لم يلمسني احد

البارت ٣١

بكر.. توسلت بسمر تروح وياي ما قبلت وسدت الباب بوجهي.. واجه احمد وكمنه نتعارك اني وياه..
وهوه يكول اصبرلي اجيب سلاح ابوي واكتلكم ثنينكم.. دخل للبيت ركضت وراه جاي ادخل سد الباب وسركاه..
صحت لك عاااار افتح الباب لا اكسررره.. شلبكت رجلي وطفرت من فوك الباب.. شفت كعد فوكاها ويشيل براسها ويضربه بالكاع..
دفرته منها ووكعت عليه انهديت بدون ما ادري.. كل قوه وغضب بداخلي طلعتها بيه.. شوهت وجها..
لحد ما خليته جثه هامده.. شلت سمر ومشيت مشا وراي كوه ما يكدر يكوم.. ويصيح موتكم على ايدي والله..
خليتها بالسياره لزمني من هدومي ودفعني ؏لسياره وضربني بوكس لوجهي.. لزمت راسه ضربته كله ودفرته..
وركضت ركبت السياره واني اصيح سمررررر اصحي سمررررر.. لا تموتين .. يارب وين اخذها اشرد بيها لو اوديها مستشفى..
اكو بطل يمي مال مي نص.. شمرته عليها واني اسوق.. ماكو ردة فعل اجر ايدها اعصرها.. وكعت عليه.. مثل الميته..
دست السياره ورحت بيها لاقرب مستشفى.. دخلتها.. شالوها بالسديا وركضو بيها واني امشي..
اجاني اتصال من امي.. كالت انته وين.. كتلها بجهنم عساني شرايده مني الله لا يوفقكم ارتاحيتي انتي وابوي من سويتي هيج..
موتو البنيه بلا ذنب لييييش كل ذنبها انا عاشكها.. كالت احجي وين اخذتها.. كتلها معليكم.. كالت بكر اعقل وكول انته وين..
امها تريد تجيها تخبلت من سمعت بتها واكعه.. كتلها انعل شرفكم وانعل كل عشايركم.. تحلمون تشوفون اصبع منها..
جاي امشي.. وشفت امها كبالي.. كالت بكرر شتسوي هنا موتت الرجال انته وذيج الكلبه جاي تقضي عليه تموته..امي سمعت ام سمر حجت..
كالت يعني انته بنفس المستشفى البيها احنه.. جايتك.. كالت ام سمر.. اطلع منا ما اريد اشوف وجهك اطلع..
كتلها سمر نقلوها للطوارئ.. كاللت شلووون.. سمر شبيها.. كتلها مو انتي كايله لامي تردين تشوفيها..
البنيه ما الها ذنب.. ضربتني ولك بتي شبيها احجيييي.. كتلها ضربها احمد ووكعت ونقلتها وجبتها للمستشفى..
عافتني وركضت.. ركضت وراها.. ردنه ندخل.. كال الدكتور ممنوع الدخول.. وكفنه بالباب.. بقت تلطم على خدها وتكلها..
سمر كتلج لا تحفرين كبرج يمه.. وج وصيتج وما سمعتي.. ليش هيج ضيعتي شبابج لييش..
اجت امي.. وبقت تصيح انته ما تجوز وك ما تستحي تاخذها وتنهزم..
كتلها اسكتي انتي بالذات كل كلام ما الي وياج.. عفتهم ومشيت اشرب جكاره بحركه.. امها كامت راح يم خالي فرحان..
بقينه اني وامي للصبح عادل اجه.. كال بكر شنو هلحجي السمعته.. درت وجهي منه.. كال عود صدك عندك علاقه بيها..
كتله لــNOـا.. كال لعد شنو الصار خالي انجلط وسمر جوه شنو الموضوع فهموني..
كالتله امي هاي الجوه كلبه وساقطه .. كاللها يمه شنو الموضوع فهموني.. تره اني كوه صاحي الشرب براسي لسه..
جاي يحجي عادل.. اجه احمد وجها ازرك.. وهم يريد يضربني.. وكفتله صدر.. تلازمنه اني وياه من الياخه شمره عادل..
كاله هوب هوب شنو تلزمه شو انته ما تحترم.. تفل احمد على عادل تفو عليك لو انته رجال..
اخوك يحب مرتك وياخذها ويمشي وانته ادافعله تك….د على مرتك ياااااا عار.. عادل دار وجهه عليه..
