طبعاً وصلنا الأبيض متأخرين عشان مشينا بطريق الجبل الكلو حفر و حوادث ، لمن نزلنا من البص أبوي قال لـ عمي آدم اها نشوف لينا عربيه ولا في زول جاينا؟
عمي قال ليهو آيي اتصلت على راشد و هسي حيجينا ، أبوي قال ليهم طيب يا جماعه خلونا نمشي على المطعم داك لحدي ما راشد دا يجينا ، المهم مشينا المطعم انا و أمي و عمر قعدنا في حته و أبوي و عمي آدم و معاهم أولاد أهلنا قعدوا براهم بس جنبنا ، توفيق ولد عمي نصر الدين قال لـ عمر مالك قاعد مننا بعيد كدا؟ عمي آدم قال ليهو خليهو دا ولد أمو ، عمر ما رد عليهم عاين لأمي و قال ليها عايزين تاكلوا شنو؟ قبل ما نرد عليهو عمي آدم قال ليهو تسألهم ليه! انت عارف النسوان و حركاتهم عشان كدا طلبنا عصيده و هسي دي حتجهز ما تخسروا قروشكم ساي ، طبعاً زعلت منو زعله التقول هو البدفع لينا القروش ، بعد شويه جابوا لينا الأكل انا قلت لأمي ما عايزا مع اني باكل العصيده بس كيتاً لـ عمي شلت شنطتي و مشيت اشتريت سندويتشين و 2 بارد واحد لي و التاني لأمي طبعاً عمر لمن قمت ماشه اشتري ما قال لي خليك بمشي انا زي عادتو ، ما استغربت كونو ما قال كدا أكيد خاف انو عمي و أولاد اهلنا يقولوا عنو جبان و بسمع كلام أمو و اختو ، عمي لمن شافني شايلاهم قال لي كدي عيبي لي العصيده دي! جنكم صرف على الفاضي ، أبوكم دا انتوا قايلنوا فاتح بنك؟
ما رديت عليهو قعدت و مديت السندوتش لأمي ، كانت متردده و ما قدرت تمسكو مني عشان عمي قاعد يعاين لينا و هي ما عايزا تحسسو انها مطنشه كلامو و ما شغاله بيهو و عشان ما يقول انو هي الرسلتني ، قلت ليها ما عايزاهو؟ قالت لي ما مشكله باكل العصيده دي ، أكليهم انتي ، لميت ليها حقها و بديت آكل حقي ، طبعاً ناس أبوي اكلو و انتهوا و مشوا يغسلوا يدينهم ، لمن رجعوا قالوا لينا قوموا بعد دا العربيه وصلت ، كنا لسه بنفطر ، طبعاً أكل الرجال ما زي النسوان ، هم ببلعوا سريع سريع و لقمتهم قدر كفة اليد ، قلت ليهم بس لسه ما كملنا فطورنا! عمي قال لي الحنكشه ليكن شنو؟
أمي طلعت يدها من الصحن مشت غسلت و جات قالت لي كملي السندويتش بتاعك في العربيه ، المهم طلعنا من المطعم ، لمحنا بوكسي دبل قبينه واقف لينا ، نزل منو واحد كدا ما متأكده اذا دا راشد ولا لا ، لأنو آخر مره شفتو فيها كان زمان شديد لمن كنت صغيره لمن مشينا لناس جدي في البلد لاقيناهو هناك ، و اساساً هو ما بجينا في بيتنا ، بس لمن دققت شويه في ملامحو اتأكدت انو دا هو لأنو نهاي ما اتغير ، نزل و أدى ناس أبوي الفاتحه و بعديها سلم عليهم و جا سلم علينا انا و أمي على الماشي كدا ، ما عارفه ليه أهل أبوي ديل متعجرفين كدا و شايفين روحهم ، سلم علينا سلام بايخ كدا ما زي السلام السلموا لناس أبوي ، ما عارفاهم ليه بحتقروا النسوان كدا و بقللوا من قيمتهم ، طبعاً راشد دا ولد عمي صلاح الدين بسمع بيهو سمع زيو و زي باقي أولاد اعمامي و بناتهم ، لا هم بعرفوا عننا حاجه لا نحنا عارفين عنهم حاجه حتى ارقام بعض ما عندنا علاقتنا بيهم زيرو لدرجة انو لو زول قال لي مثلاً عمك الفلاني عندو كم ولد و اساميهم منو و منو والله ما حـ أعرفهم ، يمكن توفيق دا الوحيد البعرفو شديد لأنو بجينا طوالي في البيت ، أما باقي أولاد اعمامي ما بعرفهم في منهم برا السودان و منهم موجود في السودان بس ماف تواصل بيناتنا ، عندي خمس اعمام هم (صلاح الدين ، نصر الدين ، آدم ، رضوان ، صديق ، و عمتين هم بتول و بثينه ) ، المهم ركبنا معاهو و اتحركنا بعد ساعه أو اقل بشويه وصلنا بيت البكى يلي هو بيت عمي رضوان ، الناس كانت كتيره بصوره مبالغه و أي زول ببكي في زاويه و أصوات النسوان دي شاقه الأرض ، الناس أول ما شافونا نازلين جوا بكوا فينا و أدونا الفاتحه ، جات عمتي بثينه مسكت في أبوي و بكت فيهو مسافه و هو كأنها ما أختو لا ضماها عليهو لا اتكلم معاها بحنيه ، حتى في اللحظات الشديده و الحزينه زي دي ما بحبوا يظهروا مشاعرهم ، بعديها سلمت علينا و ساقتنا معاها جوه سلمنا عليهم و أديناهم الفاتحه بس ما إتلاقينا مع حبوبه ، غيتو انا ندمت لأني جيت معاهم ، النواح و الصراخ عملوا لي صداع و نفسيتي إدهورت ، يمكن لحدي ما العشا أذن الناس دي لسه ماشه في زياده و لسه النسوان بصرخوا بأعلى حس عندهم و انا نفسياً تعبت ، اتوضيت و شفت لي مكان فاضي كدا صليت فيهو المغرب ، شويه كدا أمي جاتني قالت لي مشيتي وين انتي من قبيل بفتش عليك ، قلت ليها ما مشيت مكان ، قالت لي طيب تعالي شيلي شنطتنا ديك وديها بيت عمك صلاح الدين ، قلت ليها حنبيت هنا ولا هناك؟
قالت لي هناك لأنو هنا ماف طريقه براك شايفه الناس دي كتيره كيف ، اتقدمي لينا انتي و شويه كدا انا و عمتك بثينه حنجيك هي ذاتها حتبيت معانا هناك ، قلت ليها بس عمي دا بيتو بوين انا ما بعرفو قالت لي صحي نسيت طيب بمشي معاك انا انتظريني اجيب الشنطه و أكلم عمتك اننا حنتقدم ليها ، طبعاً اعمامي تلاته ساكنين في الأبيض و إتنين في البلد يلي هم (آدم و نصر الدين ) و البلد هي قريه قريبه من مدينة "الأُبيض" جدي و حبوبه كانوا هناك ساكنين مع عمي نصر الدين و دايماً بسمع انو في مشاكل بين مرتو و حبوبه ، المهم أمي جات و على طول طلعنا من بيت البكى ، مشينا طويل و لفينا بأول لفه لاقتنا و طوالي لقينا البيت طبعاً انا تابعه أمي بس و ما عارفه بيت أي زول ، انا شلت الشنطه و أمي ضغطت على الجرس ، شويه كدا سمعنا صوت أقدام ماشه علينا ، أول ما الباب اتفتح شفت بت حلاتها كدا ، ما شاء الله جميله جمال مبالغ سلمت علينا ببشاشه كدا و قالت لينا اتفضلوا من قبيل منتظراكم ، عمتي بثينه قالت لي انكم حتجوا ، أمي عاينت ليها مسافه بعديها قالت ليها انتي عبير ولا عسجد ؟
البت قالت ليها انا عبير ، أمي قالت ليها ما شاء الله بقيتي كبيره و حلاتك يا بتي ربنا يحفظك آخر مره شفتك تقريباً كنتي بتقري في خامس ولا رابع ما متأكده، البت قالت ليها صح كلامك كنت في رابع بس انا متذكراك كويس كان جيتينا مع عمو ، المهم البت دخلتنا جوه و ضيفتنا ، شويه كدا جابت لينا الأكل ، أمي قالت ليها متعبه نفسك كدا ليه يا بتي ، البت قالت ليها لا لا ماف أي تعب يا خالتو ، طبعاً انا كنت ميته من الجوع بالإضافه للتعب و الإرهاق، المهم بدينا ناكل و هي ذاتا معانا شويه كدا سمعنا صوت الجرس هي غسلت يدها