لمن صحيت من النوم مشيت اتسوكت و صليت لقيت عبير جهزت الشاي و نادتني لمن مشيت ليها لقيت معاها المره الأمبارح جات داخله و أكيد دي أمها بس انا ما بعرفها ، قلت ليها صباح الخير ، قالت لي بصرة وش كدا صباح النور ، عبير قالت لي تعال اقعدي ، قعدت جنبها و هي مدت لي الشاي ، أمها قالت ليها شيل شاي دا وديهو لـ راشد ، قالت ليها طيب ، بعد ما هي مشت أمها قعدت تعاين لي بنظرات كدا لمن عقدتني ، قالت لي انتي انا اسمك منو يا بت إحسان ؟
قلت ليها مها ، قالت لي قاعدين هنا مطولين ولا حتمشوا؟ قلت ليها لا حنمشي بعد بكرا ، قالت لي أبوك ما جا معاكم ولا شنو؟
قلت ليها جا معانا بس شكلك ما لاقيتيهو ، عبير جات داخله و قالت ليها جا يا أمي امبارح شفتو لأنو جا سلم علينا و أدانا الفاتحه ، انتي مشيتي قبليهو بشويه ، معقوله لحدي الآن ما أديتيهو الفاتحه يا أمي! بالغتي والله ، أمها قالت ليها المهم انا ماشه عليهم ، نضفي البيت دا كويس و اقفليهو و ألحقيني هناك ، قالت ليها طيب ، شويه كدا و تلفون أمها رن و فصل سريع ، قالت لـ عبير اختك دي بتمسكل لي ساي قايلاني فاتحه لي كشك رصيد هنا ؟ عبير قالت ليها هي ما جايه ولا شنو؟ مش عارفه بوفاة جدي؟
أمها قالت ليها عارفه والله يمكن لبعدين كدا تكون هنا.....زي ما كلمتك يا عبير نضفي البيت و ألحقيني في بيت البكى.....
بعد ما أمها طلعت قلت لـ عبير اخوانك كم هم؟
قالت لي ولدين و بنتين ، أكبر واحد راشد ، بعديهو رامي حتى عسجد و انا آخر العنقود 💜 قلت ليها طيب وين هم ما شايفه زول منهم! ؟
قالت لي عسجد معرسها مصطفى ولد خالتي و ساكنين في ربك مع اهلو ، أما رامي و راشد موجودين هنا انتي شفتي راشد بس ما شفتي رامي لأنو بايت مع الرجال برا اصلاً هو جنو ينوم في الشارع ، شويه كدا سمعنا صوت زول بصفر و جاي على الصالون ، كنت لابسه عبايه بس صلحت طرحتي ، في واحد جا داخل على طول كدا و قال عبـ...ما تماها ، قال لي السلام عليكم ، قلت ليهو و عليكم السلام كان حيرجع بس عبير قالت ليهو دقيقه يا رامي ، إتلفت عليها ، قالت لي يلا دا رامي اخوي و يا رامي دي مها بت عمي " حولي" جوا من أمدرمان ، قال ليها يا زوله! جا سلم علي ببشاشه كدا و سألني عن احوالي و عن ناس البيت و كدا عبير قالت ليهو غيتو الدنيا دي قاسيه شديد بت عمنا و اسمها ما كنا عارفنوا ، رامي قال ليها آيي والله كلنا مقصرين في حق بعض ، لكن في قعدتنا دي عرفينا بيك انا بعرف اخوانك عمر و حذيفه بس ، مع انو التواصل بيناتنا شبه معدوم ، المهم قعدنا اتونسنا مسافه وحكيت ليهم عن نفسي و عن اخواتي و اساميهم و بنقرا في سنه كم و كدا و هم كمان حكوا لي عن نفسهم ، كانت قعده ظريفه و الحلاّها أكتر رامي و دمو الخفيف ، دي أول مره ألاقي زول من أهل أبوي دمو خفيف و بتكلم مع الناس عادي من غير ما ينهر زول أو يشاكلو ، بعد شويه راشد جا داخل قال لـ عبير قميصي الكحلي وين؟
