مسائكم خير وسعادة
باوعلي وضل يخزر بية
جبل.. مرتضى شنو تريد منها؟
.. مارايد شي بعدين شكو تسأل
.. لان ماكو واحد يطلب يحجي وية شخص والدنيا ب3 ونص
مرتضى.. اعتقد هذا الشي خاص بية
.. لا ماكو شي خاص بيك هاي طفلة لتحاول ابدا دير بالك مرتضى
غرام.. شتقصد؟
جبل.. انتي دخلي جوة
.. بس ثواني
.. كتتتتلج دخلي جوة
.. تمام تمام داخلة لتصيح راح يكعدون
دخلت وهمة ضلو يحجون صوتهم جان ناصي ماكدرت اسمع شوية واندكت الباب ودخل جبل
جبل.. شي متناقض امنعج تروحين لغرفة مرتضى وهسة اجي ادخل لغرفتج بس رايد احجي وياج
.. تفضل؟
.. غرام ديري بالج لتأمنين ولا تنطين مجال لشخص
.. شكرا اعرف هل معلومة
.. اي مبين كلش تعرفين من قبل شوية دزلج رسالة طفرتي حتى تصعديلة بسرعة
.. عبالي صار شي بعدين اني اعرف شلون اتصرف
.. غرام ليكون لسانج سليط وية الكل هسة اني مااعرفج ولا اعرف شخصيتج بس سولفتلي عمتي ايمان عن حياتج اذا انتي ذكية اخذي بنصيحتي ولتنطين مجال لأي شخص
.. لتخاف ماراح انطي، بس بصفتك منو ولهل درجة خايف علية
.. بصفتي اخوج وعمتي امنتج يمي
.. ماشي شكرا
.. تنزلين تسويلي ريوك؟ جوعان كلش
.. شنو تريد اسويلك
.. بكيفج اي شي اني نازل اخلص جزء ال25 وانتي سويلي ريوك
.. اوك
نزلنة سوة هو راح يقرة قرآن واني كعدت بالمطبخ ادور على الغراض مااعرف وينهن يختفن كل يوم ويبدلن اماكهن هسة اريد طاوة صغيرة للبيض ماكو
اجة جبل وضل واكف بباب المطبخ
.. احم تردين مساعدة
.. مااعرف وين مكان الطاوة
.. على اساس اني اعرف وين
.. لعد هسة شلون اسويلك بيضة
.. مو الة بيض سويلي جاي وجبن
.. اوك اذا هيج سهلة
.. خو كيفتي انتي
.. طبعا
سويتلة الجاي وطلعتة الجبن وحميت الخبز وهو بعدة واكف بباب المطبخ وبيدة السبحة ومنزل راسة
.. تفضل خلصت
.. عاشت ايدج، يلا تعالي اكلي وياي
.. لا مااشتهي اني
.. كتلج تعالي
.. والله مااشتهي
.. هسة تجين لو شلون
جريت الكرسي وكعدت
جبل.. باجر عندج كلية منو راح يوصلج؟
.. مااعرف بس راح احاجي عمتي ايمان بلكت تشوفلي شغلة اشتغلها حتى بفلوس الشغل احط خط للكلية
.. ليش احنة مو بعينج وتشتغلين هاي عمامج وولد عمامج شكدهم تروحين تشتغلين علمود خط؟
.. اريد اعتمد على نفسي
..سمعيني، اسمج غرام مو؟
.. اي غرام
.. سمعي غرام حتى نكون واقعيين اكثر انتي حاليا طفلة صح عقلج جبير وتحمل شغلات اكبر من عمرة بس مازلتي طفلة مااريدج تضوجين من كلمة طفلة لان بالحقيقة هي متضوج كلمة ادل على البرائة وياريتنة كلنا اطفال
.. لا على شنو اضوج واني معترفة بنفسي بعدني صغيرة
.. عفية، والصغار لازم يبتعدون من شنو؟
.. من شنو؟
..من الارتباط والحب حتى ليشوش عقلهم
