لأنك الحكاية

١١

" للحظة تنتهي طاقتك التي كنت تحارب بها،، الطاقة التي كانت تحميك من إنهيارك، القوة التي بك تتلاشى وتتركك مع ضعفك وقلة حيلتك"...

ياامي عليك الله رضاك وعفوك خلي بعيد اسي،، انا قاعد هنا وما ماشي إلا بت الناس دي تبقى كويسة،، انتي زاتك مفروض تكوني جنبها عارفة حصل ليها كدا ليه؟..

امي قالت لي براهاا البت فاجرة وقليلة ادب بتدافع ليها ليه؟..
قلت ليها فاطمة اتاذت بي سببكم وربنا بيخلص ليها حقك،، انتي اذيتها بي السحر وبالكلام الكعب واتهاماتك وحبوبة بالذلة والاهانة وخالي الفاضل كمان ما قصر..
ده كله ممكن ينتهي لو هي بعدت منكم لو قالت سامحتكم..
لكن جدي؟ جريمة اغتصاب ابوك مجرم يمة..
انا ما قادر اصدق جدي بيعمل كدا،، فاطمة حالتها بتصعب على الكفار لسه ما صحت من صدمتها ما شافت نفسها وين،، ولا اتذكرت الحصل ليها، ،لسه ما عاينت لي نفسها في المراية وشافت آثار التعذيب فيها،، ما لقت نفسها بتنوم بالمهدئات..

ده حياتها وانتهت،، انتي عارفة يمة فاطمة دي اصغر مني؟ يعني في عمر بناتك لو حصل لي بتك كدا لا قدر الله بتكوني بالبرود ده؟..
بيكون ما فارق معاك؟.. ليه القهر والظلم ده

امي سكتتني وقالت  لي :
عارفة بتكون اتأثرت يا احمد عشان انت طيب ياولدي لكن الحصل حصل لو ابوك عمل كدا بترضى يخش السجن بترضى الناس تتكلم عنه نص كلمة؟.. اسمعني ياولدي احنا متسترين على القصة دي والحمدلله موت ود خالتي ده جا مع القصة دي عشان الناس ما تكون مركزة لكن الحلة ما عندهم غير الشمارات ياولدي تاني ما بكون عندنا وش نقعد مع الناس ابوي تاجر والتاجر سمعة،، الله يهديك يا احمد تعال وخلي الناس ديل ابوها ده ياولدي سكران لو قام عليك بقتلك..

قلت ليها يا امي خليني اسي انا ما بجي وحرقة الحشا دي واحدة الله ما يضوقك ليها لكن هو برضو اسي حشاهو اتقطع.. قفلت من امي وخالي السر والفاضل لسه قاعدين.. الفاضل ده قاعد برا ومنزل راسه في الأرض..

مشيت قعدت جنبه..
قلت ليه خالي..

عاين لي عيونه لونها احمر عرفت انه كان بيبكي.. قال لي يا احمد احكي لي الحصل شنو ،،فاطمة ده ابوي عمل ليها كدا زي ما بيقولوا؟..

قلت ليه اي،، انا لسه ما مصدق ما عارف جدي عمل كدا كيف بس ده هو،، ليه حصل كدا يا خالي،، ليه فاطمة بس انت ليه ما مشيت بيها بعيد،،

قام من جنبي وطلع سكينه وبيضرب في شجرة جبنا ودموعه بتنزل..
كان بيقول وبيصرخ انا كنت وين كنت وووووييين ليه ياابااا ليه عملت فيها كدا عملت فيها شنو البت صغيرة قتلناها قتلناها اااااااخخخخخخ..

ما كنت عايز امنعه عشان حاسي انه في نار في قلبه نار جواه..

..

عند السيد:..

ما كان هاميني شي غير بتي وحيدتي تصحى من اللهي فيه ده،، تسمعني صوتها وتعاين لي،، تبكي معاي وتقول لي يابا..