كرونيك جزائرية: قَاومِي منْ أجْلي....(مكتملة..)

😭الحلقة السابعة😭

سلاااام❤️💃

كانت راقدة في سابع نومة حتى تحس بيد حنينة تمسح على ظهر و صوت هادي ينوض فيها
جيهان: حبيبتي نوضي راه لوقت حلت عينيها لي كانت تحس بيهم تقال من كثرت مابكات اليوم
ولاء: صباح نور
جيهان: صباح الحب عمري ايا نوضي غسلي وجهك
ولاء: اوك هاني نايضة و منها نوجد كابتي
جيهان: صايي انا و ماماك وجدناها لبارح درنالك فيها كلش لي تحتاجيه
ولاء: مغسي و ناضت راحت لدوش غسلت وجها و بقات تتحسس على عينيها لي كانوا منفخين و حمرين بسبت لبكا بقات تشوف فيها و تماك وعدت روحها مكانش دموع من نهار اليوم و تعيشها كيما جات متخليش ياماتها توالا يفوتوا غير فلبكا وخرجت من دوش تتبسم جيهان من شافتها هاك تبسمتلها
جيهان: ايا خفي لبسي
ولاء: اوك و ناضت لبست قشها منبعد دارت كاسكيطة تغطي في راسها لي راه بلا شعر جيهان بقات تشوف فيها
ولاء: متخميش شعر ينوض ينوض
جيهان تبسمتلها: واه ينوض و خرجوا لقاو امين و منى يقارعولهم شربوا قهوة و داو صوالح و خرجوا طريقهم لسبيطار
طريق كامل و ولاء و جيهان يحكوا و يتفكروا في ياماتهم كلهم لاحظوا بلي نفسية ولاء شوية تحسنت و قرروا انهم يقووها هوما تاني و يتصرفوا معاها عادي وصلوا لسبيطار و هاد لمرة لقاو لؤي و جواد يقارعوا فيها
امين: bonjour
لؤي: bonjour شفتي اليوم جيت قبلكم ماخليتكمش تقارعوا و طلع راسه شاف فيها لقاها تتبسم و لقاها دايرة كاسكيطة عرف بلي قلعت شعرها بصح مبغاش يحسسها بحتى حاجة
ولاء: واه مزيا بكرتوا
لؤي: bon دوك لازم تقولي لماماك و باباك و ختك باي باسكو دوك لازم تطلعي لشمبرة
امين: معليش انا نطلع معاها باه نحطلها صوالح
لؤي: وي تقد ايا تبعوني و نتوما تقدوا تقارعوا هنا حتى يرجع ولاء راحت عند ماماها و عنقتها
ولاء: ماما ايا منبعد نتلاقوا اوك و سلمت عليها و راحت تودع جيهان
ولاء: عمري غادي كيما راكي دوك تروحي ليسي تقري
جيهان: بصح باغية نجي عندك منبعد
ولاء: متكثريش معايا هضرة عندك باك هاد لعام ايا قودي روحي تقري
منى: عندها الحق بنتي  وحي تقري
جيهان: اوك نروح
ولاء: هاك نبغيك ايا باي في هادا قاع لؤي كان غير يشوف فيخا كيفاش فر هود الوقت لي راها فيه و مزال تخمم في صحبتها
لؤي: تبعوني وصلهم حتى شمبرا و امين حط صوالح ووجد بلاصة ولاء
ولاء: ايا صايي بابا دوك روح راهم يقارعولك تحت و راحت عنقاته
امين: تهلي في روحك بنتي
ولاء: صحا دوك نتهلى ماتخممش
بعدما خرج امين منعندها بقات تشوف في شمبرا لي تبان تاع فيلم رعب سقمت بلاصتها و راحت بدلت قشها لبست بيجامة و فيها قلمونة خارجين منها ودنين قنينة و جبدت مذكراتها
"ها انا مجددا اكتب لك يا مذكرات احداث يومي اليوم هو اول ايامي في المستشفى لا ادري كم من الوقت سأبقى هنا يمكن ان تكون اسابيع او شهور او حتى سنوات لكنني قررت انني لن استسلم للمرض سأقاوم بكل قوتي من اجلي و من اجل عائلتي و لقد عاهدتي نفسي اليوم من الآن فصاعدا لن تنزل مني دمعة ابدا مهما كان سبب " و حطت ستيلو و رجعت دست مذكراتها في كابتها هي هاك حتى يجيها لؤي يدخل يلقاها دايرا ديك القلمونة بقى يشوف فيها ماقدرش يشد ضحكة كانت غايسة حتى تسمع ضحكة طلعت راسها لقاته يشوف فيها و يضحك
ولاء: مالك علاه راك تضحك
لؤي: راني نضحك على قنينة لي راهي قدامي
ولاء: كيفاش
لؤي: لي راك دايرتها في راسك
ولاء: اه راك على قلمونة غمتني كاسكيطة علبيها درت هادي مابغيتش نعميهم بصلعة تاعي هو من سمعها قالت هاك حس بتأنيب ضمير
