في اليوم البعديهو ، مشينا ليهم في المستشفى ، أول ما قربنا من غرفة عمي صلاح سمعنا صوت جوطه شديده ، استعجلنا و مشينا على الغرفه الهو فيها !....اتفاجأت لمن شفت راشد واقف و بتشاكل مع الدكتور و شويه كدا كان حيضربو و رامي و أعمامي ماسكنوا منو ، عمتو إشراقه مشت عليهو و حجزتو من الدكتور بعديها مسكت فيهو و قعدت تبكي و هو لسه كان بعاين في الدكتور و عايز الطريقه البتوصلو ليهو عشان يضربو! طبعاً نحنا ما فاهمين شي ، عبير قالت لـ رامي في شنو؟.....راشد زح من أمو و قال لـ رامي جهز أبوي و خلينا نطلع من هنا ، رامي قال ليهو نوديهو وين و المستشفيات كلها زي بعض!؟
راشد قال ليهو حنمشي البيت ، طلع تلفون عمل مكالمه و مشى و خلانا كلنا فاتحين خشومنا و ما فاهمين حاجه! عمتو إشراقه قالت ليهو في شنو يا رامي! دا شنو الكلام القالو أخوك دا! كيف يعني نرجع أبوك البيت و هو في الحاله دي؟
رامي مسح وشو و قال ليها راشد قال إنو أبوي ما عندو أي شي و فحوصاتو نضيفه عشان كدا اتشاكل مع الدكتور و هسي اظنو عايز يشتكيهم ، عبير قالت ليهو أجي كيف يعني فحوصات أبوي نضيفه ، طيب نتايج التحاليل الطلعت دي شنو و راشد من وين اتأكد انو أبوي ما عندو شي؟
عمي رضوان قال ليها ما عارفين والله غيتو راشد دا حيرنا معاهو و ما فهمنا حاجه ، عبير قالت ليهم هو راشد ذاتو جا متين من السفر ؟ رامي قال ليها جا قبل ساعتين كدا...
طبعاً بقينا واقفين مسافه و نحنا ما فاهمين شي! شويه كدا دخلت مع عبير و أمها لـ عمي صلاح ، سلمت عليهو و حمدلت ليهو السلامه بس الشي المحير إنو كان كويس شديد و ماف أثر لأي مرض عليهو زي ما قال الدكتور! قال لينا الحاصل شنو برا سامع لي صوت جوطه! عمتو إشراقه حكت ليهو الحاصل ، قال ليها انا ذاتي حاسي نفسي كويس و ما بشكى من أي وجع كلى! بعد شويه راشد جا و سامعنوا برا قال لـ رامي بزهج انا مش قلت ليك طلع أبوي من هنا؟....جا داخل علينا و قال لأبوهو حنمشي من هنا ، عمي قال ليهو طوالي يا ولدي أصلاً انا كويس والله و ما عارف قصة مشاكل الكلى دي جابوها من وين ، كل الحصل اني حسيت بلفة راس و رجليني ما شالوني.....لمن راشد رفع أبوهو و طلع بيهو برا و نحنا وراهو جونا كميه من الدكاتره واحد قال لـ راشد معليش يا أستاذ كانت في لخبطه في نتيجة التحليل! راشد قال ليهو بضيق لخبطه؟ معقوله! فهموني بس كيف حصلت اللخبطه دي؟
الدكتور التاني قال ليهو حقك علينا يا أستاذ و نحنا متأسفين على كمية الخوف و القلق الدخلناها فيكم بسبب اللخبطه دي ، راشد قال ليهم بعرف شغلي معاكم ، الدكتور قال ليهو معليش يا اخ ، ما إتكلم معاهم تاني بس ساق أبوهو و طلع بيهو من المستشفى و نحنا كل واحد بقى يعاين للتاني ، الدكاتره اعتذروا مننا تاني و مشوا ، عمو صديق قال لينا طيب اذا حصلت لخبطه في نتيجة التحليل مش مفروض نعمل تحاليل تانيه عشان نعرف سبب الوقعه دي شنو! ....عبير قالت ليهو دا المفروض بس راشد ما حـيسمع من زول ، المهم كلنا نزلنا تحت و طلعنا برا المستشفى ، طبعاً راشد دا عيونو كانت زي الشرار و غضبان غضب مبالغه ، راشد قال لـ رامي تعال أركب عشان تسوقهم البيت ، أمو قالت ليهو و انت ماشي وين يا ولدي ما راجع معانا؟بس ما تقول لي مسافر تاني ؟