قالت ليهو دقيقه افتشو ليك و مشت تفتشو ليهو ، راشد كان طالع وراها بس رامي قال ليهو تعال هنا يا أبو الشباب ، راشد قال ليهو خير في شنو؟
رامي قال ليهو تعال اقعد والله ما باكلك اصلو نوع لحمك دا ما مفضل عندي .....لمن قال ليهو كدا ما قدرت اكتم الضحكه ، ضحكت بصوت عالي ، راشد اداني نظره كدا خلتني اسكت ، جا قعد جنب أخوهو و قال ليهو انجز عايز شنو؟
قال ليهو بتعرف البت دي! و أشر علي ، راشد من غير ما يعاين لي قال ليهو لا ، ......طبعاً كذاب ساي هو الجابنا من موقف الباصات و هسي عامل نفسو ما عارف انا منو ، متعجرف و كريه خلاص! رامي قال ليهو لا حولاااا بايته معاك في نفس البيت و ما بتسأل و بتقول دي منو؟
عبير دخلت و قالت ليهو أجي؟ كيف ما بتعرفها يا راشد انت مش امبارح مشيت جبتهم من موقف الباصات؟ قال ليها ياخ ما متذكر حاجه انا ، المهم لقيتي لي قميصي ولا لا؟
قالت ليهو اي لقيتو ليك بس عايز مكوه و جيت أشيلها قال ليها طيب خاشي استحمى ألقاك كويتيهو لي ، بعد ما طلع عبير شالت المكوه و انا لميت الكبابي و سيرمس الشاي قلت لـ رامي مطبخكم وين؟
وصفو لي و طلع ، دخلت المطبخ كان جايط شديد ، قلت اطلع اخليهو كدا ، تاني قلت لا ما حلوه ياخ اخليهو كدا بعد ما دخلتو و شفتو جايط بالصوره دي ، المهم اول شي رتبتو كويس و لملمت العده الفيهو كلها و قعدت أغسل فيها بعد ما خلصت نشفت يديني جيت طالعه سريع سريع عشان امشي لأمي في بيت البكى و أول ما اتخطيت عتبة الباب اطاقشت مع الإسمو راشد ، كان شايل صينية فيها سيرمس و كبايه فيها شوية شاي ادفق ليهو في القميص ، قال لي بضيق كدا عميانه انتي؟!
قلت ليهو معليش كنت مستعجله و ما قاصده ادفق فيك الشاي ، قال لي مستعجله! دا كان جري عديل ، شافعه انتي عشان تتهابلي و تتجاري زي الشفع؟
كلامو زعلني شديد ، ما رديت عليهو لأني في بيتهم و غير كدا اساساً ماف حاجه تاني حتجمعني بيهو كلو يوم واحد و نرجع لأمدرمان ، ح أعمل نفسي ما سمعت شي ، خليتو واقف و دخلت جوه ، لقيت عبير بتمسح في الأرض قالت لي مشيتي وين انتي ما لقيتك؟
قلت ليها وديت الكبابي المطبخ ...جيبي انضف ليك لأني شويه كدا ح امشي لأمي ، قالت لي لا لا بنضف براي انتي بس انتظريني عشان نمشي سوا ، قلت ليها لو انتظرتك يبقى لازم اساعدك و إلا حمشي اخليك ، ضحكت و قالت لي طيب امسحي لي الجزو داك.....المهم نضفنا البيت و رتبنا الغرف و قفلناها ، بعديها كل وحده دخلت استحمت و غيرت ملابسها و الإتنين لبسنا عبايات و مشينا ليهم و الناس لحدي اللحظه دي كانت ماشه في زياده ، بقيت أفتش على أمي بعيوني بس ما لقيتا ، عبير قالت لي أرح الغرفه ديك كل البنات قاعدات فيها ، المهم مشيت معاها مع اني ما كنت عايزا أمشي ، لمن دخلنا لقينا ناس إسراء و معاهم بنات كتار ما بعرفهم سلمنا عليهم و قعدنا ، وحده منهم قالت لإسراء دي بت عمي؟