كتله ما عندي شي جذاب لا تصدكه هذا كلب درتله لاحمد كتله انته اخ انته.. الحيوان اشرف منك.. احمد صاح اشرب من دمك ابن الكلب..
جاي نتصايح ولازمين ابعض..
طلع الدكتور.. صاح اخوان لخاطر الله مشاكلكم حلوها برا.. المستشفى بيها مرضى.. ياريت اطلعون برا..
كتله دكتور حالة البنيه.. كال عدها فطر بالجمجمه.. وبداية صرع.. صايره عدها حالات اغمى من قبل كتله اي..
كال لو استمر الاغماا وياها يشكل عدها الصرع ويصعب علاجه.. واحتمال يتضرر الدماغ وتسبب الها اعراض جدا خطيره..
كاله احمد دكتور اريد اطلعها.. كاله الدكتور منكدر حاليا.. كاله دكتور اني اخوها واريد اطلعها اخذها مستشفى ثاني..
كاله على مسؤليتكم.. كتله انته شنو واطلعها.. دكتور هذا رجلها اخوها ما اله دخل.. باوعت العادل عافني ومشا..
كاله احمد اطلعهاا على مسؤليتي..صحت وراه عاااادل لا تتركها.. وخر ايدي ومشا ..جريته حيل.
كتله عادل حرام. عليك تنطيها لهكلب.. انته شنو ما عندك ضمير.. كال خليت الضمير الك.. لما تخلي عينك على مرتي..
كتله والله ممخلي عيني.. ولا فد يوم مسيتها كل الجان عندي مشاعر بكلبي من جنت اني مراهق..
وجنت ناوي اتزوجها.. وانته خطبتها.. وبعدين شمرتها وخليتني اتحمل مسؤليتها.. وعمري ما تعديت الحدود وياها يشهد الله..
عافني.. لزمته عادل اترجاك لا تتركها عادل.. يوخر مني ويحاول يمشي.. لزمته ضربته واكله لااااا تتركها لا تتركها اكلك.. واضرب بيه..هوه بقه يتلاوه وياي.. اجه حرس المستشفى طردونه برا.. فرت راح يطلعها الكلب ويكتلها.. الزم بعادل وما يرد.. عافني وراح..
تخبلت عقل ماضل براسي.. اجيت ادخل للمستشفى الحارس كال ممنوع اخي منريد مشاكل.. كتله راح يكتلوها يا مشاكل وخررر..
لزموني وطلعوني برا ويصيحون.. احس دمي يغلي واني اصيح.. طلعت امي.. كتلها يمه فدوه شتردون انطيكم..
اموت اخذو روحي بس لا تخلين هلكلب.. ياخذها.. كالتي تنفذ الاكلك عليه.. كتلها حاظر مستعد والله بس لا تخلوهم يكتلوها يمه اموووت والله.
كالت تقبل تتزوج وتعوفها وتشيلها من بالك.. باوعتلها.. كتلها تساوميني.. كالت غير هيج اخليها تموت ومعلينه بيها..
كتلها موافق.. بس طلعيها والله كلشي اسوي.. راحت امي.. اخذت ابوي.. ومنعت احمد يطلعها.. كالتله عادل راح يرجعها اتركها..
كاللها ما اتركها هاي الجلطت ابوي الا اكتلها واشوفها ميته كبالي.. كالتله تنجب مرت ابنه وراح ناخذها..
ومثل مسترناها بالاول نسترها هسه.. كافي ابوك انجلط لا انوب يموت بطل خبال.. حجت وياه بعصبيه وطردته..
بقت سمر بالعنايه.. كالو اذا مصحت اليوم.. نضطر نبلش بعمليه.. جنت اتمنى بس الزم ايدها..
احسسها بأماني.. اني الجنيت عليها هيج.. جانت تكلي خايفه واني اللي اطمنها.. وهاي وكعت من الخافت منه بسببي..
كعدت بالمستشفى ابجي واشرب جكاير.. لحد ما بليل.. كالو صحتت.. فرحت من كل كلبي..
بس قررت منا وابتعد ما اكدر اذيها اكثر.. خل تعيش حياتها.. وتبقى عايشه بكلبي حلم.. حلم وردي ابقى اتمنه من الله يحققه..
اذا كان زواجي يخليها تعيش.. اني اقبل باعدامي واتزوج.. بس ما اكدر اسببلها اكثر من اللي سببته الها..