و مشت فتحت الباب، بعديها جات داخله مره عندها صحه كدا ، جات سلمت علينا و على طول دخلت جوه ، ما عارفه هل هي كانت صاره وشها لينا ولا انا بتخيل كدا بس الأكل غلبني قمت و طلعت غسلت يدي ، قبل ما ادخل جوه سمعت صوت الجرس للمره التانيه ، مشيت فتحت الباب ، لقيت الشاب داك بس اسمو راح لي قال لي بزهج السلام عليكم و طوالي دخل ، استغفر الله العلي العظيم دي شنو الناس المنفسنه دي! دخلت جوه لقيت أمي بتتونس مع عبير مشيت قعدت جنبها و انا بالجلاله بغالب في النوم ، عبير قالت لي شكلك نعسانه ارح معاي غرفتي ، قلت ليها طيب و طوالي مشيت معاها غرفتها بالجد كانت حلوه و منظمه ، قالت لي الجو سخن إلا اشغل ليك المكيف ، المهم شغلتو لي و قالت لي كدا حتنومي بإرتياح ، كانت حتطلع بس رجعت خطوتين لورا و قالت لي اااا انتي اسمك منو؟ قلت ليها اسمي مها ، قالت لي غريبه صح ! كونو نكون بنات أعمام و ما بنعرف أسامي بعض ، قلت ليها فعلاً ، هي طلعت و انا رقدت في السرير و نمت على طول ، ما صحيت إلا بعد ما سمعت صوت وسوسه و همس ، سمعت صوت عبير و هي بتقول اطلعوا برا خلوها تنوم ، أول ما فتحت عيوني اتفاجأت بتلات بنات كل وحده أحلى من التانيه ، اتنين تقريباً قدري و التالته اصغر منهم يمكن بسنتين أو تلاته ، كانوا لابسين عبايات سوداء عشان كدا اتخلعت لمن صحيت ، عبير ضحكت و قالت لي الخفافيش ديل خلعوك صح؟ هسي صحيتوها من نومتها ، قلت ليها لا لا عادي ما مشكله ، وحده منهم قالت لـ عبير ما عايزا تعرفينا على بعض صح ؟ ما مشكله براااانا حنتعرف ، جات جنبي مدت لي يدها و قالت لي انا إسراء بت عمك رضوان و دي أختي إيلاف و ديك هديل بت عمنا صديق ، سلمت عليها و قلت ليها اتشرفنا و الإتنين ديلك جوا سلموا علي ، إيلاف قالت لي انتي اسمك منو؟ قلت ليها مها ، عبير قالت ليهم بالجد حاجه غريبه كونها بت عمنا و ياداب اتعرفنا عليها 😂 هديل قالت ليها براهم مقاطعين الناس اتصال ساي ما بتصلوا علينا ، سكت ما قلت ليها حاجه ، عبير قالت وووبعلي نسيتوني الشاي و الشعيريه خليتهم في النار ، جرت و جاتنا بعد زمن ما طويل شديد و هي شايله كبابي شاي لبن ، قلت ليها أمي وين؟ قالت لي نسيت ما كلمتك أمك رجعت بيت البكى و قالت ليك بيتي هنا، استغربت ليه أمي مشت و هي قالت اننا حنبيت هنا؟ المهم قعدنا نشرب في الشاي و إيلاف بتونسنا و بتضحك بأعلى حس عندها ، فجأه كدا جانا صوت زول بقول يا زفته قفلي جردلك دا ، ما عايز أسمع حسك! إيلاف ختت يدينها على خشمها عشان تمنع الضحك ، إسراء قالت ليها كلمتك و قلت ليك وطي صوتك ناسيه إنو راشد قاعد؟ خليك من دا ناسيه انو جدي اتوفى الليله و انتي من قبيل تجعري زي البقره و هسي ميته بالضحك ! قالت ليها "لا حزن يدوم ولا فرح يدوم " اها يعني أبكي ليكم العمر كلو؟ جدي مات ربنا يرحمو أكتر من كدا نعمل شنو؟ هديل قالت ليها هش راشد لو سمعك بكسر ليك عضامك دي عضمه عضمه ، بعد شويه بقى ينادي على عبير قامت مشت ليهو و جات راجعه ، هديل قالت ليها قال عايز الشعيريه ولا شنو؟ قالت ليها ايوه كالعاده ، يعرفوهو بديري كيف؟ قلت ليها علاقة الشعيريه شنو بالبديريه؟ ضحكت و قالت لي معظم القبايل عندهم أكله بشتهروا بيها و نحنا عندنا الشعيريه بس انا ما بحبها شديد راشد هو الوحيد المغرم بيها و بياكلها يومياً من غير ما يمل منها ، إيلاف قالت لينا عشان تعرفوا حبوبه دي كذابه كيف قالت لي : زمان كان عندنا عرس بت أهلنا و العريس جاب حاجات الشيله كلها إلا الشعيريه عشان كدا رفضناهو و رجعنا ليهو الشيله كلها ، طبعاً ضحكنا ضحك ، هديل قالت ليها حبوبه دي بتألف ليك من راسها ساي ، إسراء قالت ليهم لكن ابوي قال الكلام دا حقيقه ، عبير قالت ليها لو حقيقه معناها دي عواره منهم ساي ، هديل فتحت تلفونها و قالت لـ إيلاف وين الرصيد؟ مش قلت ليك حولي لي معاك؟ إيلاف قالت ليها اقسم بالله نسيت ، قالت ليها هسسسي دي تمشي تحولي لي رصيد ، إيلاف قالت ليها بري الساعه بقت 8 ما بمشي ليك في اليل دا و بعدين راشد ذاتو ما حيخليني ، هديل قالت ليها خلاص رجعي لي السلسل الأديتك ليهو.....رجعيهو لي قلت ليك! .....سريع طلعيهو لي! إيلاف قالت ليها بييسس عليك وينا قروشك جيبيها لكن راشد لو سألني بقول ليهو دي هديل الرسلتني ، هديل قالت ليها و هو من وين حيعرف انتي ماشه وين! والله إلا كان براك تكلميهو ، اطلعي ساي و ذاتو بعبايتك السودا دي ماف زول بجيب خبرك ، رقمي حافظاهو صح؟ قالت ليها ايي ياخ حافظاهو ، المهم إيلاف طلعت و نحنا كملنا ونستنا عادي رغم اني بشارك معاهم مره مره إلا انهم بنات بالجد كويسات و لطيفات ، بعد دقيقتين تقريباً إيلاف جات جاريه و شايله نعلينها و طوالي دخلت تحت السرير لمن نحنا ذاتنا اتحيرنا ، عبير قالت ليها في شنو يا بت جنيتي؟ قبل ما ترد عليها جانا صوت راشد و هو بكورك بأعلى حس و بنادي على إيلاف جانا داخل و قال لينا الزفته ديك مشت وين؟ هديل قالت ليهو قصدك منو؟ لمن حمر ليها قالت ليهو ما جاتنا هنا طوالي طلع برا و مشى يفتش عليها و هي بعد ما اتأكدت انو مشى جات طالعه و وقعت ليك ضرب و قريص في هديل قالت ليها دا كلو بسببك يا حيوانه يا زفته ، ياخ انا شفت الموت دا بعيوني ، يوم راشد دا حيوديني فوق اقسم بالله 😭 هديل قعدت تضحك و قالت ليها انتي غبيه اعمل ليك شنو؟ هسي هو ذاتو شافك كيف عامل زي الصقر كدا ، ماف حاجه بتروح عليهو؟ إيلاف قالت ليها دا حظي النحس لقيتو في الدكان مع اني كنت مغطيه وشي بس عرفني و انا من هناك فكيتا جريه واحده ما وقفت إلا تحت السرير إسراء قالت ليها الشيطان دا متين طلع و مشى الدكان هسي مش كان بياكل في شعيريتو ديك! 🤣
إيلاف قالت ليهم المهم انا راجعه البيت طلعوني من هنا قبل ما......سكتت لمن شافت راشد واقف جنب الباب و عيونو مليانات غضب ، من الخلعه صرخت صرخه واحده و كانت حتدخل تحت السرير تاني بس هو مسكها و قال ليها انا قلت ليك شنو؟
إيلاف بدت تبكي من شدة الخوف و هو فعلاً عصبيتو كانت بتخوف ، قال ليها بنهره بتكلم معاك انا الوداك الدكان بليل شنو؟
إيلاف عاينت لـ هديل الكانت بتهز ليها في راسها عشان ما تقول ليهو هديل هي الرسلتني ، هرشها تاني و المره دي بصوت عالي لمن كلنا اتخلعنا ، بسرعه كدا هديل قالت ليهو دي مها.....قصدي مها هي الرسلتها عشان تجيب ليها رصيد....
