بسم الله الرحمن الرحيم
لا تدع القراءة تلهيك عن الصلاة
الفصل الرابع عشر
🍁🍁🍁🍁🍁🍁🍁🍁🍁🍁
في المساء
جلس "دياب" في مجلس الرجال يتحدث مع شقيقه وابناء اعمامه عن احوال عملهم عندما نظر له "بدري" بسخرية وهو يقول
اني رايد اسألك سؤال يا دياب ورايدك تجاوبني طوالي
دياب: اسأل يا ابن عمي
بدري: انت ليه اتجدمت لتياما ومتجولش انك لحجت تحبها الفتره الجصيره دي لان الحديت ده ميدخلش العجل
دياب: وميدخلش العجل ليه يا بدري انت فاكر ان كل الناس جلبها جاسي وحجر كيفك
مكرم: براحه يا ولد عمي خلو الحديت يبجى براحه
دياب: الحديت ملهوش عازه من اصله يا مكرم ،انت خابر زين كيف بدري بيعامل خايته واني كنت ياكت وجافل خاشمي لانها كانت اجرب ليه مني لكن دلوجتي كلها كام يوم وهتبجى مرتي ووجتها حاجات كتير جوي هتتغير
بدري: الله الله دي الهانم لحجت تأكل بعجلك حلاوه
زين: ملهوش عازه الحديت بالطريقه دي يا بدري ،كفايلك يا ولد عمي
دياب: سيبه يا زين ،اني رايده يخرج كل اللي جواه من كره وحجد
بدري: وهو يقف: اني لا بكرهك ولا بحجد عليك ولد عمي ولو على تياما هي متسواش حداي اي حاجه
وقف "بدري" ليتجه الى خارج المجلس ولكن قبل ان يصل الى الباب قام "دياب" بالهجوم عليه فأصطدم ظهر "بدري" بالحائط بقوة وقبل ان يصرخ به غاضباً بادره "دياب" قائلاً بغضب
عمي وغلط زمان واتجوز ام تياما ومبجيش على اي حد هنه ودلوجت لما رجع بجيت تلجح كل لومك وحجدك وكرهك على تياما اللي محداهاش اي ذنب غير انها بنت ابوك ،خيتك اللي المفروض انك تجف في ظهرها في اي حاجه هي رايداها وتجف جدامها جدار تحميها من اي حاجه ممكن تأذيها انت اكتر واحد هي بتهابه وتخاف منيه ،انت رميت لومك على واحده محداهاش اي ذنب في اللي حوصل وبكره لما تجعد لحالك وتفكر زين هتعرف انك كنت غلطان ووجتها مش هتلاجي حد واجف في صفك وساعتها يبجى خساره فيك حتى الحديت يا ولد عمي
انهى "دياب" حديثه وقام بترك "بدري" سريعاً كما امسكه واتجه خارج المجلس دون ان يكترث بشقيقه الذي ينادي بأسمه او "مكرم" الذي يلحق به الى الخارج
🍁🍁🍁🍁🍁
جلست "فاطمة" بين "عزيزه" و "نجية" اللاتي تتحدثان عن امور المنزل عندما ابتسمت "عزيزه" وهي تنظر الى زوجة ابنها وتقول
كيفك دلوجت يا فاطنه يا بتي زينه؟
فاطمه: الحمد لله يا مرت عمي كلها كام يوم وادخل في الشهر الرابع
نجيه: على خير يا بتي ،تعرفي يا فاطنه اني لغابة دلوجت مش مصدجه ان امك لساتها عايشه ،انتي مش خابره كيف اني كنت حزنانه عليها
فاطمه: الحمد لله يا مرت عمي كل اللي حصل ده كان فضل ونعمه من عند ربنا والحمد لله ان مهران راجل عاجل وحكم عجله جبل اي حاجه تانيه
عزيزه: الحمد لله يا بتي ،جوليلي صحيح انتي بتتحدتي كيف مع تياما اني خابره انك مبتعرفيش انجليزي
فاطنه: في الحجيجه يا مرت عمي دايماً حبيبه او سماح يترجموا ليا اللي هي بتجوله
نجيه: اني مش خابره كيف هتحدت معاها وهي حديتها كله افرنجي ،كيف هنتحدت واني مبفهمش لغوتها ولا هي بتفهم لغوتي
فاطنه: الموضوع مش سهل كيف جولتك دلوجتك بس ممكن تتعلم تتحدت لغوتنا
