الرجل المجهول

#22

مد فهد يديه لمرام ماكانش عارف فاش قاعد يعمل و شنيا باش يصير بعد... حاجة وحدة فى مخو انو ما يطلع الا معاها ... قعدت تخزر ليديه ممدوة و لعينين بوها ... و كى عادة خيرت يدين فهد رغم إللى عارفة مش باش توصل لشي معاه طلعو لبرا ، وقفت تلهث
-فهد ... فهد يزى هونى
تلفتلها خزر ليديه كيفاش مكبشة فى يديها ....عرفت انو مش من قلبو و انو طلعها معاه خاطر خايف فى جرتو تكبر مشكل و تقتل روحها او تقتل بوها جبدت يديها من ايدو تبسمت قعدت تخزر لوجهو احمر و شعرو لضربت فيه شمس و لا اصفر قداش متوحشة تمسو تشم ريحة شعرو بنينة أمنية حياتها فى لحظة هذيكا ياقف وقت و تتمتع بالنظر ليه اكثر وقت ممكن...
-امشي عيش حياتك فهد ما تخاف من شي و لا تنقم على حد بابا على كرسي اليوم غدوة يموت و انا ... انا كيما تشوف تنجم تعيش توا مرتاح عرس بحنين و جيب صغار و سامحنى ... سامحنى نعرف صعيب تسامحنى اما بالك الوقت و حياتك جديدة ينسويك جرح لسببتهولك خاطر انا عمرى لا باش نسامح روحى ...
قعد يخزر فى عينيها يخزر لدمعة المحصورة و ابتسامة طفولية لماتفارقش شفايفها حتى و هو بعيد عليها ... حب يعنقها يودعها وداع اخير حابب يسمع منها شنيا صارلها فى بعدو كيفاش نجمت تقوم الصباح و هو مش جنبها كيفاش استحملت فراقو و هى كانت تتنفسو .... قاطع تفكيرو ضرب نار رجعت تجرى و هو وراها هبطو لڨراج تلقى بوها انتحر و قدامو كنزة واقفة ....
كنزة تبعت مرام وقت طلعت من دار كانت خايفة عليها لا تعمل فى روحها حاجة من وقت ما طلعت من مصحة نفسية دكتورة وصاتهم باش يقعدو عينيهم عليها وين ما تمشي تبعتها و سمعت كل شي بعد ما طلع فهد مع مرام هبطت لوطا واوجهت بوها بالحقيقة ما طاوقش بنتو كبيرة تراه قتال أرواح خاصة انو كنزة كانت نقطة ضعفو بدون ما يحكى و لا كلمة اول ما وقفت قدامو و قتلو علاش بابا علاش قتلت عائلتى ! انتحر ...
__________________بعد 3 أشهر __________________
-عسلامة
-فهد هونى
-اى مرحبا كنزة انتى
قحرت كنزة لحنين بدون ما تلفتتلها و لا رجعت سلام حتى دخلت لداخل
-وينو فهد
-باهى توا نديهولك فى laboratoire لوطا
-اوك
وقفت كنزة قدام تصويرة عرس فهد و حنين عرايس جدد عندهم شهر
-هه عرس و بدأ حياتو من اول و جديد و اختى تقصف عمرها و تخرب بدنها من دوايات بابا مات و ديون كلاتنا من كل شيرة و هو عرس و بدأ حياة جديدة و لا همو فى حرب لحلها فينا و لا مأساة لعيشهانا
قعدت تحكى فى سرها محستش عليه واقف وراها الا ما شافت خيالو فى شباك
-مبروك
-يعيشك
قعدت تمشي فى فيلا قصر مش فيلا ...احسن الف مرة من فيلا اللى كان مسكن فيها مرام
-جيت باش نهز دبش اختى
-باهى نجيب مفتاح كرهبتى و نمشيو لفيلا
طريق كامل فى كرهبة ساكتين فرحان بوجودها جنبو متمنى يعنقها يخزر لوجها يفاتحها فى موضوع بعد ما عرفت انو خوها ...وصلو لفيلا اول مادخلو هى من قدام و هو وراها .. جبدها من مرفقها بحرارة روح دم تحرك فيه مش مصدق اختو قدام عينيه عاش حياتو لكل يتخيل فيها كي كبرت كيفاش ولات و اليوم بينو و بينها سانتى و باقى فما حواجز ....
-كنزة انا فرحان لشفتك
جبدت يديها بنطرة
-حوايج اختى وين ؟
-الفوق
طلعت طلع وراها
-ما عندك علاش جاى ورايا
-علاش تحكى معايا هكا؟
-شنيا تحب نعنقك و نبوسك و نقلك خويا تحلم مرام اختى انتى لا نكرهك ان شاء الله تكون مليت فراغ لفيك بعد ما شتتنا عائلة كاملة بابا و مات و امى راقدة بسيروم بعنا كل شي فهد كل شي لحبيت عليه وصلتلو حتى دار امى بعناها ديون علينا من كل شيرة مرام إللى ما تهزش يديها لراسها تخدم فى مركز رعاية الام و الطفل تكوش لصغار انا نخدم ليل و نهار فى كلينك باش نوصلو ندفعو كراء و مصروف دار و الا نموتو بالجوع و انتى سبب عائلتى فاش جات عندك مشكلة مع بابا احنا شنيا دخلنا علاش دمرتنا لكل
فهم من كلامها انو مرام ما حكتلهاش على سبب انتقامو منها او ممكن اصلا حكاية حادث تكون مخبيتها على عائلتها ...
-تنجم تجى تعيش معايا و الا هونى و الا كان تحب نشريلك فيلا قلى انتى شنوا تحب و انا توا نعمل
-شنوا نحب ! تبعد من وجهى لمد حوايج اختى و روح ما نحبش نرى وجهك
-اوك على راحتك ....
______________________________________________