، طبعاً انا اتهجمت و بقيت اعاين ليها بإستنكار ، قال ليها و دي منو كمان؟ طوالي هديل أشرت علي ، هو عاين لي بس ما قال حاجه ، قال لـ إيلاف انا حذرتك قبل كدا و كلكم عارفين الحاجه دي ، بغض النظر عن الرسلك منو سبب واحد يخليك تمشي ليها ماف و هندا انا للمرة الدشيليون بحذركن المغرب أول ما يقول الله أكبر ما ألقى لي وحده حايمه في الشارع ، كلامي دا مفهوم ولا لا؟
كلهم قالوا ليهو حاضر ، و هو طوالي طلع ، هديل قالت لي معليش بس لو ما قلت ليهو كدا كان مسح بينا الأرض لكن انتي بإعتبارك ضيفه ما حيعمل ليك حاجه زي ما شفتي ، قلت ليها ما مشكله بس هو طبيعي بتعامل معاكم كدا؟ قالت لي آيي من قمنا لقيناهو كدا أخلاقو ضيقه و تعاملو زي الزفت خاصة معانا نحنا ، إيلاف قالت لي الله لا وراك طفولتنا الإتشوهت بسببو ياخ دا بالنسبه لينا كان كابوس لدرجة انو أمهاتنا لمن ما نسمع كلامهم بقولوا لينا والله نكلم ليكم راشد ، ياخ زمان عذبنا عذاب و لسه مواصل ، قلت ليها بس دا ما أسلوب أو طريقه يتعاملوا بيها مع بشر ما معقوله العصبيه دي كلها عشان بس مشيتي الدكان ، كان ممكن يجي بكل هدوء و يقول ليك ما تمشي الدكان بليل احسن من الإنفجار دا كلو ، عبير قالت لي ياهم كدا ما هو بس كل أخوانا و أعمامنا و أولاد اعمامنا حارين كدا و صعبين شديد لكن راشد أخوي دا فايتهم درجات ، قلت ليها الحراره مطلوبه في الرجال لكن ما للدرجه دي و ما أي سلوك أو تصرف لازم يتقابل بالعصبيه و التخويف ، و كلو عشان تثبت انك راجل؟ غيتو انا شايفاها قساوه منهم بس و كلهم كعبين! هديل قالت لي قصدك منو تحديداً؟
قلت ليها ما تحديداً بتكلم بصفه عامه عن أهلنا ، إسراء قالت لينا غيتو البتعرس راشد دا الله يعينها و يلهمها الصبر و السلوان ! غيتو راجل زي دا ولا بفكر فيهو و الحمدلله ، إيلاف قالت ليها هم ما عندهم بيك شغله تفكري فيهو أو لا هسي لو عايزين يعقدوا عليك ليهو بعقدوا من غير ما يشاوروك ، غيتو انا بكرا دي بفتش لي واحد غريب عشان اسرتنا دي تتفك من عقدة البت لـ ولد عمها ، هديل قالت ليهم لكن النصيحه هو سمح سماحه لمن غلط حتى عصبيتو جذابه و دايماً فارض هيبتو ، إيلاف قالت ليها ايي شايفاك هو يشيل و يشاكل فيني و انتي سرحانه فيهو ما باقي ليك إلا الرياله ، قالت ليها اسكتي يا قرف ، المهم يومنا داك موتوني من الضحك و قعدوا يحكوا لي عن المنفسن دا و مواقفهم معاهو المحيرني يا جماعه انهم فرحانات بيهو و مبسوطات منو يعنى انا لو زول قال لي يا بت بنهره كدا ببكي فما بالكم لما يشاكلني و يعمل لي ترهيب! ما عارفه هن متعايشات مع الوضع دا كيف بس انا مستحيل اسمح لأي زول انو يتحكم في حياتي و يقيدني و يمشيني على كيفو...
في كتاب الكبرياء هناك عبارة ما قبل الأخيرة تقول نحن من نصنـع غرور البعـض لأننا نعطى قيمة لمن لا قيـمة لهـم....💜🥀
يتبع........