لؤي: ديزولي ها ناضت تضحك
ولاء : منيتك ديزولي و قاع ياودي نوغمال حمبوك حكو معايا عادي متحسونيش بلي غادي نموت غدوة
لؤي: ها صحا كيما تبغي
ولاء: ايا علاه جيت
لؤي: والله لا نسيت
ولاء: منيتك
لؤي: صايي تفكرت مهم دوك يجوا يقلعولك دم باه نشوفوا وينتا نبدوا نديروا la chimiothérapie
ولاء: اه صحا نسقسيك
لؤي: واه تفضلي
ولاء: شكون معايا هنا في هاد شمبرة
لؤي: كاين وحدة دوك راهي دير في la chimio دوك تجي
ولاء: اه اوك هوما هاك حتى تجي فرملية
سناء: اه لؤي راك.هنا
لؤي: واه جيت نشوف برك لحالة
سناء: اوك انا دوك نديرلها prélèvement  و نقولهم يدوه لابو
لؤي: اوك من تكملي نشربوا قهوة
سناء: اوك في هاد وقت ولاء كانت غير تشوف فيهم
سناء: معليش تمديلي يدك ولاء كانت غايسة مسمعتهاش حتى عاود عيطلها لؤي
لؤي: ولاء وين رحتي
ولاء: هاه راني هنا
لؤي: مديلها دراعك شافت في سناء و تبسمتلها
ولاء: سمحيلي مسمعتكش هاكي بقات تبيكي فيها سناء و تعاود و ملقاتلهاش عرق
سناء: اوووو وين راه عرق تاعك وين راكي داساته
ولاء: خليته في دار و جيت  بقاو بضحكوا
لؤي: خليني انا نسيي
سناء: اوك عطاته متريال حكم يدها بحنانة و بقى يحوس على عرق بلخف بيكاها
لؤي: شفتي كي ساجي
سناء: بزاف كمل و جاو خارجين حتى حبستهم ولاء
لؤي: واه كاش محتاجيتي
ولاء: معليش نسقسيكم
سناء: واه سقسي
ولاء: كي سموكم سناء تبسمتلها
سناء: انا سموني سناء في عمري 24 عام
ولاء: متشرفين سناء و دارتلها سلام بقاو ساكتين يقارعوا في لؤي ينطق والو حتى ضرباته سناء على كتفه
سناء: احكي شيرة راهي تقارع فيك
لؤي: و انا دكتور لؤي في عمري 27 عام
سناء: شفتي كيفاش دايها في روحه
ولاء: واه شفت مهم دوك نعرفكم انا
لؤي: سموك ولاء في عمرك 17 عام
ولاء: راك حافظ درس
لؤي: خدمتي
ولاء: مهم متشرفة بيكم
سناء: مغسي انا تاني و شافت في لؤي باش يحكي
لؤي: مغسي انا تاني
سناء: حنا نخلوك دوك باي
ولاء: اوك باي خرجوا بقاو يحكوا و هوما يتمشوا
سناء: شفتها كيفاش تدخل للقلب شاعندها
لؤي: عندها cancer de sang deuxième stade
سناء: يااا مسكينة مزالها صغيرة
لؤي: هدا هو المرض ايا نروحوا نشربوا قهوة
سناء: جواد وين راه ميجيش معانا
لؤي: معلباليش وين راه دوك نعيطله نقوله يلحقنا
سناء: اوك نروحوا لولاء لي كانت حاكمة تلفون و تكنكتي حتى تشوف وحدة جايبينها فشلانة قاع ماش قادة حتى تتحرك باين عليها تعب حطوها فوق سرير و غطوها ولاء بقات تشوف فهمت بلي هادي هي لي معاها و هاد تعب لي راه فيها سبته la chimio بقات تشوف و تخمم بلي هي تاني دوك يصرالها هاك كيفها بعد مدة هاديك شيرة ناضت و كانت باغية تتقيا ملقاتش كيفاش حتى ناشت ولاؤ جابتلها بيدون و بقات تمسح على ظهرها و شمخت كتانة و بقات تمسحلها على راسها بقات واقفة على راسها حتى ديك البنت رقدت بعد ساعة ناضت ديك البنت تحس في روحها فشلانة لقات ولاء تشوف فيها و تتبسم
ولاء: كيفاش راك تحسي في روحك
رهف تحكي بلعقل: راني مليحة وشيا مغسي لي عاونتيني
ولاء: لا عادي ولا يهمك انا ولاء و نتي
رهف: انا رهف نتي هي لي جيتي جديدة هنا
ولاء: واه اليوم نهاري لول و نتي شعال عندك.هنا
رهف: عندي 5 شهر هوما هاك يحكوا حتى دخلوا اهل ولاء بقاو يسقوا فيها على حالها و يعاودوا و قصروا معاها و حتى انهم تعرفوا على رهف بعدما كمل وقت زيارة خرجوا و خلاو رهف و ولاء بعضهم

وهادي كانت نهاية البارت نتمنى يكون عجبكم❤️🥰و متنساوش التفاعل باش تشعوني اني نكمل💜😘