إسراء قالت ليها ايوه ...عاينت لي و قالت لي يا مها دي خلود بت عمنا نصر الدين كانوا في البلد و جوا قبيل الصباح و ديل أخواتها وديل.........الخ ، المهم عرفتني عليهم كلهم جزو كانوا من أهلنا و جزو من بنات جيرانهم طبعاً خلود دي اتذكرتها بالإسم ، زمان لمن كان مشينا لناس حبوبه في البلد هي كانت أول بت انا صاحبتها و كنا بنلعب سوا بس أول ما رجعنا و مرت السنين ما اتذكرتها تاني و ما سافرنا ليهم تاني بسبب المشاكل البتحصل بين أمي و أبوي امي ما كانت بترضى تمشي لأهلو بحكم انهم كعبين بس كل ما تلقى ليها فرصه بتسافر لأهلها في "سنار " و بتسوقنا معاها عشان كدا نحنا متعودين على أهل امي أكتر شي ، بعد شويه عمتي بثينه جات و قالت لي أمك دي من قبيل بتفتش عليك امرقي ليها اظنها قايلك مع ناس غرباء عشان كدا خايفه عليك ، ما علقت كلامها بس قلت ليها هي وين ، أشرت لي عليها و طوالي مشيت ليها ، قالت لي من قبيل كنتي وين انتي؟ قلت ليها مع عبير في بيتهم و جينا قبل شويه ، قالت لي جبتي شنطتنا معاك؟
قلت ليها لا ما جبتها ، انتي ما قلتي لي اجيبا ، قالت لي كيف ما قلت ليك جيبيها! عبير ما كلمتك ولا شنو؟ قلت ليها شكلها نست و بعدين نجيبها ليه مش حنبيت هناك؟ قالت لي لا حنبيت هنا! قلت ليها بس البيت مليان و ماف فرقه ذاتو عشان الزول يمدد رجلينو فيها ، قالت لي بنلقى فرقه ننوم فيها انتي بس قولي خير ....قلت ليها والله يا أمي انا الأماكن الضيقه و المزدحمه دي ما بتنفع معاي ، قالت لي ما تشيلي هم و تعالي معاي حبوبتك دي من قبيل بتسأل منك قالت ما جيتيها ، المهم مشيت مع أمي لحبوبه كانوا معاها نسوان كتار و ملبسنها توب أبيض ، أديتها الفاتحه و سلمت عليها ضمتني عليها شديد و قعدت تبكي و تقول لي يا حليلو جدكم فات و خلاكم يا حليلو سيد الرجال و سيد القبيله يا حليلو الكريم الحنين الما اتهموهو بخيانه يا حليلو........الخ
بقت ماسكاني و بتتكلم عن جدي ، وقفت في كلمة "حنين " دي ، جدي ربنا يرحمو ، عمرو ما حسسنا بحنية الجد البقولوا عليها دي ، لمن كنا بنجيهوا في البلد تعاملو معانا كان أقل من عادي و كلامو كلو تنهير خاصة معانا نحنا البنات لأنو تعاملو مع حذيفه و عمر كان غير ، صح ما كان بضمهم عليهو زي كل جد بس المؤكد انو كان بفضلهم علينا ، حسب عقليتهم الحنيه بتعلم الراجل الخيابه و بتخليهو ضعيف الشخصيه ، عشان كدا كان بسوق أخواني معاهو لأي مكان و أي حاجه ليها علاقه بالرجال و الناس الكبار كان بسوق ليها حذيفه و عمر كان دايماً بعلمهم القساوه و بزرع فيهم حب السيطره و الطغيان ، متأكده لو أخواني قعدوا معاهو فتره طويله كانوا حينكدوا علينا عيشتنا و يعيشونا في جحيم أكتر من العايشنوا...
