***
Bakit ganito ang nararamdaman ko?
Mabilisang umikot orasang ito
Di kanaisnais na bagay sa mundo
Lahat nito sa buhay ko'y gumugulo
-
Bawat tagatak ng aking mga pawis
Pagod sa katawa'y agad inaalis
Ngunit ang aking luhang tumatagistis
Sa aking mukha ay di maalis-alis
-
Iniisip ko kung anong mangyayari
Sa oras at araw na ako'y masawi
Mayroon kayang taong magpipighati?
Sa bangkay kong kalungkuta'y tumatali
-
Aking katawa'y malapit nang mabihag
Ni kamatayang sa pagpili ay bulag
Ngunit sa pagpanaw di ako lalabag
Dahil alam kong ang Diyos ay may habag
***
