သူမရဲ့လက်ထဲမှာ ဆုပ်ထားသည့် ကတ်ကြေးကို ဘယ်ညာလှည့်ကာ ကြည့်နေသည်။ဒီကတ်ကြေးက သူမသမီးရဲ့ကုတင်အောက်မှ ထွက်လာခြင်းဖြစ်သည်
အခန်းသန့်ရှင်းရေးလုပ်ပေးနေစဥ်တွေ့ခဲ့ခြင်းဖြစ်သည်။ ကတ်ကြေးလက်ပေါ်ရောက်လာသောအခါမှာသူမလွတ်မချချင်တော့ ။ဒီကတ်ကြေးတစ်လက်ကတောင် သူမကို အတိတ်သို့ပြန်ခေါ်ယူနိုင်စွမ်းရှိသည်။ သူမဘေးနား သူပြန်ရောက်လာပြီဟုသော ကြောင်တောင်တောင်အတွေးများဝင်လာသည်နှင့် ပူးတွဲပါလာသည့် အတိတ်မှတ်ဉာဏ်ကို သူမ တားဆီးခြင်း မပြုနိုင် ။
ကတ်ကြေးတစ်လက် ။
သိပ်ထက်မြက်သည်။
ကတ်ကြေးကိုသာ လက်ဖြင့်သေချာစွာ ဆုပ်ကိုင်ထားနိုင်ပါလျှင်ဘယ်သောအခါမှ လွတ်ကျလိမ့်မည်မဟုတ် ။ အရာတစ်ခုခုကို ဖြတ်ခြင်း ၊ ပလတ်စတစ်အိတ်များကိုဖောက်ခြင်း ၊ ဆံပင်ညှပ်ခြင်း အဲ့အရာများတွင်ဘယ်တော့မှမလွတ်ကျဘဲ လုပ်ဆောင်နိုင်လိမ့်မည်။
ဒီကတ်ကြေးကဘာလဲ?
သူမရဲ့ခေါင်းအုံးအောက်တွင်ဖွက်ထားသည့် ကတ်ကြေးကိုမြင်လိုက်သည်နှင့် သူမအဖေက သူမကိုဒေါသထွက်စွာ အော်ဟစ်မေးခဲ့သည်ကိုမှတ်မိ၏ ။
သူမအဖေက အိမ်တွင် အသွားထက်သည့်အရာများ ထားခြင်းကို ပိတ်ပင်ထားသည်။
ဒီကတ်ကြေးလေးတစ်လက် သူမခေါင်းအုံးအောက်ထဲ ရောက်နေရုံနဲ့ပင် အဖေ့အတွက်အကြီးအကျယ်သွေးပျက်စေနိုင်သည်။ ဆူပူမောင်းမဲခြင်းကိုရုတ်တရက်ရပ်လိုက်သည့်အဖေက ဘာလုပ်မလဲ အဲ့တုန်းက သိပ်သိချင်သလို သိပ်လည်းကြောက်သည်။ အဆုံးမှာတော့ အဖေက သူမရဲ့အနားကိုရောက်လာပြီး သူမရဲ့ဆံပင်တွေကိုဆောင့်ဆွဲကာ အရင်းကနေ ကတ်ကြေးဖြင့်ညှပ်ချလိုက်၏ ။
ရှည်လျားပြီးထူထဲ
တဲ့သူမဆံပင်များကို တစ်ချက်တည်းညှပ်ချလိုက်ရင်းဖြင့်ကတ်ကြေးတစ်လက် မည်မျှထက်ကြောင်း သင်ကြားပေးသွားခဲ့သည်။
သူမ လက်ထဲမှ ကတ်ကြေးကို သမီးလေးရဲ့ ကုတင်အောက်ထဲပြန်ထည့်ပေးလိုက်သည်။
သမီးလေးက စက္ကူအရုပ်လုပ်ခြင်းအား ဝါသနာပါသည်။ သမီးလေးက
သူမရဲ့စက္ကူတွေကို ဖြတ်ဖို့ ကတ်ကြေးတစ်ချောင်းထားထားပုံရသည်။