قالت لي ما شاء الله بقيتي كبيره و حلاة الدنيا عليك ، لكن انتي و أخوانك ما بتسألوا و تقولوا عندنا جد و حبوبه نشوف العليهم شنو؟ جدكم دا لحدي ما دخل التراب زول فيكم سأل عنو ماف حتى لما مرض اتصال ساي بالغلط منكم ما جانا و........الخ
فتحت لي موال طويل عريض من العتاب و انا بس ماسكه ليها جملة معليش قصرنا في حقكم والله، مع انو هم الكانوا مقصرين في حقنا بس نحنا ما بنلوم زول و اصلاً الإهتمام البجي بعد عتاب و إصرار منك انت دا ماف داعي ليهو ، المهم قعدت معاها مسافه لحدي ما الضهر أذن مشيت صليت و جيت لقيتهم جابوا الفطور قعدنا فطرنا مع حبوبه بعدها أمي قالت لي شوفي عبير لو قالت راجعه بيتهم امشي معاها عشان تجيبي الشنطه ، بعد بكرا بإذن الله حنرجع لأمدرمان ، قلت ليها طيب ، مشيت لعبير و سألتها قالت لي هسي كنت راجعه ، ذاتي نسيت ما عملت الفطور الليله أمي لو عرفت حتقتلني ، ارحكي سريع ، المهم مشيت معاها بيتهم ، المفتاح كان معاها أول ما دخلنا انا مشيت طلعت الشنطه و هي مشت على المطبخ ، ختيت الشنطه في الصالون و مشيت لحقتها في المطبخ قلت ليها خليني اساعدك قالت لي الشغل ما كتير في ملاح جاهز بس حـ اعمل معاهو شعيريه و بطاطس ، قلت ليها برضو عايزا أساعدك ، قالت لي طيب تعملي الشعيريه ولا البطاطس؟ قلت ليها الشعيريه ، قالت لي ظابط ، قلت ليها اعملها ليكم شعيرية ملح ولا سكر؟
قالت لي ناس البيت بياكلوها بالسكر ما حصل عملناها بالملح لكن كدي اعمليها ليهم ، محتاجه شنو من المكونات ؟
قلت ليها ، لحمه و صلصه و بهارات و.....و ياريت لو في قرون شطه حتديها نكهه حلوه و حاره ، قالت لي شوقتيني عشان اضوقها....
المهم جهزت لي المكونات كلها و بديت اعمل فيها ، بعد ما شبه جهزت خليتها على النار و قلت ليها ح اعمل شطه مطبوخه كمان ، قالت لي الله 😍راشد بحب الشطه شديد و كل يوم بكلمنا عشان نعملها ليهو بس بنكسل منها لأنو ماف زول فينا بياكل شطه غيرو.......في سري قلت ليها و كيف ما يحب الشطه و هو طبعو و أخلاقو حاده زيها!؟
المهم خلطت الشطه و ختيتها على النار و بقيت احرك فيها لحدي ما سمعنا صوت الجرس ، عبير كانت مشغوله عشان كدا قلت ليها بفتحو انا ، لمن فتحت الباب لقيتهم ديل أبوي و عمي آدم ، عمي آدم قال لي ان شاء الله عندكن فطور؟
قلت ليهو حالياً شغالين فيهو قربنا نخلص ، قال لأبوي دي شغله فارغه ساي ، عليك الله الساعه ماشه لـ 2 و نحنا لسه ما فطرنا؟
ابوي قال ليهو نسوان الزمن دا بقن على كيفن بس الواحده كما جاعت خبر ما بتجيبو للباقين ، طبعاً بتكلموا و هم خاشين لـ جوه ، كنت حـ اقفل الباب بس في زول ثبتو بيدو .....طلع دا الفقر داك ، دخل و مدى لي كيس دقيق قال لي اعملوا لـ اعمامي ديل عصيدة دخن ، في سري قلت ليهو يدخنوك بالحنضل ان شاء الله ، قلت ليهو ماف طريقه لأنو الفطور جهز ، خلاني واقفه و مشى على المطبخ ، قفلت الباب و مشيت المطبخ لقيتو بقول لـ عبير بضيق و نبره حاده. : و يعنى شنو لو جهزتي الفطور خلاص! ما بعرف بس امشي و أجي ألقاك عملتي العصيده دي ، قالت ليهو يا راشد بس هدا الفطور جـ.......هرشها و قال ليها كلامي واضح و مشى