قال ليها بآخر نفس : عندي شغل ضروري ، المهم نحنا كلنا ركبنا قدام و أعمامي الإتنين ركبوا في صندوق العربيه الورا ، طبعاً عشان هي بوكسي كبير مقاعدها خمسه اتنين قدام و تلاته ورا كنا راكبين فيهم انا و عبير و عمتو إشراقه و قدام رامي و عمي صلاح الدين ، طول الطريق و غصباً عني كنت بفكر في راشد و بقول يا ربي مالو و ليه كان غضبان و مضايق للدرجه دي! ايوه صح الدكاتره غلطوا من غير ما ينتبهوا بس ردة فعلو و غضبو كانوا أضعاف مضاعفه لمن عروقو بقت بارزه ، رغم إنو انسان فقر و دايماً صاري خلقتو دي بس أول مره أشوفو بالحاله دي و أول مره اشوف كمية الغضب الطلعت منو دي! بعد ما رجعنا البيت نسوان أعمامي و ناس إسراء و هديل جوا سلموا على عمي و قعدوا شويه كدا و مشوا ، بس قبل ما يمشوا قالوا لـ عمي صلاح إنو حبوبه مصره تشوفو و من أمبارح مقلقه عليهو قال ليهم قولوا ليها هسي بجيك ، و فعلاً عمي ارتاح شويه بعديها استحمى و مشى لـ حبوبه مع اعمامي رضوان و صديق ، بعد ساعه تقريباً راشد جا راجع و معالم وشو ما كانت بتتفسر ما عرفتو مالو لأنو ما قال لـ زول حاجه بس جا معاهو واحد كدا قال لينا ضيفوهو و سأل عن أبوهو و عبير قالت ليهو مشى لـ حبوبه ، هو و الراجل المعاهو دخلوا الصالون و نحنا جهزنا ليهو المويه و العصير ، عبير نادت لـ راشد عشان يجي يشيل الضيافه جا شالها من غير ما يعاين لـ زول أو يتكلم مع زول ، بعد شويه عمي جا راجع و معاهو رامي ، راشد أشر ليهم عشان يجوهو جوه في الصالون ، المهم في الآخر اكتشفنا إنو الراجل الجا مع راشد دا دكتور جابو عشان يفحص عمي و يعرف سبب الوقعه كان شنو ، العرفناهو من رامي إنو الدكتور قال ليهم ما أظن عندو حاجه خطيره و يمكن ضغطو ارتفع أو التغذيه حقتو ما كويسه بس ننتظر نتيجة التحليل و ان شاء الله ما حيكون عندو شي و النتيجه تطلع زي توقعاتي ، قلت لـ رامي طيب هو ليه جاب دكتور في البيت؟ برضو ممكن تحصل لخبطه لأنو زي ما شفت الدكتور شال معاهو الفحوصات و أكيد حيمشي بيهم للمعمل أو المستشفى الشغال فيها!؟ فـ بالجد ما عارفه اخوك كان بفكر في شنو و عاد نفس القصه ، لو كدا مش احسن ليهو المستشفى؟
قال لي الدكتور دا صاحب راشد عشان كدا هو واثق فيهو ، ما عارف ليه راشد مقلق و خايف للدرجه دي من قصة المستشفيات دي ! اتكلمت معاهو و قلت ليهو خلينا نمشي أي مستشفى تانيه بس هو رفض ، قلت ليهو في حاجه محيره في أخوك دا! يمكن يكون داسي مننا حاجه؟ قال لي ما عارف والله!