… ..
ويذكرني بيج اليل والنسمات
وعطرج من اشمه والهوه يزته
يحبي الاتذكره بكل نغمه والالحان
طفل وامتيه امه العبره خانگته
يعشگي ويبت گلبي وللنفس سباح
غيرج مايبات بگلبي ويفّته
بكثر ما بيه لهفه البسمتج يهواي
صار بگلبي حسره وناره حارگته
فطر گلبي ياسمر الي فطرلج راس
وگلت هينه اذا هالنفس ماخذته
بيج يساوموني وحته اعيشج كون
صدري وغير اديج ايدين شابگته…
سمر .. فتحت عيوني.. الم براسي فضيييع مو كادره افتح عيني حيل من وجعه..
كمت احاول اركز واشوف اني وين.. شفت سقف ابيض اجهزه مغذي معلك.. عرفت اني بالمستشفى..
جنت اتمنى ما اصحى وارجع الواقعي.. جنت اتمنى عزرائيل من هلحظه وياخذ امانة ربه ويخلصني..
جنت افكر بالانتحار.. جنت اريد اموت.. وارجع اكول حرام.. و مره اصفن اعاتب ربي.. المثلي عايش ليش تحرم عليه الانتحار..
ما تسمع دعائي.. ما تشوف دموعي.. شنو حكمتك من اوجاعي.. تحسني ما استحق الفرح اخذني يمك ولا تفرحني..
ليش مخليني عايشه بنارهم.. اجه الممرض.. كال شسمج.. ما رديت.. كال بنتي تسمعيني..
هزيت راسي.. كال شنو اسمج.. كتله سمر.. كال العمر.. سكتت.. كال تذكرين عمرج.. كتله ما اعرف مواليد 1989..كال جيد..
تعديتي مرحلة الخطر.. كلت للاسف.. كال بنت صغيره مثلج ليش هلكد يائسه.. ما جاوبت..
كال راح ننطي خبر لاهلج انج صحيتي وننقلج لغرفة المرضى.. هزيت راسي.. بقيت نايمه..
غفيت.. ما احس الا الفراش مالتي انشال.. انتقلت بغير سرير.. ويمشون.. اشوف الاضويه اللي بالممر..
الجو بارد.. كال اهلج.. وما شفت اي احد من اهلي فوك راسي.. دخلني بغرفه بيها مرضى نساء..
نوموني.. بقيت صافنه ما اعرف بس اكو خمول بجسمي وتعب بمخي واحس اعصابي راخيه..
اجت عمتي وكفت على راسي.. كالت الله لــNOـا ينطيج انشالله.. بس خل ازوج بكر.. تحلمين الفيج ابيتي..
دمرتي ابني الله لا يوفقج.. اني مثل الجثه بس اباوع.. دخلت امي.. حظنتني وتبجي.. وج يمه سمر شكتلج..
وج يبنيتي شسويتي بروحج.. كتلج لا تمشين بكلبج ناسنه ما ترحم.. نطقت وكتلها يوم اريد امووت..
كالت ومنو يستاهل تموتين عليه وتنهين شبابج.. كتلها ما اموت على احد اريد اموت لنفسي..
اريد اخلص من اللي يسموها دنيا.. ما شفت بيها بس الالم.. بااستني وكالت بنيتي يمه فدوه لا تحجين هيج..
كافي عليه ابوج اللي انجلط وصار جثه.. كتلها بسببي.. كالت كومي هسه والله كريم.. المكتوب عجبين لازم تشوفه العين.. وهذا قدر ابوج..
بقت تحجي ويايه وساعه تواسي وساعه تلوم وساعه تغلط.. وساعه تبوسني..
للهناك.. اجه عمو خليل.. كال لعمتي يله سويت الخروج خل نطلعها متنه.. كالتله عمتي يله..
كالت كومي.. كتلها انطيني ايدج.. مشت وما سندتني.. اريد اكوم الم براسي ذابحني..
اجت بنيه تلاثينيه محجبه.. كالت كومي خيه عيني نفسج.. وسندتني وكمت.. كعدت علسرير..
احس راسي راح يوكع مني.. احسه مو من جسمي.. بيه الم فضيييع و؏ساعه ينفجر..
كمت اريد اوكف ادوخ واكعد.. اجت دكتور. كالت وين ماما وين.. كتلها اريد اكوم.. كالتلها عمتي نريد نطلعها..كالتلها تحون صدك.. ماما بيها فطر براسها هذي شنو اطلعوها.. غير توكع وتنشل لو تنصرع لو تنجن..
