سِدرة مُنتهى

الـحـلقه "الخامسه"

البــــــــارت الخامس ..

رواية :سِـدرة مُنتهى
بقلم :استبرق الكردي

     ((  قبل لا تقرأون البارت لاتنسون التصويت والتعليق
                على الفقرات،، هذااا الشيء يحفزن
                                ومااتأخر)))
            **'********************************

رجعت من المدرسه تعبانه والامتحانات هلكتني يكلك الادبي سهل..
لااا بلاء هم ندرس وندرغ ومن جه ثانيه طالبات الادبي بمدرستنه زايعتهن الدنيااا

وين ماكو وحده معفنه شامريها بلأدبي حشا الزينات..

دخلت للبيت،، لفحتني ريحه خبز تنور حارر باوعت لكيت امي بلممر تخبز...

ابتسمت ورحت سلمت :- هلاوو ماما شلونج؟؟

-هلاا يمه هلا حبيبه بشري شلونج بالامتحان؟؟

بوستها :- والله الرياضيات اليوم جابتلنه اسئله حتى لوغارتم حار بحلهاا.

-يلاااا يابنيتي جا شسوين انتي شاطره ماخاف عليج...
،،، سدرة يمه روحي بدلي واحمي الغده هسه اخوتج على جيه..

-انشاء الله..

دخلت للمطبخ تعلكت بخشمي ريحة الاكل..

فتحت الجدر صار بخارر الفاصوليا بوجهي وريحتهااا تخبل..
فتحت الجدر الثاني تمن عنبر لا معجن ولا حب شكله حلووو..

بعد عيني ابتهال وتطبخ على كولت بابا ( اذا بهوله طبخت النسوان يعتزلن)..

سديت الجدر ورحت بدلت وغسلت ورجعت للمطبخ
لكيت امي تلم بالخبز...
حست بيه ورهاا :- سدرة!!

-هاا يوم
حجيتهاا واني اشيل جوجو واحطه على رجليه حبيبي كبران..

-حضري روحج وره الظهر نروح لابن الكاظم سلام الله عليه،، هناا ام محمد لامتلها سياره الكروه الفين دينار..

-اليوم؟؟؟؟

-ايي جا يمته

-يااا وين انلحك،، شلبس؟؟؟

-شني يمه شتلبسين وين رايحه انتي هو للزياره دخلي عليه سلام الله عليه ،، اخذي مرادج...

-هاااا

-يااا يمه شبيج مثووله شمالج؟؟

-تعبانه..

-هاي عقلج الباطن وحده هيج يكلج روحي
صلي وتعاي تغدي يخلص يخلص تعبج..

ابتسمت على كلامهاا :- تدللين قلبوشتي..

-شني هاي نوب قلبوشتي! ؟

ابتسمت :- والله مادري بس اجتنه مطبقه بالمدرسه دخلت النه بلشاغل كل شويه وكالت قلبوشتي.

-انتي شتسمعين تحجين...

-ءخخخ شسوي فديتني ببغاء..

-ديلااا ،،. صدك حميتي الغده...