المهم في اليوم البعديهو الدكتور إتصل على راشد و قال ليهو الحمدلله ما عندو حاجه خطيره ، ضغطو ارتفع و زي ما اتوقعت عندو نقص في الدم عشان كدا لمن يقيف بحس بدوخه زي ما حصل أمبارح ، كتبت ليهو الأدويه و هسي حـ أرسلهم ليك ، المهم راشد جاذ شديد و قال لينا أبوي دا الزعلو منو؟ الإتكلم معاهو منو؟ قلنا ليهو ما عارفين! عبير قالت ليهو احتمال اتناقش ليهو مع زول بخصوص الشغل و كدا ، المهم راشد مشى جاب الأدويه لـ عمي و جا و لمن زول يسألو عن الموضوع و ليه كان غضبان و جايط كدا بقول ليهو هم غلطوا في نتيجة التحاليل حقت أبوي عايزني أسكت ليهم؟
بعد اسبوع من الكلام دا كنا أنا و عبير في البيت التاني هي كانت بترش في الحوش و انا قلت ليها بكنسو بعد ما إنتي ترشيهو ، في اليومين ديل بقيت ما بتلاقى كتير ما الفقر الإسمو راشد داك ، بجي متأخر و انا الوقت داك بكون قافله الغرفه علي و طافيه الأنوار بس بسمع حركتو! و الصباح بطلع بدري ، رغم إني مبسوطه إننا ما إتلاقينا خالص و وقفنا قدام بعض بس متأكده إنو في حاجه ليها علاقه بالمستشفى ، اثناء ما انا غرقانه في التفكير عبير قالت لي نفسي اعرف إنتي ليه ما بتضحكي أو تبتسمي؟! من جيتينا هنا ما حصل شفت إبتسامه على وشك و ما حصل شفتك بتضحكي! ...قلت ليها في وحده معرسه أخوك بكون عندها نفس لـ ضحك؟
سكتت ساي لمن قلت ليها كدا بعد شويه وجهت الخرطوش علي و رشتني بالمويه قالت لي افرحي و امرحي ساي الدنيا دي ما دايمه لـ زول ، طبعاً ملابسي و توبي كلهم اتملوا مويه ، قلت ليها عبييير دا شنو دا كفايه ياخ و هي لسه شغاله ترش فيني ، قمت من مكاني و مشيت عليها و هي بتضحك و بترجع لـ ورا بس لسه مصره ترشني بالمويه ياخ كُلي بقيت عباره عن مويه و شعري دا غسلتو لي عديل ، بالجلاله قدرت أوصلها و بقيت اتشاكل معاها في الخرطوش مره أوجهو عليها و مره توجهو علي و انا أكتر وحده إتملت مويه في الآخر جريت منها الخرطوش و هي طوالي جرت و انا بقيت ساكاها و بضحك عليها قالت لي بدل تسكيني كدا أشكريني لأني خليتك تضحكي قلت ليها ما حـ أخليك لو ما مليتك مويه زي ما عملتي فيني ، بقيت جاريه وراها و برشها بالخرطوش فلمن قربت أحصلها جرت على الباب الفي النص عشان تجري بيتهم ، و انا لسه وراها و موجهه الخرطوش عليها فجأه هي دخلت بـ باب النص و الفقر داك جا داخل و انا كنت موجهه الخرطوش عليهو و ملابسو كلها إتملت مويه ، انا من شدة الخلعه بدل ما أزح الخرطوش من صوبو لسه كنت موجهاهو عليهو و واقفه مخلوعه إلا عبير ضحكت بصوت عالي و قالت لي يا غبيه دا شنو! سجمك الليله ، طوالي رميت الخرطوش و بقيت منططه عيوني و بعاين ليهو! طبعاً حالتي كانت بالبلا التوب و الملابس و الشعر كلهم بنقطوا ساي من المويه و على العلي باندتي وقعت مني وين ما معروف فـ شعري كلو بقى نازل في وشي ، اتوقعتو يكورك فيني و يجوط بس سكت و بقى مبحلق فيني و انا خايفه من ردة فعلو ، عبير كانت واقفه وراهو و خاته يدها على خشمها عشان ما تضحك أشرت عليهو و عملت حركه كدا معناها دا مالو ما قال حاجه؟
