي شعور ابد ما اكدر افرح او اخاف افرح وارجع الجم جروحي الي لسه ما طابت او يمكن لأن جبرت وحده ما تحبني وتأكدت منها اليوم ما جانت فرحانه وبنفس الوقت خايفه ما اعرف ليش تمنيت تباوعلي ولو نظره وحده بس هي شنو عبالك حجاره وكاعده وضوجتني من دارت وجها عني سيطرت على غضبي كوه ما اكوم هسه كدام العالم وأعلمه شلون تصرف وياي الصراحه هاي اول مره اجرب وحده ترفضني كل الي اعرفهن هنه يركضن وراي حتى من حبيت اول حب هي بادرت بالأول وانه جنت مراهق قليل خبره تعلقت بيها وصارت حب حياتي بس كمره تختلف بيها شي مميز يجذبك
يخليك لا اراديا تصفن بيها حتى من تحجي بودك ما تسكت حتى لو جان اسلوبها مستفز وجريئ ما اريد احبها واتعلق بيها وبنفس الوقت مثل ما كالت امي يمكن هي الي تطيب جروحك بس شلون وهي تكرهني جنت سارح وافكر من بعد ما رجعت بالحديقه لوحدي وصافن فززني صوت الوالده
الشيخه: بالمبارك يمه يوم الي اشوف جهالك تارسين البيت
احمد: الله يبارك بيج يمه
الشيخه: ليش كاعد وصافن لوحدك على الاقل اكعد بالمضيف يم اخوانك وابوك
احمد: مالي خلك يمه
الشيخه: ليش يمه اليوم خطبتك المفروض فرحان حالك حال اي شخص بيوم خطبته
احمد: ترديني افرح شـْ◌ـّـْ﴿💜﴾ـّْـ◌ّـْلـّوْنّ وانتي تعرفين كلش زين ما يدوملي الفرح
الشيخه: يمه ليش تصعبها على روحك ما دام خطيت هل الخطوه صدكني تنحل وتنسى
احمد: ليش هو النسيان سهل
الشيخه: جا شلون فهمني تبقى هيج تاكل بروحك يمه العمر كاضي صدكني يجيك يوم وتتندم على كل يوم ضيعته من عمرك توكل على الله وربك يكول أسعى يا عبدي وانه اعينك
احمد : ونعم بالله
الشيخه: وكمرة مو قاصره اليوم طلعت وصف وكل النسوان اتعجبن عليه وعلى جماله وما مصدكين شلون قبلت تزوج وكلها تكول بس الشيخ كدر يكسر عنادها يمه دير بالك عليها ولا تنسى هي وحيدة اهلها ومدلله عدهم وهي هم دارسه ولو مو مكان دراستها بعيد جان كملت جامعه وانت دارس ومثقف ولو ردت تكمل الجامعه محد راح يمانع واولهم انه
احمد: يمه انه ما معترض عليها ولا عندي طلبات اصلا انه جنت معترض على فكرة الزواج اصلا انه قبلت لخاطرج ولخاطر ابوي جنت ناوي اكلج تخطبيلي اي وحده بس هي عاندت وانه ما احب احد يعاندني وطكت خبالاتي عليها من رفضتني وهسه شلون ترديني اخليها تكمل دراستها شلون اامن
الشيخه: انت راح تتعين هنا وخليها تدرس يمك وعينك عليها
احمد: مستحيل يمه لازم على الاقل تروح تدرس سنه بغداد ياله تكدر تنقل للبصره
الشيخه: يـ؏ـنـي ما يصير تدرس هنا
احمد: يصير بس لازم مو نفس الكليه تختار كليه اقل
الشيخه: خلص الي تريده يصير وانت هم فكر لا تتستعجل
احمد: الله كريم
وهسه انه اترخص منج رايح اشوف شداد وين صفى بي الدهر اليوم كله مختفي بس والله من الكاه الا اشعل عشيرته شعل بس خل اشوفه ولا تكولين ابن اخوي
الشيخه: انه هم زعلانه علي شلون بهيج يوم يختفي أيدك الك
احمد: ظل بالي على شداد كلش ما خليت واحد ما سألت علي حتى رحت لبيت خالي اسأل وهو ماكو بس لو اعرف السبب شنو على الاقل كلبي يرتاح
لازم صايره سالفه جايده ولا هو مستحيل يتركني بهيج يوم بس وين يروح هم يجي يوم ويطلع
كمره: كعدت الصبح شبعانه نوم حتى عيوني مورمه وصايرات يخوفن لأن هنه كبار ومورمات شفت وجهي بالمرايه اخترعت معقوله هاي انه فرق بين الامس واليوم غسلت وجهي ورحت سويت ريوك شويه وكعدت امي
الخاتونه 👸🏼
