***
Isang propesyong hindi matatawaran
Ng kahit na anong klaseng kayamanan
Humuhubog sa ating murang isipan
Nang sa gano'y maging pag-asa ng bayan
-
Sa bawat pagpasok sa silid-aralan
Salita n'ya'y iyong pakatatandaan
Sapagkat bawat leksyong binibitiwan
Katumbas nito'y ating kinabukasan
-
Oras at panaho'y kanyang inialay
Upang kabataa'y di maging pasaway
Ito ay kanyang masusing sinasanay
At tinuturuan n'ya ng buong husay
-
Mga taong matataas sa lipunan
Na tinitingala mo't hinahangaan
Ang mga naiambag nila sa bayan
S'ya ang ugat ng kanilang katanyagan
-
Kaya dapat natin s'yang pahalagahan
At purihin sa kanyang kadakilaan
Magpasalamat sa kanyang kagalingan
Na siyang susi ng mga kabataan
***
