***
Kung kaya ko lang ibalik ang lahat
Ng mga letrang matagal nang naisulat
Buburahin ko ang mga luhang kumalat
At ililipat sakin ang nagawang sugat
-
Kung kaya ko lang isauli ang ngayon
At gawing kasalukuyan ang noon
Dudukutin ko ang bumaong sakit
At isasaksak ko sa aking dibdib
-
Kung kaya ko lang baliktarin ang buhos ng ulan
At gawing init ang lamig na iyong naramdaman
Noong panahong ika'y kanyang sinaktan
Hindi mo sana iyon naranasan
-
Kung kaya ko lang ibalik ang tiwala
Na walang habas n'yang sinira
Di sana nasayang at nawala
Ang mga kasiyahang nalikha
-
Kung kaya ko lang iguhit uli
Ang mga ngiting namutawi
Sayong mapupulang labi
Ngayon sana'y iibig kang muli
-
Kung kaya ko lang pakinangin ulit
Ang ningning ng iyong matang marikit
Di mo sana mararamdamang masakit
Sa tuwing sya ay iyong binabanggit
-
Kung magawa ko lang sanang mabango
Ang kanyang mga nagawa sayo
Kaso lang di ko na mabago
Ang naging dulot nya sa buhay mo
-
Alam kong huli na ang lahat
At mga salita ko'y hindi sasapat
Kahit nga siguro itong tulang sinulat
Sa panlasa mo'y asukal na maalat
-
Ngunit kung magkagayon pa man
Hayaan mong sabihin ko sayo ng marahan
"May kaibigan, pamilya at pangarap ka pa,
Walang wala sya kung ikukumpara!"
***