عبير قعدت تتزهج و تقول الله يطلعني من البيت دا و يريحني من راشد دا ، اضايقت شديد لدرجة انو دموعها نزلت ، قلت ليها اخوك دا مالو كدا! ما معقوله يكون عديم احساس للدرجه دي بس ما بلومو دامها خربانه من كبارها قالت لي انتي ما شفتي شي يا مها ، اقسم بالله المعامله البعاملنا بيها راشد تحلفي تقولي نحنا ما اخواتو حتى بنات اعمامي و عماتي ما سلمن منو ، الواحده فيهن كما لقتها من أخوها بتلقاها من راشد ، فيهم كلهم احسن واحد هو رامي هو الوحيد الطباعو ما جات زيهم هو الوحيد العادل في البيت دا ، قلت ليها الحاله واحده اخواني كمان كدا ، بس بعترف انو اخوك دا فايتهم بدرجات....
المهم اضطرينا نعمل ليهم العصيده أو خليني اقول عملتها عبير لأني ما بعرف اظبطها و اظبط الملاح بطريقتهم البحبوها ، بعد ما جهزناها ختيناها في الصينيه ، عبير كانت حتخت ليهم من البطاطس و الشعيريه قلت ليها ما تختي ليهم لا شعيريه لا بطاطس مش قالوا عايزين عصيدة دخن! معناها ياكلوها هي و بس ، جاني صوت بقول : ختي لينا من الشعيريه و البطاطس العملتوها دي ، طبعاً من صوتو عرفت انو دا الكريه داك ، إتلفت عليهو و قلت ليهو انتوا مش قلتوا عايزين عصيدة دخن و خليتونا نعملها ليكم بعد ما نحنا جهزنا الفطور ! مش قلت ما عايزنوا ؟
ولا رد علي قال لأختو سمعتي كلامي صح؟
ندمني على كلامي ، الفقر ، الكريه الما نافع احرجني ، عبير قالت ليهو طيب دقيقه ، هي بدت تخت ليهم و انا واقفه بعاين ليهو بغيظ ، و هو مره يعاين لي بإستحقار كدا و مره يغير اتجاه نظرو ، اقسم بالله شميتو شمّه ، المهم عبير جهزت الفطور و مدت ليهو الصينيه شالها منها و طار من قدامنا ، في سري قعدت أنبذ فيهو ساي ، عبير قالت لي بعد دا نفطر نحنا ، قلت ليها انا ما جعانه لأني فطرت مع ناس حبوبه ، قالت لي انا ذاتي فطرت هناك بس برضو جعانه 😹أكلي معاي يا زوله ان شاء الله لقمه لقمتين ، قلت ليها طيب ، المهم ختينا فطور و قعدنا نفطر في مكانا داك ، شويه كدا رامي جا داخل قال لينا يا سلااااام شامي لي ريحة اكل سمح خلاص ، عبير قالت ليهو امشي حصل اعمامي حالياً قاعدين يفطروا راشد ذاتو معاهم ، قال ليها عمي آدم معاهم؟
قالت ليهو آيي ، قال ليها اذاً ما ماشي ، براك عارفاهو زعاط و معاط كيف عشان كدا احشي لي بس ، قلت ليهو ليه تحشي ليك اقعد أكل معانا عديل ! قال لي عادي يعنى 😅
