لم يكفهم بيعي

بارت 8

سلام عليكم

‏ولعلك زرعت نفسك في غير ارضك ، فذبلت.

((لطفا تفاعلكم وتعليقاتكم مهمة، مثل ماتطالبوني بالبارتات اطالبكم بالتعليقات على فقرات القصة)) 😘😘😘😘

غرام.. مبروك مقدما
شكرا الله يبارك بيج

غرام.. اني اترخص صاعدة لغرفتي ارتاح
.. اخذي راحتج

صعدت لغرفتي ومااعرف ليش صعدت جنت كاعده ومتونسة واشاهد تلفزيون
بس فاجأنة جبل بقرارة يلا ان شاء الله الله يكتبلة الخير ويحصلة بنت فعلا تصونة وتكون سند الة يستاهل كل الخير جبل

مرت الايام وخطبو الجبل بنت حلوة ومرتبة ومكملة دراسة

بهاي الفترة مااعرف ليش رجعتلي كل ذكريات اهلي وتمنيت لو ماجاية لبغداد اصلا رغم اني تحسنت اوضاعي شوية وحاولت اتأقلم وياهم لكن رجعت انتكست حالتي وللاسوء...

ماطالو فترة الخطوبة خلوها 3 اشهر البنية لطيفة جانت اجت مرتين لبيتنة وبسرعة ذبت ميانة ويانة وتأقلمت

اجة يوم العرس والبيت جان فعلا مخبوص وهوسة كلش، عفت كلشي من تنضيف وغسل اماعين وصعدت فوك لغرفتي وقفلتها تعبت حيل وضايجة ومكتأبة لزمت المخدة شبكتها وضليت ابجيي طلعت حركة كلبي كلها بالبجي يمكن مرت ساعتين كاملات واني دموعي ماوكفن من البجي وماحسة على نفسي صوتي جان عالي او لا

ندكت الباب كمت مسحت دموعي على السريع وعدلت نفسي وفتحت الباب طلع جبل بوجهي وهو بملابس العرس القاط

جبل.. شنو هذا الصوت مال البجي بيج شي؟ 
.. ها لا مابية شي وماجنت ابجي اصلا
.. اذا بيج شي كوليلي
.. تسلم ماكو شي
..جاي اكلج احجي، شوفي صوت البجي لوين واصل

.. لا بس مشتاقة لأهلي
.. اذا على هاي سهلة، يوم الخميس الجاي اوديج للنجف نزور ونروح للمقابر
.. ميحتاج

.. شلون ميحتاج مو كاعده تبجين وتنوحين علمودهم اي غير تزوريهم
.. اي، بس اروح وية عمتي ايمان افضل
.. براحتج يلا اني رايح

راح رجعت قفلت الباب وباوعت لنفسي بالمراية
اني دائما اوعد نفسي بعد ماابجي على اهلي واكون قوية من هل ناحية وتخوني دموعي، ميمر اسبوه اذا ماكاعدة ومنعزلة وحدي وابجي من حركة كلبي ثنينهم بنفس اليوم

لازم اقوي نفسي واتماشى وية الوضع لان اذا ابقى هيج اضعف، فتحت الكنتور وطلعت بدي وبنطرون ودخلت للحمام سبحت وبدلتهن وحطيت مكياج بسيط كلش ورفعت شعري ذيل حصان، اشوف هيج انسب شي الحفلة بالبيت ومو مال فستان وشكل البنطرون والبدي راقي ونازك وموالم للعرس

لبست عباية وبوشية لان حاطة مكياج مترهم اطلع هيج ونزلت

جانن كلهن مخلصات ومحضرات نفسهن، طبعا اني بالبيت منبوذة محد يحجي وياي ولا يسألني ونظراتهم الي مبينة انو اني مو مرغوبة بهذا المكان