كرونيك جزائرية: قَاومِي منْ أجْلي....(مكتملة..)

😭الحلقة العاشرة😭

سلااام😘💖
  بعدما خرج منعندها بقات مع روحها و قررت انها تستمتع بكل لحظة من حياتها متخليش المرض يأثر عليها مهما يصرا تبقى دايما ضحكة في وجها و من هداك نهار تقربت بزاف من لؤي تقريبا ولا دايما عندها في شمبرا يخليها غير وقت لي يكون عنده خدمة اليوم عندها جلسة علاج ناضت فشلانة كارهة باسكو عارفة الألم لي غادي تعيشه اليوم بصح مالغي هاك و ناضت قررت انها تستحمل كلش كانت توجد في روحها حتى يجي عندها لؤي
لؤي: صباح الخير
ولاء: صباح النور 
لؤي: علاه راكي مشنفة علبالك بلي ميجيش عليك تشناف 
ولاء: مقدرتش نضحك
لؤي: ياك صحا و راح عندها حكمها من خدودها و كسلهم شغل راها تتبسم و تبسم معاها 
لؤي: هاك مليح و ضحك هي ضحكته خلاتها لا اراديا تتبسم و بدات تحس بقلبها يضرب بزاف طلعت عينيها و جات العين في العين بقاو شويا غايسين في بعضاهم منبعد هو جبد روحه عليها
لؤي: ايا وجدي روحك راني نقارعلك عند لباب ولاء منطقتش بحتى كلمة غير هزت راسها و اول ما خرج بقات تقرص في وجها و تروح على وجها
ولاء: مالكي تكالمي و حطت يدها على قلبها ماله قلبي علاه يضرب هاك منبعد نسقسي لؤي نقوله قلبي من يشوفك يولي يضرب بصح زعمة علاه هو كان برا شافها طولت عاود رجع عندها
لؤي: ايا بنتي الوقت راه
ولاء: مانيش بنتك راني جاية 
لؤي: شاقتلك على تشراك الفم 
ولاء: الله غالب ايا نروحوا  خرجوا من شمبرا و طريق كامل و هوما يحكوا و يضحكوا حتى وصلوا لا صال دخلت و جمعت في كرسي و علقولها دوا  ولاء شافت في لؤي و تبسمتله 
ولاء: تقد تروح دوك شوف مرضى تاوعك لا يقولوا سمحت فيهم
لؤي: ممم صحا راني رايح باي
ولاء: باي و دارتله باي بيديها خرج يتمشى و يحكي مع روحه
  لؤي: واه لازم تروح اشوف لمرضى متنساهمش لازم نشوفهم واه لازم بصح كون كاش متحتاج زعمة اااارب هاه بقى يتمشى و يحكي مع روحه حتى شاف جواد في طريق راح يجري عنده 
لؤي: عندك خدمة دوك 
جواد: ناس يقولوا بونجوغ كيراك
  لؤي: بونجوغ كيراك ايا قولي عندك خدمة دوك
جواد: لا هدا وين كملت لؤي شاف فيه و تبسم
لؤي: مالا غادي تروح عند مرضى تاوعي دوك و تشوفهم عندي صوالح لازم نديرهم باي و راح و خلاه  جواد: بصح انا مقتلكش راني قابل لؤي استغفر الله لؤي بعدما راح يجري و خلا جواد حاصل وصل عند لاصال لي فيها ينهج حبس بقى يرد في نفس تاعه و منبعد دخل يتمشى بلعقل و راح عند ولاء هي كانت حاطة راسها حتى شافته فوق راسها 
ولاء: لؤي راك هنا 
لؤي: واه قلت كاش متستحقي 
ولاء: لا راني مليحة صحيت شعال باقيلي باه نرجع لشمبرة
لؤي: ساعة
ولاء: اوك 
لؤي: احم غادي نبقى معاك بلاك كاش متستحقي و تبسملها ولاء تاني حست بقلبها يضرب
بعدما كملت جلست العلاج تاعها كانت فشلانة كيما كل مرة هو عاونها و بقى يمسحلها على راسها و رفدها حطها في كرسي متحرك ووصلها حتى لشمبرة رفدها و حطها في سرير و غطاها و بقى معاها يشوفها كاش متحتاج و كل مرة تبغي تتقيا يعاونها و يمسحلها على ظهرها ووجها و دار كرسي بقى مقابلها و بقى غير يشوف فيها مافهمش علاه راه يديرلها هاك و علاه راه مهتم لحالتها هاك بصح منبعد قنع روحه بلي شفقة برك و راهي غايضاته هو هاك يشوف فيها حتى يسمع تلفون يصوني خرج برا و بقى يحكي مع خته شويا و رجع عندها لقاها ترجف حط يده على راسه لقاها تغلي بسخانة خرج يجري من شمبرا و جاب دوا و عطاها تشرب و بقى يديرلها في كمادات تاع لما بارد على راسها و كل دقيقة يقيسلها حرارة كان خايف عليها بقى فوق كرسي و غير يعس فيها هو هاك حتى يسمع جواد و سناء دخلوا عنده
  سناء: مغاديش تخرج اليوم ياك خدمتك كملت 
لؤي: واه شويا و نخرج 
جواد: يادرا ريحت شويا 
لؤي: شويا صح من راحتلها الحمة
سناء: واه لؤي ايا تروح معانا نتعشوا برا
لؤي: غادي نزيد نبقى شويا 
جواد: ايا معانا
لؤي: لا لا روحوا نتوما 
سناء: اوك كيما تبغي خرجوا و خلاوه معاها 
سناء: حالة لؤي مراهيش تعجب راه متعلق بزاف بولاء 
جواد: واه انا تاني روماركيت بصح نظن راهي غايضاته برك سوغتوا من مورا لحالة لي وصلتلها بعدما ماتت صحبتها نظن خاف تعاود تحيها dépression  علبيها راه لاهي بيها 
سناء: بلاك ايا نروحوا ناكلوا جعت
جواد: ايا خرجوا من سبيطار و راحوا ريسطورون لي موالف يجوه في ثلاثة كمنداو و بقاو يحكوا  سناء: توحشت نتلاقاك 
جواد: ياك راكي كل يوم تشوفيني سناء تبسمت و حكماته من يده
سناء: بصح انا توحشت نبقى انا وياك برك افهم هو زيرلها على يديها
جواد : انا تاني توحشتك و توحشت قعدتنا مع بعض
  سناء: بصح مافهمتش علاه مراكش باغي تخبر لؤي ب relation تاعنا جواد بقى ساكت     

