الرجل المجهول

#21

-مرام علاش عاملة فى روحك هكا 3 أيام بلاش ماكلة بلاش نوم ياخى تحب تكمل حياتك هونيا و الا شنيا حكايتك بضبط ؟
قعدت مرام ضامة ساقيها لصدرها ملامحها صامدة وجها اصفر عينيها محوقين حمر كان دموع هابطة منهم ....
-مرام اسمعنى يعيشك فهد كى جاء حكالك كل شي فجأنى صراحة و اثبتلى حاجة كنت شاكة فيها و تأكدت منها فهد يحبك مرام راجل هذاكا كان ينجم يتخذ  اجراءات قانونية فى حقك عندو وثيقة تثبت ملكيتك لسيارة او يقتلك بسهولة كان ينجم يشربك حاجة تقتلك طول و حد ما يشك فيه اما هو غلبو اصلو و هاو عندى تحاليل قدامى تع كميات لكان يحطلك فيها ما تقتلش فار و صدقنى كان تحط فى قلبك و تكمل علاجك ترجع كيما كنت و احسن 
-دكتورة مانيش باش نرجع كيما كنت و لا أحسن و عارفة لإنتى تحب تهزلى مورال عارفة فهد عمرو ما حبنى و عارفة عيشنى فى كذبة و عارفة ...عارفة عارفة لعمرى باش راه فى حياتى (طرشقت ببكاء)
-مرام اسمعنى عيش اختى إللى تعدا على فهد و هو صغير مش هين طفل عايلتو تقتلت قدام عينيه و عاش فى بيئتين مغايرين تماما حتى من إسمو تبدل عاش حياتو لكل بلاش هوية جاب طفلة باش ينسبها ليه و يعمل عائلة من اول و جديد لكن  شأت الأقدار  بنتو تموت فى حادث ...إللى انا متأكدة عن غير قصد و متأكدة انك كنت خايفة هذاكا علاش هربت مرام انا مانيش لوم فيك اما نحبك تفهم موقفو راجل هذاكا رغم فلوس و قيمة ضايع من داخل روحو ما رجعت الا بوجود طفلة إللى ربي ما قدرلهاش تعيش ....
-دكتورة انتى كيفاش تشوف فيا قتالات أرواح ؟!
-لا نشوف فيك إنسانة و انسان يغلط اصلا ربي خلقنا على كورة أرضية حتى نغلطو و نتصلحو و ديما ذكر إللى مدامك تتنفس أعطى لروحك فرصة ثانية ....
-كل ما نعطى لروحى فرصة ثانية دنيا تعطينى كف ترجعنى لتالى 20 الف خطوة انا كنت متخيلا حياتى مع فهد باش تتبدل كنت متخيلا كلامو ووعودو بلحق اصلا لتوا مش مستوعبة كيفاش انسان نجم يمثل بطريقة هذيكا كيفاش نجم يعاملنى بحب و هو يكرهنى صحيح انا توا مهبولة اما مذكرة مذكرة كل شي مذكرة شنيا صار بينتنا بضبط مذكرة دقات قلبو و انا جنبو حنية خزرتو لهوتو بيا خوفو عليا دكتورة منجمش نحكيلك حتى علاقتنا فى فرش ماكانتش علاقة عادية ماهيش ..ماهيش تع كوبل عادى و الا واحد يمثل و الا حابب يشيخ و كهو كل شي كان طالع من قلب لهدرجة أنا غالطا فيه  عارفة انا سببتلو وجيعة كبيرة و شنيا انا قدام بنتو ... اما ...اما انا بلحق حبيتو بلحق هو أول راجل دخل قلبى و ملكنى اول راجل ذقت طعم الحب معاه اول راجل عينيا عنقت عينيه كان اول ما يخزرلى يضحكلى يرجع فيا روح حيانى من داخل ضوانى بعد ما عشت سنين طافية ملانى بالحب كنت مستعدة على خاطرو نتبدل و نهديه سنين عمرى الجاية و فعلا تبدلت و حاولت نكون المرأة اللى يفتخر بيها قدام ناس و بديت حياة جديدة دخلت نقرأ بدلت لوك تاعى نحيت سهريات خروج شراب كل شي .... كانت أمنية حياتى يرضا عليا و يحبنى و ما كنت طالبة شي الا تعنيقة حتى لو باردة شدت ايد ابتسامة صغيرة من شفايفو لكن فى اخر ما خذيت شي و طلع كل شي تمثيل اما راضية راضية خاطر حبيتو و مازالت نحبو و باش نقعد نحبو حتى لآخر نهار في حياتى....
______________________________________________