" أن تجد نفسك مُحاصراً مهزوم خارت قواك نتظر لما يحدث رافعاً رايةً بيضاء،، تتقبل كل ما يحدث لك بحجة أنك متعب من كل هذه التفاصيل..
متعب أنك بلا سند، وحيداً تحارب كل يوم حتى تسلتقي مهزوماً وتغمض عينك من فرط التعب.. تستعد لمعركة جديدة تثبت فيها للرماح التي حددت هدفها في جسدك أنك تقاوم أيضاً اليوم..".
طلعت سامية وكل ناس البيت واقفين،، جات عندي وضربتني كف.. ونزلت توبي وشدتني من شعري نزلت راسي في الأرض وانا عيوني من ضربتها ما شايفة حاجة.. بتضرب فيني بجنون وسامعة صوتها يا سراقة يا تربية حرامية.. عينك الفاضية دي بتتملي متين ياخ انا بكرهك لأنك حرامية وسراقة..
سرقتي دهبي وشقاي وعمري كله.. ما كفاية عرسنا ليك من ابوك السكران مرت ابوك يا كلبة قالت لينا دي حمارة دق بس،، دايرة تعملي فيها زولة كمان وعاجباك روحك وسماحتك دي مش.. انا برجعك لي زمن الذلة والاهانة عشان الاحترام اصلو ما بنفع معاك يا تربية الشوراع يابت الحرامية..
"انا سامعة كلامها ومحاولات احمد انه يمنعها بس الحصل ده كأنه انتقام سنين كأنه عندها معاي تار وأنا حرقت قلبها على عزيز"..
امها واقفة وتضحك وابوها كمان..
فكتني من شعري وبقت توري في احمد.. قالت ليهو شايف ده خاتم ابوك الجابو لي عاين ليهو ولقيتو في دولابها عشان تاني تدافع عنها وتقول شريفة..
احمد مسك امه من يديها وقال ليها مش الخاتم ده جدعه في الأرض قال ليها ملايين الدنيا كلها ما بتمسح ال عمليته ده يا امي مهماً كان..
انتي مديتي يديك عليها انتي يمة سامعة كلامك ال قلتيهَو مستوعبة الكلام الطلع منك شنو..
ليه عملتي كدا..
لو كانت ألد اعدائك ما بتعملي عملتك دي..
قبل ما تحكمي على زول عشان ما تاخدي ذنب المسكينة شوفي ال وصل الخاتم للدولاب شنو..
يمكن ديل اولادك الصغار ديل.. عليك الله يا امي بالطريقة دي بكرا القريبة دي نمشي بيتنا ما ممكن حاسي انك في غابة مع البت دي والقوي بياكل الضعيف،،ده اسلوب شنو يا امي.. قال لي معليش يا فاطمة امسحيها في وشي،، ده كله وانا واقفة جسمي برجف من الخوف خايفة امه تاني تجيني.. اول مرة احس بالظلم كدا احس اني مظلومة من جوة قلبي وانا ما عملت حاجة نفسي اقول ليهم انا ما عملت شي.. عمي ما عملت حاجة وحاجة عشة انا قعدت معاك سنين حصل فقدتي شي؟.. اصعب اتهام حصل لي في حياتي.. اتهموني في أكتر حاجة مسحيل اعملها.
مشوا وخلوني مع سامية.. قالت لي عارفة انك سرقتي وسرقتي ال اهم من الخاتم ..الخاتم ده عشان الناس بس السرقتيهو بعرف اطلعه منك كيف.. بعدتني ودخلت بيتي نادت امها وقالت ليها دايرة افتش يمكن سرقت قروشي.. خلوني برا ودخلوا جوة..
حسيت الدنيا ضيقة واني مخنوقة عايزة ابكي.. قعدت في الأرض جنب الباب اتغطيت بي توبي وانا قاعدة دموعي بتنزل من دون اذن.. طلعن الاتنين بعد مسافهه..
