لأنك الحكاية

١٣

" بعد الصبر الطويل جبر.. الله لن يخذل عبداً دعاه مضطراً.. يملأ قلبه اليقين بإجابة.. كن دائماً مع الله".

عند فاطمة:
ما عارفة ليه الدنيا بتعمل معاي كدا ليه،، ما انتظرت افرح ولا مرة حتى لما قلبي بدا يرقص بالفرحة وقلت ابوي جاي يخلصني من العذاب ال عايشة فيه كنت منتظرة اليوم يخلص منتظرة اتصال ابوي ولا يدق الباب.. نسيت كل ال بعمله لي نسيت اني ما شوفته منه أي حب في حياتي كلها..
عارفة يا زينب،، انا من امي ماتت ماف زول في الدنيا حسسني باني مهمة مش مهمشة وبعيدة لأ.. انا منبوذة دائماً.. حتى فقدت الثقة في نفسي في شكلي وأي تفصلية..
وريني انا ح ابقى كويسة؟.. انا حاسة دايرة اموت،، ما عندي اي سبب اعيش عشانه.. انا لو رجعت هناك كل الناس حتتكلم فيني.. انا ما دايرة ارجع للفاضل ولا اي شي.. ابوه تاني برجع وبعمل نفس العملو..
زينب : فاطمة الحالة ال فيها انت دي نتيجة صدمة من قصة الإغتصاب..
مع العلاج بترجعي طبيعي،، الأهم من ده كله انك تساعدينا انك تكوني قوية وتقدري تاخدي حقك..

فاطمة: انا ما عندي حق ولا عايزاهو،، انا خلاص تعبت ياريت لو قلتني ياريت..
اما براي فاهمة يعني شنو براي؟ كلهم ضددي كلهم هاجر بتكرهني ابوي اللي هو ابوي ما عندي غيره عايني دي علامات السوط حقه في يدي..

(فاطمة مدت يديها وعليها آثار ضرب قديمة) دي كم ضربة وعايني عايني دي واحدة هنا في راسي  شايفة وعايني هنا وهنا في جسمي كله ( بتأشر بي يدها على رجلها ويدها التانية وضهرها)..

ده ابوي يا دكتورة.. وريني أي علاج بشيل لي الحاجات دي خوفي منه ال بشيله لي شنو؟..

ماف زول بيحس بي عشان كل ابو بيكون حنين بيضحك ويهظر بس أنا كنت بلاقي غير كدا..

ما عندي حضن اجري ليه.. انا والله والله تعبت..
كل حاجة كعبة بتحصل لي انا يوم ما حصل لعبت مع صحباتي وانا طفلة..
عشان ابوي بيدقني،،بيقول لأ
عشان هاجر بتكلم لي ابوي..

لقيت نفسي فجأة عروس وبيدفعوا فيني قروش ومفروض امشي عشان انا حاجة بتتباع عادي..
بقيت عايشة وسط ناس ارحم عذاب ابوي..

ليه يحصل كدا هو ده عادي؟ كل الناس بحصل ليهم كدا؟
اي واحدة في الدنيا دي بحصل معها الحصل لي؟ °°

انتي انتي يا دكتورة حصل ليك كدا؟.. ابوك كويس معاك؟ وريني بس وقولي لي لا ما كويس قولي بيضربك وجواك ليه خوف بس..

قولي لي عشان انا اقول لا لا كل البناات كدا انا بكمل حياتي..

زينب دموعها بتجري: مسحتها وقالت ليها يا فاطمة الدنيا دي فيها قصص كتيرة.. ما كل أب كويس في ناس ما بتقدر تعبر عن حبهم..
يمكن ابوك ده من خوفه عليك وعشان هو ما عنده غيرك كان بتصرف كدا.

يمكن كان بيسمع كلام مرته،، والله اعلم هي بتقول ليه شنو..
لو ابوك ما بيحبك ما كان واقف معاك اسي،، انا لما لاقيته شفته قاعد في الأرض لما انتي نايمة.. ده كله حب ما إلا الحب بالكلام انا عارفة انك شايلة منه كتير،، وانه في فترة من حياته كان قاسي عليك.. بس ديل سندنا ما عندنا غيرهم.. ما تفكتري في كائن في الدنيا ممكن يحبك بدون مقابل ويستحملك بكل حالاتك غير ابوك وامك..
فاطمة: طيب لو زي ما بتقولي ليه اتأخر ليه ما جاني لو كان جاني ما كان الكلب ابو الفاضل عمل فيني كدا.. انا حياتي انتهت حياتي انتهت ليه ابوي اتأخر ليه😭😭😭😭..