قلت ليهو ايوه عادي ، اقعد ياخ ، قعد معانا و بدينا ناكل سوا و نتونس ساي ، فجأه الفقر داك جا داخل ، عاين لـ رامي عين حاره كدا خلتو يرمي اللقمه الفي يدو و يقوم من مكانو و يطلع برا ، راشد مدى الصحاني لـ عبير و قال ليها عايزين بطاطس و شعيريه ، طبعاً مداهم ليها من غير ما يعاين لي أو ليها و اساساً يعاين لينا كيف و هو من قبيل كرهنا عشان نعمل ليهم عصيده و هسي يقابضوا في الشعيريه و البطاطس بقيت ابتسم ليهو بسخريه كدا و اعاين ليهو جوه عيونو و هو واضح انو فهم نظراتي ليهو و بقى ما بعاين لي ، قلت لـ عبير غيتو سبحان الله الواحد يقول قُول و بطنو تقول قُول تاني ، طبعاً عبير عارفاني قاصداهو و ما قدرت تكتم الضحكه إلا هو حمر ليها حتى سكتت ، بعد ما طلع قالت غيتو انتي يا مها ، قلت ليها اصلاً اخوك الفقر دا إلا تعملوا ليهو كدا و توقفوا عند حدو ، قالت لي هسي بكون شماك شمّه، قلت ليها احساس متبادل ، خليهو يشم ساي اساساً ما فارق معاي لكن رامي المسكين دا ما كمل أكلو ما عارفاهو قام ليه!
قالت لي قام عشان راشد ما يشاكلو و اطمني هسي بكون بياكل مع اعمامي هناك ، قلت ليها و يشاكلو ليه يعنى؟ قالت لي الرجال قاعدين يفطروا هناك و هو يجي يفطر مع البنات! راشد ما برضى ليهو و دايماً بقول ليهو انت خايب! قلت ليها أجي و دا عيب ولا حرام؟ يعنى هسي اخوانك ديل نهاي ما بياكلوا معاكم في صينيه واحده؟
قالت لي لا بياكلوا بس دا لمن ما يكون في ضيوف في البيت ، بس حالياً كونو هناك اعمامي و راشد بفطروا سوا و هنا رامي يجي ياكل معانا دي حاجه ممنوعه عند راشد ، قلت ليها أخوك دا شكلو متحكم في البيت دا كلو ، بالمناسبة أبوك وين من جيت ما شفتو ، قالت لي معقوله ما اتلاقيتوا! قلت ليها آيي والله ما شفتو نهاي ، قبل ما تقول حاجه سمعنا صوت الجرس ، قالت لي أكيد دا أبوي ، قلت ليها طيب امشي افتحي الباب! قالت لي بمشي يفتحو راشد ، و فعلاً راشد مشى فتحو و نحنا كنا بنعاين بالشباك و زي ما اتوقعنا طلع دا عمي صلاح الدين ، مشيت سلمت عليهو قال لي معانا هنا من متين يا بتي من جيتي ما شفتك! قلت ليهو من أمبارح و سبحان الله خالص خالص ما شفتك ، قال لي لأني معاهم بهناك ما قايلك هنا والله ، المهم اتكلمنا شويه كدا و هو دخل و الفقر داك بعاين لي بإستحقار كدا بس ما اشتغلت بيهو خليتو واقف و دخلت ، شويه كدا رامي جاب لينا صينيتهم قلت ليهو تخاف يا راجل ، قال لي انتي ما عارفه راشد ، دا ممكن يذلني بالموقف دا لحدي ما أموت ، ضحكت و قلت ليهو غيتو أخوكم المنفسن دا الله يصبركم عليهو ، رامي قال لي الله يصبر الحتعرسو لأننا خلاص اتعودنا عليهو و كل حاجه منو بنشوفها عاديه لكن المسكينه الـحـ تُبتلى بيهو دي الله يكون في عونها ، قلت ليهو هنا بجي دوركم مفروض اي وحده يقول عايز يعرسها تحذروها منو و تقولوا ليها انو عندو أمراض نفسيه ، عندو خلل في الدماغ ، انسان غير سوي ، متوحش ، هتلر و بركان متحرك ، المهم