_ اعمل شنو يعني يا أمي و هو اساساً ما شغال بي و 24 ساعه برا البيت و لو جا بمشي ليها بهناك و انا ما بسأل عنك كأني مزهريه اشتراها و رماها في ركن بيتو
= هسس خلاص ما تقعدي تتباكي كدا ، خليك مفتحه و أكسبيهو لـ صفك هو لو كان ما عندو نيه فيك ما كان جا لغاية بيتنا و طلبك من أبوك
_ لكن تتصرفاتو بتقول عكس كدا ، انا لغاية اللحظه بسأل نفسي هو عرسني ليه اذا ما عايزني ، في الحاصل دا كلو أنا موقعي شنو!
= راشد دا أصلو عندو جن في راسو و أي حاجه تخطر على بالو بعملها في ساعتها لكن انتي ما أي حاجه و مش عرسك معناها غصباً عنو يتعامل معاك زي أي زوج لـ زوجتو
_ اعمل ليهو شنو يا أمي تعبت انا و الناس كلها بقت تتكلم عني حتى سمعت فاطمه قالت جاتو هفوه و هاشميه و عرسها مزاج منو ساي ، كلامها البتقولو كلو واصلني و انا متحمله و ساكته و حبوبه ذاتها ما مقصره مني و لو جاتنا هناك بتسمعني كلمتين تلاته و بتمشي 💔
= فاطمه في السما ان شاء الله ، أصلها شمّاته و بتاعة قوالة ، تصبر لي بس و حبوبتك المخرفه دي ما تشتغلي بيها بكرا ، أيامها معدوده هي و راشد كان عرسك بالمزاج ولا غيرو في الآخر اسمو عرس و غصباً عنو يتعمل مسؤولية قرارو انتي ما لعبه عشان يعرسك بمزاجو و يرميك بمزاجو ، هسي ارجعي بيتك و إشراقه دي أنا بعدين بجيها و بخت ليها النقاط على الحروف .....
__________________________
بقيت مستغربه و ما مصدقه انو الرسايل دي كانت مشفره بخوارزمية يوليوس قيصر! بعد ما فكيت التشفير طلع لي في الرساله الأولى:
"اسمو محمد الفاتح خوجلي "
الرساله التانيه:
"عايز اقابلك ضروري ، بالنسبه للمهمه الأولى "
الرساله التالته:
"تمت "
قلت دا شنو دا؟ ما قادره افهم هم بتكلموا عن شنو و ليه كانوا بتراسلوا بكلام مشفر! الفهمتو انو راشد سأل عن زول و المرسل ليهو دا عرف ليهو اسم الزول يلي هو "محمد الفاتح خوجلي " طيب دا منو؟ و قصدو شنو بالمهمه الأولى التمت!؟ و هم منو أساساً عشان يكون عندهم مهام و المهمه دي كانت شنو؟
في استفهامات كتيره بقت مطبوعه في راسي، راشد بالنسبه لي بقى شخصيه غامضه وراها سر ، للحظات حسيت بخوف و إنو الموضوع خطير!
خليت كل شي في يدي و بقيت متمحنه و راسي يودي و يجيب و نهاي ما قادره اخمن هم بتكلموا عن شنو و المهمه شنو! ؟
في قعدتي ديك راشد جا داخل بقيت أعاين ليهو و انا مستغربه و محتاره في الشخصيه الواقفه قدامي دي، حرفياً حسيت نفسي خايفه منو! ....قال لي الشاحن وين؟ ما رديت لأني كنت سرحانه فيهو و ما سامعه شي، ما ركزت إلا لمن عادي لي الكلام تاني ، بتردد قلت ليهو في الدولاب ، شالو خت تلفونو في الشاحن و طلع ، قلت دي فرصتي شلت تلفوني و رسمت النمط الإكتشفتو المره الفاتت، دخلت مكان الرسايل لقيت راشد رادي عليهو بنفس اللغه و الرسايل ما كانت كتيره ، فكيت تشفيرهم كلهم و العرفتو إنو ما إتلاقى مع الراجل دا راشد قال ليهو انشغلت بحاجه بلاقيك الأسبوع الجاي ، آخره رساله فكيت تشفيرها لقيتو كاتب ليهو نتلاقى بكرا في شارع النص جنب بقالة عبدالرحمن الساعه 7 المسا ، طبعاً الرساله دي تحديداً كانت امبارح معناها هم حـ يتلاقوا اليوم بس الساعه حالياً 5 ، راشد طلع وين؟
لبست توبي و قلت كدي اتأكد هو موجود ولا ماف ، طلعت الحوش برا ما لقيتو ، مشيت للبيت البهناك و مشيت على الصالون عشان اتأكد ، أول ما قربت من الصالون سامعه صوت عمتي إشراقه ، لمن قربت أكتر سمعتها قالت ليهو حرام عليك البتسويهو في البت دي! انت وقت ما عايزها معرسها ليه؟ رغم تجاهلك ليها و عدم احترامك للرابط البيناتكم هي لسه محترماك و نهاي ما فتحت خشمها معاك و قالت ليك ليه بتعمل فيني كدا من جبتها و قعدتها معاي هنا ما اعترضت و حسها ما سمعتو كلو عشان هي بتقول انت مشغول و في مية حاجه في بالك ، بس النصيحه يا ولدي انت ظالم البت دي ، حتى لمن تطلع و تجي بتمشي بيتك التاني و بت الناس دي ما بتسأل عنها، الإتنين زوجاتك و الإتنين بنات عمك فـ انت حاول تعدل بيناتهم ...قال ليها ان شاء الله
سكتت مسافه بعدها قالت ليهو انت حتى بعد ما عرست ما عايز تستقر و تكون ليك أسره ، العمر جاري يا ولدي و ما بنتظر زول ، اشغالك دي بتتعوض حاول عيش زي أي راجل معرس ، ديك عرفناها و ما بتسمع الكلام و في خلافات بيناتكم و انت ما عايز تطلقها عشان بت عمك و ماسكها ساي لكن هديل دي مالا عيبها لي!؟ بتحترمك و بتحترمها و دي الحتكون زوجه مناسبه و أم مناسبه حاول تديها فرصه