كالتلها عمتي بيها سبع ارواح ما يصير بيها شي. دكتوره.. كالتلها انتي ام زوجها.. كالتلها عمتي اي..
كالتلها واضح جدا.. لو بنتج اكيد مراح تسوين وياها هشكل.. بس الدنيا دواره ادور ادور وترد عليج.. احذري وخافي الله بيها..
كالتلها عةتي دخل تخاف هيه بالاول.. وجرت ايدي بقوه وتكلي امشي عاد لا تتعايرين.. مشيت..
كوه خطوه خطوه.. نزلت المصعد.. وطلعنه.. وصلتني لبيتها.. كتلها ليش هنا.. اريد بيت اهلي..
كالت احمدي ربج واشكري خفت الله وجبتج هنا الا احمد راد يطلعج ويذبحج.. كتلها ويذبحني.. اريد اروح لاهلي..
تركوني ودخلوو.. بقيت واكفه بالكراج.. بعدها دخلت.. اباوع بالوجوه ماكو بكر.. دخت سندت علحايط اوكفت..
اجت رنا تفلت عليه وكالت لا هله ولا مرحبا ادري بعبع متموتين.. ردت امشي للغرفه.. جان تكلي هوب هوب..
هذي الغرفه صارت الي.. منا وهيج تنامين بذيج الغرفه الصغيره.. باوعتلها.. كتلها غرفة اخشابي وغراضي كولها..
ضحكت استهزاء وكالت اي مو الخلفج جابهن.. لو ما كلهن من اخوي .. مر عادل.. كاللها يمه المن جبتيها..
تكله اسكت.. بس يتزوج بكر وطلكها.. خل نخلص من سالفته مليت.. انصدمت بكر يتزوج!!! معقوله قبل بغيري بعد كل هلعذاب..
اجه يمي عادل وكال هين سمر.. تباوعين بعيوني وعينج على اخوي.. هين.. الا اكسر خشمج..
ما رديت مشيت كوه ورحت للغرفه الصغيره.. لكيت كل غراضي.. اللي لازم يودوها لاهلي.. شامريها بيها وصايره هوسه..
مددت بالكاع.. ونمت.. محد جابلي اكل ولا حتى مي.. واريد اكوم للحمام ما اكدر من الوجع..
اجه خالد.. بليييل ما اعرف الغرفه ما بيها ساعه.. همس سمر هذا موبايلي.. بكر كال خليه صامت يمج..
يريد يحجي وياج.. كتله ماشي بس خلودي كومني.. كال كومي.. سندني ووداني للحمام.. دخلت كوه وطلعت..
رفعت عيني على غرفة بكر.. يباوعلي من الشباك بحزن.. وجن يكلي مابيدي شي.. وكفت اعاتبه بعيوني.. هذا امانك بكر.. هذي الطمأنينه الوعدتني بيها..
دنكت والدموع تجمعت بعيني.. وصلت الغرفه.. خابر كتله خالد سد الباب وراك.. كال ماشي..
رديت الوو.. اسف والله اسف على كل الم سببته مو بيدي كتلج سمر تعاي وياي ما رضيتي..
كتله هوه المفروض جان هيج.. لان هلدنيا تفرش فراشها بس للساقطات والشريفه تسوي بيها مثلي..
لو مساندتك وشردت وياك جان حظي كعد.. بقى يجر حسرات بدون ما يحجي.. كتله مبروك..
كال ؏شنو.. كتله على زواجك.. كالو قريب.. كال مو كل عرس يعني فرح مرات يكون العرس كبر وينسد عليك.. ومجبور تنام بيه
كتله انته تنجبر.. كال لو لزموني من ايدي التوجعني اي انجبر.. كتله وبشنو لزموك وقررت تتزوج..
كال حياتج.. ضحكت وكتله جان رحمتني وخليتني اموت ليش ناوي تعيشني بعذابك..
كال متستاهلين الموت.. ما اكدر اعيش بدنيا انتي مابيها.. مستعد امشي علجمر.. وانتحر من اكبر جبل بس مو كادر اتحمل حياتي بدونج..
كتله وراح تتزوج مـℳOــو.. خنكتني العبره واني احجي.. كام يجر النفس برشح.. يبجي..
