مساء الخير والسعادة عليكم جميعا
تعليقات على فقرة القصة والتصويت لأستمرارنا بالنشر
غرام.. الليل كان اشبه بفجوة لفرط التخيل لدي
الساعة ب4 الفجر حسيت اكو حركة بالبيت كمت واني مامهتمة لان اكيد حاليا وقت صلاة وديصلون الصبح
لكن كانت هذه الحركة متوترة اشبه بخوف اشخاص داخل البيت طلعت من غرفتي نظري صار على امي وهي بالصالة ودتبجي على والدي دموعها بكتمان
..شصاير شبي بابا وليش نايمين هنا بالصالة
جاوبتني والدموع مغوركة عيونها مااعرف من بداية الليل وارتفعت حرارتة حيل ويون من وجع راسة ومجاي تنزل حرارتة نهائي احسة شعلة نار
خفت من كلامها تسللت عند رجلين ابوية واني اتلمسهن واهدئ امي انو مابي شي لكن نصدمت بدرجة حرارتة العالية كللش لدرجة ماخلتني اصبر ونظل كاعدين بالبيت هيج
ماما لازم ناخذة للمستشفى ميصير يبقى هيج حيموت من الحرارة
..ومنو ياخذنة شوفي الساعة ب4 الفجر حتى تكاسي ماكو
..لا شدعوة اكيد اكو تكاسي اطلعين انتي لو اني اروح اشوف واجيبة لباب البيت ونطلعة لبابا
..لا لا مو امان التكسي وانتي تعرفين بأبوج ميقبل روحي لبسي حجابج وركض لبيت عمج خلي يجي ياخذنة للمستشفى
..يمة يعني هسة شنو الفرق مابين التكسي وعمي دخليني اروح أجر تكسي ليش تخلينة نتأخر
..لا تعانديني كتلج كومي لبيت عمج بسرعة وخلي اجي وياج اني.. لا ليش تجين ترة بس فرعين بينة وبينهم.. مو اخاف عليج يايمة
.. ماما مو وقت خوف هم قريبين كلش راح اكوم اروح الهم.. يلا كومي
رحت لبست حجابي وطلعت لبيت عمي
طلعت على السريع اركض ضليت ادك بالباب محد يفتح ادك وادك وعبالك انشكت الكاع وبلعتهم مرت اكثر من ثلث ساعة ومحد فتحلي الباب
كمت حييل ادكك لحد مافتح الباب ابن عمي
.. اي اي جاي صببر
فتح الباب وهو منعس غررام شتسوين بهل ساعة هاي وبالشارع؟؟
.. امجد بسرعة كعدلي عمي خلي ياخذنة للمستشفى ابوية متخربط كلش ومو مال نعوفة بالبيت
.. ليش خير شبي عمي
.. مااعرف بس حرارتة ارتفعت وحتى كلام ميكدر يتكلم ويانة
.. خلص اني اخذكم بس ددخلي جوة خلي ابدل واجي
.. امجد شنو تبدل صارلي ثلث ساعة اني واكفة هنا وهسة اكيد حتتأخر باللبس خلي نروح بسرعة
.. كتلج دخلي جوة بسرعه ابدل واجي
.. تمام بدل اني انتضرك هنا ليش ادخل
.. انتي ليش هلكد تعاندين كتلج دخلي وبلا كلام زايد شنو معناها اضلين برة بالشارع شو ددخلي بسرعة
دخلت جوة بالحديقة وهو صعد لغرفتة بدل وهم تأخر ربع ساعة گلبي لزمني وخفت على ابوية اكثر لو مأجرة تكسي ولا جاية الهم على هل تأخير ادري احنة رايحين للمستشفى هل تبديل شنو معناها؟؟