بالجد يخوانا منظرو و منظر عبير بـ وراهو و هي بتعمل لي في حركات خلتني فجأه كدا أضحك شديد لمن مسكت بطني من شدة الضحك و عبير ذاتها ما قدرت تمسك نفسها أكتر من كدا فـ الإتنين دخلنا في نوبة ضحك و هو لسه بعاين لي و انا بضحك ساي ، بس لمن نظراتو لي طالت اتوترت شديد و الضحك غلبني خاصة إني ما قدرت احدد نظرتو دي معناها شنو! ما كان مضايق ولا كان غضبان بس نظراتو هي الما قدرت اصنفها و اعرف نوعها شنو! عبير واصلت في ضحكها و انا اتوترت بقيت كل ما ارفع عيني ألقاهو لسه بعاين لي ، يادوب ركزت مع نفسي و مع شعري المكشوف و التوب الشبه واقع على الأرض ، طوالي غطيت شعري و صلحت التوب و نفضتو عشان أخفف المويه الفيهو ، عبير جات وقفت قصادو و طقطقت ليهو اصابعها و هي بتضحك قالت ليهو مالك يخوي؟
فجأه كدا قرن حواجبو و قال لينا بنبره حاده دا شنو الهبل الكنتوا بتعملوا فيهو دا؟ شفع انتوا ؟
الإتنين سكتنا و بقينا نعاين لـ بعض ، عبير قالت ليهو معليش ما حـ تتكرر تاني و اقلع لي هدومك دي عشان انشفهم ليك أو اغسلهم ليك بالمره ، قال ليها لا ما إنتي خلي العملت كدا تغسلهم هي ، بتردد قلت ليهو طيب ، عبير قالت ليهو اااا انا حـ امشي بعد دا عشان أغير ملابسي ممكن؟
زح ليها من جنب الباب و أول ما هي اتحركت و دخلت بيتهم انا مشيت وراها بس فجأه هو مسكني من يدي و قال لي ماشه وين انتي؟
عبير قالت لي بصوت واطي الليله سجمك و مشت دخلت سريع سريع عشان ما يسألها تاني ، قلت ليهو و انا بتمتم مـ مـ ماشه لـ عبير ، قال لي و الملابس دي حـ تتغسل براها؟ قلت ليهو بغسلهم ليك بعدين انت بس امشي غيرهم و خليهم لي ، قال لي بس انا عايزهم هسي! قلت ليهو استحاله ينشفوا ليك هسي ، ما عندك غيرهم؟
قال لي كلامي واضح ، في سري نبذتو جنس نبذ ، قلت ليهو طيب امشي غيرهم! قال لي عايزاني أخش جوه و انتي طوالي تمشي تلحقي عبير صح؟
قلت ليهو أكيد ما حـ أخش معاك الحمام! قال لي طيب بس أوعك تتحركي من هنا ، قبل ما يمشي جاهو إتصال ، رد على المكالمه و بقى يتكلم مع المتصل ، المشكله إنو ماسك يدي و بتكلم و لمن حاولت أتفك منو مسكني شديد و ما رضى يفكني بالعكس بدل ما كان ماسكني من معصمي شربك أصابعو مع أصابعي ! أشرت ليهو على يدي بمعنى فكني عمل نفسو ما فاهم حاجه و واصل في كلامو بالتلفون ، لمن خلص قلت ليهو ممكن تفك لي يدي؟!!!
قال لي يعني انا كنت ماسك يدك ! ما إنتبهت ياخ! و طوالي فكاني.....
كذااااب والله ، ئهه قال ما عارف نفسو كان ماسك يدي! دا واحد مستهبل ساي و عندو انفصام في الشخصيه! ....المهم مشى غير هدومو و جابهم لي جبت الطشت و ختيتهم فيهو لمن مشيت أجيب الصابون جيت لقيتو قاعد في السرير الأنا خاته فيهو الطشت!
