أول ما عاينت وراي شفت راشد واقف و واضح انو سمع كلامي كلو لأنو ملامح وشو ما كانت عاديه ...بس ما مفروض يضايق الضيق دا كلو و اصلاً انا ما قلت حاجه غلط سكتنا مسافه بعدها قلت ليهو بتردد : عايز حاجه؟
قال لي جيت اشيل الجبنه لو جاهزه جيبيها لي ، حسسني كأنو ما سمع حاجه! ابرار دخلت جوه لـ ناس أمي و انا مشيت لـ زينب في المطبخ و جبت منها الجبنه ليهو ، شالها مني من دون ما يعاين لي ، طبعاً لمن دخلت لناس أمي لقيت أبرار الشماره ورتهم انا عملت شنو ، أمي لامتني و قالت لي والله عيب العملتيهو دا! مرام قالت لي راشد دا ظاهر عليهو مسكين شديد و طبعو ما زي طبع أهل أبوي ، قلت ليها نعم نعم ! والله دا كمان اكعب منهم و فايتهم درجات انتوا بس عشان ما قعدتوا معاهو كتير ، أمي قالت لي بإستغراب : اكعب منهم كيف؟ ما تقولي لي بضربك أو بشاكلك.....يعني معاملتو ليك كعبه؟
بإستعجال قلت ليها لا لا ، قالت لي ما تكذبي علي ، قلت ليها و اكذب عليك لشنو و انا اصلاً قلت ليكم كدا عشان ما تدافعوا عنو
ابرار قالت لـ أمي استحاله يعاملها معامله كعبه بتك دي يا خالتو مستهبله ساي و جاحده للنعمه ، لو معاملتو ليها ما كانت كويسه هل هي كانت حتسكت؟ أكيد لا ، المهم شويه كدا عبير اتصلت علي اتكلمت معاها مسافه بعديها اديتها تتكلم مع أمي و مرام ، أبرار قالت لي عايزا اتكلم معاها ، قلت لـ عبير صحبتي عايزا تتكلم معاك و أديت التلفون لـ أبرار ، اتونست معاها كويس و قفلت منها، قالت لي البت دي ظريفه شديد حبيتها والله ، حظك والله حماتك بت ظريفه كدا و بتحبك ، أمي قالت ليها آيي والله انا ذاتي البت دي من شوفتها دخلت قلبي والله و كان واضح إنها طيبه و كويسه ، مرام قالت الله يشوفني عبير دي ، شفتها زماااان لمن كنا صغار و هسي ما عارفه شكلها كيف ، قلت ليها ما مشكله اصلاً هي جايه عرسك بس اذا مُصره تشوفيها عندي صور ليها في التلفون ، فتحت التلفون و وريتهم صورها ، مرام قالت لي ما شاء الله البت سمحه شديد و اسم على مسمى ، ابرار قالت لي اذاً أمهم نحله عشان كدا جابت العسل دا كلو ، أمي قالت ليها امهم ما شاء الله مره مجيهه و سمحه سماحه لمن غلط رغم انها كبرت بس لسه متشببه و مهتمه بنفسها لكن هي مره فقر خلاص ، طبعاً أمي بعد ما قالت كدا طوالي عاينت لي قايلاني حـ اضايق و كدا و هي اساساً ما قالت حاجه غلط ، فعلاً أم راشد مره كريها و فقر ، ابرار قالت ليها عيب يا خالتو ، مها حتزعل و كلهم عاينوا لي ، فعشان أمي ما تحس على حاجه و اخليها تفتكر انو خالتو إشراقه بتعاملني كويس عملت نفسي زعلت و قلت ليها حرام عليك يا أمي هسي المره دي عملت ليك شنو؟....ما عارفه ليه ما حابه ناس أمي يعرفوا الحقيقه و انو راشد و أمو ما بعاملوني معامله كويسه ، نفسي ما سمحت لي اقول لأهلي حاجه ما كويسه عنهم ، المهم ابرار قعدت معانا لحدي العصر كدا و بعدها قالت لينا حـ امشي بعد دا ، حنسناها عشان تقعد اكتر بس قالت الزمن اتأخر ، طلعت معاها من الغرفه عشان اقدمها للباب ، قالت لي لمن اتكلمتي عن راشد قلتي : انا ما صدقت انو اتخلصت منو ، قصدك شنو بالكلام دا؟
