(سيلان ) ارهقني حبك

الفصل التاسع

جمالي يكمن فيما يناسب شخصيتي وليس بتقليد الاخرييين تلك المقوله التي يجب ان تتخذها كل فتاة واثقة من نفسها تعلم قدراتها جيدا وتعلم انها مميزة عن غيرها
ولكن هل حقا تؤمن بها تلك الجالسه بالمحاضرة تستمع للمعيد بتركيز وتكتب الملاحظات خلفه

حمزة الجالس علي الكرسي خلفها ينظر لها انحني قليلا ليقترب منها وهو يهمس لها : اوعي تكوني لسه زعلانه من اللي قالوه صحابي صدقيني انا اتفاجات زيك بكلامهم واكيد مكنتش راضي علي اللي بيعملوه في الكافيتريا
لتنتبه اسيا له لتبتسم بسخرية : اكيد مش هما دول البني ادمين اللي هاخد كلامهم بجد ثم انا بعرف اخد حقي كويس جدا وانت شوفت بنفسك
حمزة بابتسامة : يعني انتي مش واخدة موقف مني
اسيا ببرود : انت مش فارق معايا اساسا علشان اخد منك موقف او لا احنا يادوب بيجمعنا جامعه واحده وبعد الجامعه كل واحد بيروح لحاله في طريق غير التاني

ليقطع المعيد عليهم الحديث وهو يوزع درجات الاختبار السابق والطبيعي وكما كل مرة كانت اسيا الاولي علي الدفعه في مادة المعيد وهو يعلن اسمها بفخر وحمزة الذي يشعر بالغضب لانه يجد دائما صعوبة في تلك المادة وتنقص من درجاته فهو يكره تفوق اسيا عليه

سليم بجانبه : عملتها الدبدوبة ونجحت تاني
حمزة بغضب : اخرس يا سليم مش ناقصاك انا اللي ضعيف في المادة دي ومش فاهم فيها حاجات كتير جدا
سليم بمكر : تاهت ولاقيناها ممكن تخلي الدبدوبة تساعدك فيها
حمزة بنفس الغضب :مين ده اللي يساعد حمزة الراجحي انت تبعد من وشي دلوقتي لاني مش شايف قصادي ليتركه سليم ويتحدث مع اصدقائه
ليشرد حمزة في افكاره وقد بدأ يأخذ  كلام سليم  بجدية

انتهت المحاضرة واسيا تقف مع المعيد تشكره ليرحل
خرج كل من بالقسم لتتبقي اسيا تجمع اشيائها ليقف حمزة خلفها
اسيا ؟
لتستدير اسيا له بتساؤل
كان حمزة واقف لا يعرف من اين يبدأ ليتحدث بلطف : مبروك عليكي الاولي علي الدفعه انتي تستحقيها
اسيا بهدوء : شكرا لتنتظر ان يكمل
حمزة : بصراحة كنت عاوز انجح انا كمان في المادة دي لاني فعلا مش عارف بعض المسائل و....
اسيا باندهاش : محتاج مساعدتي
ليتأفف حمزة فهو يكابر في الاعتراف بفشله ليحاول ان يحسن صورته امامها : لا مش لدرجة مساعدتك ان بس في بعض المسائل معقدة و...
اسيا برفعة حاجب: و ايه
حمزة وهو يتنهد : و عاوز نخصص وقت نعد سوا فيه في مكان برة الجامعه علشان نحل المسائل المعقدة دي مع بعض
اسيا بسخرية : يعني من الاخر محتاج مساعدتي
حمزة باستسلام : ايوة يااسيا ارتاحتي
اسيا بمكر : اطلبها بطريقة شيك
حمزة بتساؤل : نعممم
اسيا ببرود : هو ايه اللي نعم انت طالب مني مساعدة يبقي تطلب مني اللي انت عاوزه بطريقة شيك يعني تكون جنتل مان
حمزة بغيظ وهو يشتم الظروف التي اوقعته في طريقها ليتماسك وهو يحاول ان يكون لطيف : انا طمعان في كرمك فممكن يا انسة اسيا تساعديني اني انجح في المادة دي
اسيا بتفكير : محستش منك الصدق في طلبك الحقيقة
حمزة باندهاش لتقاطعه اسيا : لكن ممكن تجيلي القصر الساعه ٨ هكون منتظراك
لتتركه وتغادر بابتسامة نصر تحت نظراته المتوعدة لها