flaSH_back

لؤي كان يحكي في تلفون و يبان عليه بلي راه منارفي
لؤي: شعال من خطرة فهمتك انا و سناء مستحيل نكونوا مع بعض ياو منبغيهاش اصلا نشوف فيها ختي كاين واحد يتزوج خته 
فاطيمة (اخت لؤي): بصح افهمني يا ولدي انا راني باغيتها تكون مرتك نعرفوها و نعرفوا عايلتها غاية علاه راك ديرهاكا 
لؤي: صحا ماما من نجي لدار و نحكوا عندي خدمة دوك باي 
جواد كان جاي و سمع كامل المحادثة
  لؤي: اففف غادي تهبلني
جواد: شكون هادي ختك
لؤي: واه كاين وحدة من غيرها دايما نفس الموضوع غادي تهبلني على جاله
جواد: و نتا شاغادي دير
لؤي: معلباليش انا ندخل نشوف ولاء باي من بعد  جواد: باي
flaSH_end

سناء: جواد وين غست جات ماكلة
جواد: راني معاك ايا كولي بصحتك
سناء: بصحتك
  نعرفكم بفاطيمة هي خت لؤي الكبيرة و الوحيدة هي لي رباته بعدما ماتوا والديهم ودايرها في مقام امه يعني ميقدرش يرفضلها طلب لا هي ولا راجلها لي رباه