ابذلو جهدكم عشان تخلصوها منو ، رامي و عبير قعدوا يضحكوا بصوت عالي و شويه شويه ضحكتهم دي بدت تتلاشى ، طبعاً انا كنت مشغوله بغسيل العده و ما عارفه وراي في شنو فلما هم سكتوا بالطريقه المريبه دي إتلفت وراي و ياريتني ما إتلفت ، الفقر داك كان واقف جنب الباب و من ملامح وشو المخيفه دي عرفت انو سمع كلامنا ، أداني نظره كدا قربت تسيحني من الخوف ، قلت الليله لو جا كشطني كف اصلو ما غلطان ، انتي ذاتك يا مها البوديك تتكلمي عن ولد الناس في نص بيتهم و قدام أخوانو شنو؟ بالجد استاهل الدق ، اتوقعتو يقول حاجه بخصوص الكلام السمعو بس كل القالو "يا عبير اعملي الجبنه " عاين لـ رامي و قال ليهو اطلع شوف شغلك و مشى ، التلاته عاينا لبعض و فكينا الضحكه ، ضحكنا كدا لمن مصارينا وجعونا ، قلت ليهم خلاص خلاص اسكتوا ما يقوم يجينا تاني راجع ..... انا انتهيت من غسيل العده و رامي طلع و عبير بقت تعمل في الجبنه قلت ليها بعد دا انا ماشه لأمي ، قالت لي فيها شنو يعني لو نومتي في بيتنا؟
قلت ليها ما فيها حاجه بس أمي عايزانا نبيت هناك و ذاتو بكرا آخر لينا يوم ، قالت لي طيب امشي بعدين بجيكم هناك ، المهم مشيت الصالون عشان أشيل الشنطه ، كان فيهو أبوي و اعمامي آدم و صلاح الدين و الفقر داك و الشنطه تحت السرير ، اترددت اخش ولا لا ، عمي آدم لما شافني قال لي الجبنه ما جهزت يا بت؟ قلت ليهو لسه ، قال لي اصلو بتعملوا في شنو انتوا! يوم واحد عايزكم تجهزوا الحاجه في وقتها غيتو انتن يا بنات الزمن دا ، عمي صلاح الدين قال لي تعالي هنا يا بت أخوي عايز اتونس معاك ، بخطوات متردده مشيت عليهو و راشد يشيل و يحمر لي ساي ، قعدت جنب عمي صلاح الدين قال لي كيفك يا بتي و أخواتك كيف! قلت ليهو كويسات الحمدلله ، و بدا يسألني اسئله عاديه كدا لحدي ما قال لي بتقري في الجامعه انتي مش؟ سنه كم؟
قلت ليهو بقرا It في السنه التالته ، قال لي مع اني ما عارف الـ آي تي دا شنو لكن ربنا يوفقك ، و أخواتك؟
قلت ليهو مرام بتقرا مختبرات طبيه في السنه الأخيره و مشتهى ممتحنه شهاده سودانيه ، قال لي كويس والله ، عمي آدم قال ليهو كويس شنو؟ القدرهن ماسكات بيوتهن و بأولادهن ، هسي خليها تسأل عماتها ديل لمن عرسوهن اعمارهن كانت كم! عمي صلاح الدين قال ليهو جيل لـ جيل بختلف ، عمي آدم قال ليهو كدي يا صلاح بالمنطق كدا هي تقرا عايزا تعمل شنو يعني؟ في النهايه لو عرست حتمسك بيتها و تخلي شغلها بالأحسن تختصر على نفسها و على أبوها الشقيان دا من بدري و يريحنوا من قروش الجامعات دي ولا شنو ....و عاين لأبوي ، أبوي طوالي قال ليهو آيي والله صح كلامك...
انا ما باقي لي شي من البكى ، حسيت نفسي صغيره قدامهم ، كنت حأقوم و امشي بس عمي آدم قال و في قعدتنا دي و قدام البنيه دي نحنا حنعرسها لـ راشد....
يتبع......
