***
Tulad ng isang matamis na pagngiti
Pagdaloy ng luha ay nakakahawa
Kaya abot langit ang aking pagtimpi
Sa pagpigil ng luhang gustong lumaya
-
Nang binutasan ang iyong lalamunan
Puso nami'y tila sinaksak ng biglaan
At nang katagang kanser ay bumulaga
Daig pa natin ang nilamon ng lupa
-
Ngunit habang may buhay ay may pag-asa
Kaya ang hapdi ng lungkot ay aking nilunok
At pagmamahal sayo'y pinatamasa
Pagkat daig ng gawa ang gabundok na luha
-
Kaya Papa, ngayong pagpanaw mo ako'y hayaan nawa
Na ibuhos ang luha na matagal nang nagpupumiglas kumawala
Hayaang dumaloy ang aking luha
Nang mahugasan sana ang puso ko sa kalungkutang nilikha ng iyong pagkawala
***