جبت المويه و الصابون و أصلاً ملابسو ما كانت وسخانه شديد كبيت فيهم مويه و قعدت أغسل فيهم و هو يعاين لي ساي لمن إتوترت و احترت فيهو! هو اليوم أصلو ما طبيعي! نظراتو دي ضايقتني شديد ياخ ، قلت ليهو كلو عشان خاف أجيب زول لو انت مشيت من هنا عشان كدا حارسني بالطريقه دي؟
ما عارفه هل هو استغرب و اتفاجأ من كلامي ولا انا الإتخيلت كدا ، قال لي نعم؟
قلت ليهو خلااااص عرفنا انك ما بتثق فيني و بتخاف اني اجيب ليك راجل في بيتك ، طيب رايك شنو تمشي تقعد لي جنب باب الشارع كدا احسن عشان ماف زول يدخل!
قال لي هسي مالك أنتي؟ سألتك انا؟ قلت ليهو كيف يعني مالي؟ محسسني كأنك ما فاهم أنا بقول في شنو! قال لي بمناسبة الكلام دا لمن إتصلت عليك متذكره الكلام القلتيهو لي؟!!
هنا انا بلعت ريقي و اتذكرت القلتو ليهو حرف حرف قلت الليله حـ يقتلك يا مها شكلو كان دافنها ليك و دا يوم موتك ، قلت ليهو و انا بتمتم مـ مـ قلت شي غلط يومتها! قال لي منو القال ليك انا وصيت أمي عشان تفتش تلفونك؟ ...هي فتشتو ليك يعني ؟
قلت ليهو لا لا شكلي فهمت غلط ، قال لي اذا أمي ما فتشت ليك تلفونك فـ على أي اساس انتي فهمتي غلط؟
اخدت نفس و قلت ليهو بعد ما هي خلصت مكالمه معاك تلفوني كان لسه معاها و هي بتشوف فيهو فـ افتكرت انك القلت ليها فتشي تلفونها ، قال لي قصدك إنو أمي فتشت تلفونك؟ قلت ليهو آيي....لا ...ما عارفه والله يمكن كانت بتشوف فيهو ساي و انا فهمت غلط زي ما قلت ليك ، قال لي مستحيل اطلب من أمي تفتش ليك تلفونك لو عايز براي بفتشو و ما اظن انك بتقدري تمنعيني و اساساً شنو الخلاك تفكري اني قلت ليها كدا؟ و لمن اتصلت عليك بعديها عشان افهم منك الحاصل ما رديتي؟!
قلت ليهو ما دي الحقيقه عارفاك بتكرهني قدر شنو و قدر شنو انت شاكي فيني ، قال لي حتى ولو ، مستحيل اطلب من أمي طلب زي دا ، و تاني إياك تستفزيني و تعيدي الكلام القلتيهو لي داك مره تانيه لأني ما ضامن نفسي اعمل ليك شنو ، قلت ليهو خلاص معناها كان سوء تفاهم ، قال لي ما ناويه تعتذري عن الكلام القلتيهو ؟ في سري قلت هسي لو ما اعتذرت منو حـ يندمني على اليوم السمّعتو فيهو الكلام داك ، أخدت نفس و قلت ليهو انا آسفه ، ما قال حاجه ، سكتنا الإتنين و انا انتهيت من غسيل القميص و البنطلون مشيت شريتهم و جيت دفقت المويه ، و الوقت داك ملابسي ذاتا شبه نشفت فيني ، لمن جيت ماره بجنبو عشان أمشي لـ عبير مسكني من يدي! .....يخوانا البنى آدم دا حيرني عديل دي شنو العباطه و حركات الشفع الوقعت فيهو دي؟
إتلفت عليهو و قلت ليهو برضو ما عارف نفسك ماسك يدي صح؟
قال لي لا عارف ، قلت ليهو طيب لو عايز حاجه ممكن تطلبها مني من غير ما تمسك يدي ، ممكن تفكني؟
ما فكاني قال لي متذكره قصة سيد الدكان صح؟ ....طيب متذكره إنك في تاني يوم قلتي لي : "عندي مواقف كتيره زي دي رايك شنو أحكيها ليك ؟" يومها قلت ليك ما تحكيها لي هسي و هسي عايزك تحكيها لي
