#لأنك_الحكاية..(حطام حكاية)
ولاية النيل الأبيض إحدى القرى البعيدة عن العالم تحتحضن تلك البقعة الصغيرة حكايات نستحي أن نذكرها.. نتجاوزها عمداً..ربما نخاف الحديث عن تلك الحكايات علناً.. جُبِلنا هكذا على إخفاء الكثير.. ودفنه حياً.. هكذا هي حكايتي مصيرها الدفن دائماً.. حالي كحال الكثيرات تدفن أحلامهن لأنهن "بنات".. فاقدات السند دائماً نستند على حائط مائل.
هي ليست البداية حتمًا.
مرحباً
''
الساعة 4/عصراً.
قاعدة وبتترقدي من سرير لي سرير التقولي بت العمدة! قومي قامت قيامتك بركة من صلى وقال يا الله
'' بت العمدة هنا بمثابة الأميراتِ.. يخدمنها النساء تنهِي وتأمُر.. ''
'' تمسك هاجر يديّ بقوة وتبرحني ضرباً ''.. يرتفع صوتها عالياً :شوفي الحمارة حقت ابوكي مرقت من الزريبة للحواشات والله يا فاطنة يا بت السيد الليلة الحمارة دي ما تجيبها الا تشوفي النجوم عز الضهر مش قلت ليك ما تخليها تجوع وتكابس في حواشات الناس طول عمرك غبية
انا الكان بلاني بيك شنو اقعد أربي لي شحطة زيك هو ابوك ما قدر يربيك.
=خلاص بقوم اشوفها فكي لي يدي بتوجعني
ما يبقى اسمي هاجر الليلة لو ما خليتك تزحي من الدق تحبي زي الشفع يا كلبة
ويتكرر حوار كل يوم ضرب وذلة
،، أنا منو؟؟ اسمي" فاطمة " حكايتي عندها أصول (مكان وزمان وشعور) امي كانت بتقول لي إنه أي حاجة في الدنيا دي عندها أصل قبل ما أعرف معنى الأصل ده شنو ودي شنو الكلمة الغريبة دي زاتها؟.. لما كانت بتحضني من الدنيا وتحكي لي،، قالت لي وهي بتمشط لي في شعري والدنيا شتاء بتذكر كنت قاعدة في تراب بااارد تحت رجولها و أي نسمة بتمر كنت برجف من البرد بس مبسوطة شديد،،كأنه الدنيا كلها بين يدي،، الشتاء ويد امي سندي الوحيد بتمشط في شعري وبتحكي لي اوعك تنسي أصلك بعدين.. لما تبقي دكتورة وتسافري المُدن تنسي أصولك.. احلامي كانت بتزرعها لي أمي جواي.. كانت بتخطط لي إني ح اكبر وأكون حاجة كبيرة،، ح اعيش في حال أحسن واطلع بيها من القاع ده،، ح أكون قريت ونجحت وأثبت إني ما بتحتاج أي زول.. إني بألف راجل.
الريف وجماله لما تكوني طفلة بتلعب بس بدون هموم وبدون أي تفكير،، بي أحلام بسيطة وناس بسيطة.. بنيات يلعبن لحدي الفتور دي سنيني الأولى ♥️ بتعشعش في الذاكرة لسه
المهم سيرة الأصل والأصول مهمة انه حكايتي أصلها حلة بعيد من المُدن وكلنا أصولنا هناك البلد.