.. اها تمام
.. اي اريدج ادخلين للكلية فقط للدراسة حتى صداقة لتكونيين مجتمع الكلية مجتمع خطر احيانا يضر، عندج نور وغيث هناك وياج بالكلية واذا حتاجيتي شي خابري على سامر 24 ساعة فارغ هذا
.. تمام، بس اريد اسألك انت طب عام؟
.. اي
.. يا تخصص؟
.. باطنية
.. حققت حلمك لو حلم اهلك بالطبية
تنهد وكال حلم امي بعدها اترخص وكام لغرفتة
اني هم غسلت الماعين ورتبت المطبخ وصعدت لغرفتي
ضليت كاعدة ماجايني نوم لحد ماصارت ب10 الصبح نزلت ماجان اكو شي مر اليوم عادي لحد ماصار الليل واليوم عيد ميلاد سامر
عمامي وجدي طلعو كلهم بقة بس سامر ومرتضى
جبل وغيث وعلي جانو طالعين او ميردون يحضرون العيد ميلاد ميحبون كعدات البنات، وسامر انجبر يكعد لان عيد ميلادة ومرتضى ماجان عندة شغل
صعدت بدلت لبست ملابس محجابات سود عادية ولفيت الحجاب ونزلت
نور.. لج اليوم عيد ميلاد ليش لابسة اسود هيج وماحاطة مكياج
.. هيج اريح الي
.. يمعودة صدك جذب دصعدي لبسيلج شغلة مرتبة وتعالي احطلج مكياج
.. نور تعرفين اني حزينة واهلي بعدهم حتى سنة ماطلعت مالتهم شلون ترديني هيج اسوي
.. يمعودة ترة الحزن بالكلب
.. واني كلبي خلصان مابي حيل يرتب ويمكيج
نور.. والله لو مامخبوصة بالتجهيز جان جريتج اني فوك وسويتلج
سوينة العيد ميلاد وكطعو الكيك واكثر شخص جان فرحان هي نور وفرح
مااعرف ليش يحبن سامر لهل درجة
سامر.. غرام كومي سويلي جاي بروح امج وكليلي طماطة جوعان
ايمان.. لعد هاي مو الكيك كبالك والعصاير متاكل
.. عمة ذني ميشبعن المعدة اريد خبز اني خبز هسة دكوملي غرام وتسويلي اطيب صينية من طماطة وبتيتة وبيذنجان وجاي
غرام.. مو ستوها جانت بس طماطة شو هسة لحكنها خواتها
.. اي قابل وحدها تكعد بالمعدة ميصير لازم وياها خواتها
.. هههه صار هسة اسويلك
كمت للمطبخ وبديت احضرلة العشة
اجة مرتضى وجر الكرسي وكعد قريب من يمي
.. ماهتميت الة وسويت شغلي
ضل يسألني اسئلة واني اجاوبة بشكل مختصر
كمت حتى اغسل الخيار على السنك جان يجي بصفي كلش وكعد يغسل بأيدة
جبل.. احم ياالله ياالله
دخل جبل وشاف مرتضى واكف بصفي بسرعة عقج وجهة وضاج دخل ليجوة
غرام.. اوي شسويلة شيريد ياخذ نظرة خلي ياخذ اهم شي مامسوية غلط اني
عاد كملت العشة وهذا مرتضى بعدة كاعد يمي من طلعت من المطبخ هو هم طلع
وديت الاكل السامر والبنات بدن يشيلن غراض العيد ميلاد
اني حبيت اكعد شوية يم عمتي ايمان رحت لغرفتها شفت جبل واكف ويصيح يمها
جبل.. والله اذا شفت هيج منظر بعد اكسرة الراسها والله
دخلت هو شافني اول ماشافني جرني من ايدي وطلعني من الغرفة وضل يجر بية
غرام.. وين موديني جبل هدني
.. اشش
#ولاء الخزرجي
🖤🖤🖤🖤
