لأنك الحكاية

١٤

" القوة الحقيقية هي أن تعلم جيداً ما يمكنك فعله حينما تحاوطك جميع الأشواك.. أن تقرر أن لك حياة ويجب أن تعيش الباقي منها كما يحلو لك..
تقرر أن تسير حياتك على هواك.. أن يبقى لك قلباً حديدياً، حنوناً.. صاحب حق".

يوم المحكمة الساعة 5 صباحاً..

على سجادة الصلاة في حضن الأمان بين يديّ كتاب قرآن انا بين يدي ربُ كريم قوي عزيز.. بكيتُ كما لو أن لي جبالاً من الهوم اصبحت تراباً واختفت بركعة ودعاء..

الله دائماً يزيل الهموم كلها حين تركض إليه.. حدثه فقط عما يثقل قلبك..

" اشرح لي صدري ويسر لي أمري وأحلل عقدة من لساني يفقهوا قولي".. يارب اخد لي حقي انت سندي يارب،،
قعدت ادعي صحيت قبل الناس كلهم ما عارفة من متين،، في بيت عم عادل وحاسة اني غريبة عنهم كلهم،، ما عايزة اتكلم مع أي زول حاسة اني خايفة واني تقيلة على الناس وعايزة انوم بس وما اتكلم ولا حرف..
عايزة ارجع البيت.. بيتي انا وابوي بس وانسى الناس ديل كلهم..

عايزة اتطلق من الفاضل واصحى تاني يوم انساه هو واهله وابوه ال دمر حياتي كلها..
عايزة اهرب وما اعرف أي بشر تاني..

حاسة طول الوقت اني قلبي مكسور وفي حاجة بتوجعني.. احساس لما يموت زول قريب ليك كأنه انا فقدت كل الناس ال بعرفهم ماتوا كلهم وخلوني براي.. حاسة بالخنقة والضيق والهم وعدم النوم.. نفسي انوم بس ما بعرف انوم.. حياتي اتحولت لي واحدة بتنوم بي ادوية.. كل ما عيني تغمض بتذكر ابو الفاضل و وانا بقاوم فيه.. بشيل يدي واختها في راسي بحاول انسى الحتة دي..
بطلع لي في خيالي واحلامي.. حتى لو قعدت براي وابوي بعيد.. بحس انه جاي بتذكر نظراته لي..
بتذكر الفاضل وهو بيضربني بتذكر اللحظات ال كنت فيها براي.. بيتقفل علي باب بالمفتاح متى ما يجي مزاج للفاضل يفتح..
بحاول انوم تاني.. بشوف ابوه وهو بيهجم علي بقوم من نومي خايفة وبرجف.. بصرخ بدون سبب..
بصحى كل يوم وانا قلبي مقطوع من الخوف من كل شي.. نفسي اطلع من الحالة دي نفسي ارجع طبيعي..

كل يوم اشوف في يدي آثار الحادث وبلمس وشي ولسه الدم بينزف من الجرح..

انا ال حاسة بالوجع انا بس..

..
ابوي جا الساعة 6 لقاني قاعدة في الأرض وخاتة المصحف في التربيزة جنبي وسرحانة..
قعد جنبي وقال لي يا بتي.. انا عارف اذيتك وكنت ابو كعب خليتك تشيلي الهم من صغيرة.. اعفي لي يابتي..

ربنا عاقبني بي بي عذاب اكتر منك.. انا والله بعوضك عن الفات قضيتك دي لو دفعت دم قلبي باخد ليك بيها حقك..
لو ما خايف من ربنا ومن اخليك براك والله كان قتلتهم كلهم،،بس متعشم في القانون والبلد ال عذبتك دي تاني ما ماشي ليها انا بأجر لينا بيت هنا وحياتك تبديها من جديد.. انا معاك يابتي الله ينصرك ويجبر كسرك وترجعي بنيتي الحنينة ال زمان.
قلت ليهو تخلي البلد عشاني؟ ولا خايف من كلام الناس..
قال لي كلام الناس يومين وبنتهي دي شغلة البلد وناسها حسد ونميمة.. انا هناك ما عندي شي..