تَحت رحمتِه | BxB.

جَهَامَة.

- ماضٍ لمّ يُنسى وحاضِر لمّ يُعِشّ.

-

الساعة 9:30 الصباح ..

طالعّ فيه بقهر : كله منك ليش م رفضت تدور عليه من البداية؟.

تنهد بملل : هذا شغلي حَمد وأنت لازم تتقبله , بعدين أنا قلت لك وأنت اللي وصلت هالكلام له.

نزلّ حَمد عيونه : مهما حاولت أكذب مقدر وطلع كل شيء مني له م عَدى شيء واحد بس.

جابِر : مشاعرك.

أستغرب حَمد : شدراك؟.

جابِر : واضح.

همهمّ حَمد كَرد وسرحّ بيّنما يتأمل كفّ يده ..

جابِر : تحبه حيل؟.

حَمد : واجد لدرجة تمنيت لو يترك نادر بحاله ويجي لي.

جابِر : هو م يحب نادر صح؟ م حسيت أصلًا.

حَمد : له ماضي مع شخص قريب من نادر ولازالت حرقة قلبه للحين م طفتّ.

جابِر : شصار؟.

أبتسم حَمد وطالعّ فيه : شِجابنا لبعض؟.

ضحكّ جابِر : زياد.

أنسدح حَمد وتأمل السقف : وجودك مخفف شوي الثقل اللي أحس فيه جواتي.

جابِر : كويس مني فايده بِ غير التخّريب.

ميّل حَمد رأسه : ليش مورطّ نفسك بهالشغل؟.

جابِر : أضطريت.

حَمد : ليش؟.

جابِر : مريت بظروف كثيره قبل مع أهلي ودراستي وكل شيء عشّته فَ لما كبرت وشفت إنه الكل رافض يشغلّني عنده أضطريت أشتغل بهالشيء ولو إنه مو شغل قانوني.

حَمد : غير أنك تجيب معلومات شتسوي؟.

جابِر : عندي كِذا شخص يساعدني أصلًا وشغلنا كله بالمعلومات والتهّكير.

حَمد : تهكّرون؟.

جابِر : إي عَ حسب اللي يطّلبنا , ساعات يجينا شخص يبينها مثلًا نهكّر موقع مُعين أو جهاز مُعين بس مو كثر المعلومات.

حَمد : بس ممكن شغلك يوديك بداهيه؟.

جابِر : أكيد لأن المعلومات اللي نجيبها ساعات تكون خاصة وسرية فَ هذا إختراق لِـ خصوصيات الناس و 'همسّ' الدولة.