كتله مبارك عليك عرسك.. والله يعيني بفراكك.. كال سمر خليني اخذج وننهزم لبعيد تعبت لا تجازفين..
لا اريد اعرس ولا انتي تبقين هنا.. لا اريد اهل ولا عمام وحتى العراق ما اريده.. بس اريدج..
كتله الله يوفقك بكر.. مع السلامه.. سديته وكعدت ابجي بحررركه.. ابجي واحس دموعي تجرح خدي من تنزل..
دخل خالد.. كتله اخذ موبايلك.. اخذه ومشى.. بقيت بالنار عايشه.. بذل عمتي ورنا وحنين وما اكو احد بكلبه رحمه.. مرات اشك همه بشر ..
جنت اشوف تحضيرات عرس بكر كدام عيني.. خطبو وجهزو كولشي باسبوعين.. وبكر مثل الجثه التمشي.. ومدنك راسه ومبين عليه الانكسار..
اني ما اطلع من غرفتي اببد.. باقيه بالخرابه الشمروني بيها.. وبكر ما يكدر يحجي..
بس يدخل يرجعوني لاهلي .. اجه يووم عرسه و اوووووووف عساه لا اجه.. والله صرت احس الهوا كوه يمر بريتي..
اشوفهم هوسه ويحظرون.. والعروس بنت عمه نضال بنيه حلوه وزغيره ازغر مني.. عمرها 20..
ويا حركة كلبي عليه.. ابجي واكول شبيه حبيته.. ليش خضعت الكلبي وما مشيت بصوت عقلي..
عمتي رادت ليلة عرسه بفندق ما قبل هوه كاللها بالبيت وما اريد هوسه وعزيمه بس خواتي..
بس عمتي عزمت عمامنه واقاربنه كلهم.. ياهو اليطب يشوفني كاعده وعيوني سوود والتعب هالكني..
يسألني شبيج شذبلج هيج.. اعجز اجاوبهم واكلهم عشكي ذبلني.. اسكت والدموع تتجمع بعيني وابعدها وما انزلها..
صارت الزفه واحس عمتي قصد تسمعني هلاهيل قريب من غرفتي.. احس كلبي راح ينفجر اريد اصرخ مو كادره اتحمل..
بقيت كل شوي تنزل دموعي ومن يدخل احد.. امسحها.. كالت بنت عمي شنو مترحين ويانه للزفه اشو ممبدله..ابتسمت وكتلها تعبانه.. كالت يااا ارتاحي لعد.. طلعو وخله البيت بس عمي خليل موجود..
تمنيته يطلع واصرخ.. همي اريد اطلعه جاي احس بالموت.. اريد اتنفس.. كل شوي افرك بركبتي العبره تخنكني بس اتذكر اليوم بكر عريس..
اليوم يكعد وياها.. يضحك لو لــNOـا.. هم يتقربلها ويحس بيها.. يتذكر دموعي من يباوعلها لو لا..
يتذكر اوجاعي ابدلة عرسها لو لــNOـا.. يتذكرني لو لــNOـا.. لو راح ينساني ويلتهي بعروسته..
جابو الزفه والهلاهل والعرس.. متجرئت اطلع.. بقيت مخليه اديه على اذاناتي وابجي حيييل..
لهناااك سمعت (عريس وربعه يزفونه).. ركضت للشباك اباوع.. شفتهم دخلو العروس ودخلو وياها..
يا نار طلعي من ضلوعي.. ربي هواك اريد نفس.. بقيت ابجي ابجي.. لحد ما نشفت دموعي..
كمت اختنك بالعبره وما تنزل دموع.. والله الموت اهون من هلوجع.. يارب رحمتك.. باوعلي فدوه..
محبوبي اليوم وي عروسته مختلي بيها.. ما حس بدموعي.. ما وصله صوت كلبي.. ما اذته آهاتي..
مو هذا نفسه الكال ما اعوفك اني.. ودك صدره لو للموت يموت بمكاني.. وينه.. جاي اموت وينه..
بقيت ابجي ابجي ومحد بحالي والله.. تكول بيه مرض معدي محد حته يكولي شبيج..
بقيت ساعات طويله اني على نفس الوضع.. لا تنزل دمعه ولا تسكن عبره.. وبين نار ونار روحي محتركه..
… ..
