#صفحة_هنا_نحكي_حكايتي
#بختة
#الحلقة_1
اييييييه يا زمان و اييييييه يا ليام مجيتش نحكي باه نستثير العاطفة تاعكم و مجيتش نحكي باه نقرا ليكومنتار و مجيتش نحكي حتى باه ندي نصائح لانو لي صرا صرا و لي راح راح و لي متاكدة منو لي ضاع عمرو ما يتعوض ....بختة اسمي الدوزيام منيش رايحة نقلكم حليا شعال في عمري نفضل نخليها تبقى مع التالي وتعرفو كلش عليا ....قصتي مشي كيف كيف مع القصص لي جازو قصتي اثرت في انا فالماضي و مازلت لحد لان مأثرة فيا ....تزوجت بعدما تخرجت من الجامعة تزوجت رغما عني و بسيف عليا ..منكذبش عليكم زوجوني على جال مصلحتي لانو كنا 6 بنات كامل في دار وحدة و بابا خاف علينا بحكم كنا نسكنو برا لول لي كان يجي يتقدم لينا يمدنا ليه بلا ما يسقسي وبلا ما يشور حتى يما وجات معاه في صفو فلول كان يبان ظلم لينا بصح حتى مع الوقت باه عرفنا ...زواجي انا كان اصعب زواج في خوتاتي لانو تزوجت خارج الولاية و عمتي هي لي زوجتني بحكم هذا الراجل يخدم مع راجلها ..عارضت الفكرة و مقبلتش بصح مكانش عندي حل اخر و فتالي قبلت ....الزمن لي تزوجت فيها كنا نسمعو غير اخبار القتل و الاختطاف و الظلم و الدم كان بابا يبات حي وحنا نباتو راقدين كان اكثر شي يهمو هو الشرف تاعنا ....الارهاب كان مكرهلنا عيشتنا و حياتنا وسيرتو انا ..كانت كامل رسائل لي تجي لينا كنت انا فيها و كانو يقلولو لازم تبطلها من القراية ولا نقتلوها بابا من الخوف قلي بطلي و لا شوفي حل لعمرك ...نرجعو شوية للور هذي كي طلعت لسنة اولى جامعي ...بديت متضاربة معاه كل يوم و حتى خوتاتي و يما جايين ضدي ...ولي كانت بزاف ضرتني هو طرنسبور منقدرش نديبلاصي و الدعوة تتبلع على الخمسة تاع العشية و طريق طويلة من الجامعة لدار...وسيرتو البراجات تاع الارهاب المغشوشة باسم الدرك و الشرطة ...كانو ميتردوش في ذبح انثى جاية في ذاك الوقت ...كان عندي حل واحد ولي هو .......#يتبع .......لسا ما بدينا .....