واتخوصرتلي الدنيه هيج وحايره
انه ويامن اليله مساهره
حضني فارغ ،،،،
بحضنك اتوسد غريب
ها يملك الموت روحي مناطره
ماخذك مني اعله حاضر يا رباي
مو كلتلي بگلبي حبج حاصره
……
واني بهلوضع ابجي.. ما احس اله انفتح الباب ودخل شخص.. اريد اباوع بعيوني الضلام سادها.
بكر هذا اي اي ولفي هذا.. هذا كلبي حس واجه..
اتقرب يمي.. كمت على حيلي.. لزمت اديه.. صرخت بصوت مخنوك.. بكر جااااي امووووت.. بكر مو متحمله اعيش موتني
كام يبجي بحركه.. خله راسه على كصتي ودموعه تجري بحركه.. ماكدرت سمر والله.. ماريدها.. كلبي ما يريد غيرج.. سمر والله اتمنى اموت ولا اطب عليها..
كعدت يم رجليه كتله خلصني بكر جاي اموووت مو كتلي حبيني وراح احميج مو كلتي لا تخافين بحبي..
وينه وعدك كول.. ما شفت من وعودك بس الم وجراح.. كام يبجي ومدنك راسه ويكول تعبت ياربي اخذ امانتك تعبت..
وكام مني بسرعه.. بقيت ابجي حييل بوجع يخنك مو كادره اوصفه.. واني بمكاني وره ساعه..
سمعته يغني.. وصوته مال واحد سكران.. ويعزف.. وكاعد بنص الحوش.. كوه كوه جبرونه نتفارك كوه كوه كوه.. يبجي..
وانه وياها من المحبه صرنه الهم احلى غنوه.. يغني وبصوت سكران كوه يجر ويعزف.. ويبجي ويه الصوت..
جنه انه وياها انتحظر علزواج احنه نوينه علزواج احنه نوينه.. تالي اجتنه غيمه سوده.. ضيعت كل امانينه.. ضيعت كل امانينه..
واللي جبرونه انتفارك.. وياهم احنه شجنينه.. يحجي ويبجي وتعتلي صوت البجي مالته ويرجع يكمل ويمسح الدموع..
اني اباوعله و ابجي على صوت بجيه.. طلعو اهله كلهم على صوت العود والغنا مالته.. كاله ابوه انته تخبلت..
عايف عروستك بالغرفه وكاعد تشرب سم الهاري هنا.. وتغني.. انته ما تستحي.. كاله توخر مني لا ابتلي بيكم..
يحجي وهوه كوه يجر الكلمه.. كاله كوم كوم طب العروستك نريد بياضها.. دفع ابوه.. وكام يغلط ويخربط بالحجي..
ويكلهم اطلعووو من حياتي اطلعووووو ما اريدكم هيج هيج منكم دمرتوني.. ساميه ارتاحيتي من دمرتيني ساميييييه..
شسويت فهموني شسويت.. الله اكبر عليكمممم.. ولكم بس حبيت ما سويت شي والله لو كافر بالله هم مو هيج اتعذب..
ولكم دمرتوووووني.. طلعو هاي الكلبه من غرفتي طلعووووها.. ما اريدها.. ما اتحمل غيرها بكلبي..
ريحة حبيبتي لليوم بغرفتي طبت هاي خنكتني بريحتها المعفنه.. كاله ابوه انجب وتعال طب فضحتنه سكران بيوم عرسك..
كاله وخرررر مني عوفني امووت.. اني اريد اموت هاي ساميه موتتني اووف يمه من عساج بنار مثل نار كلبي..
المن جبتيني لعذابج .. ولج ما حسيتي بابنج تهجمين كلبي ليييش.. ولكم كاااااااااااافي تعبت وحق الله تعبت
كاله ابوه لك لو ما خذتها يسموك مو رجال طب لا تفضحنه.. ضحك باستهزاء بصوت عاالي.. ههههههههههههههههههههه مو رجال..
هههههههه ليش من كلك اني رجال.. الرجال الما وفى وعده مو رجال.. الرجال الكسر حبيبته مو رجال..
الرجال اللي يخلي بنيه محطمه بليلة زواج مو رجال.. هههههه ..ضحك انوب بجى اني مو رجال والله مو رجال دمرتها اني مو رجال وكعد بالكاع مدنك ويبجي بصوت عالي وبوجع… يتبع
🌺🌺🌺🌺🌺
اكتب والعبره خنكتني.. اووف الله يساعد كل حبيب ما يصيرله نصيب من حبيبه..
متابعه شيقه..